Ads by Google Ads by Google

Foa'i To'omata Domata & Anna Peko - $500,000 - fausia falema'i fou


O le taimi na tatalo uma ai Faife'au sa auai i le sauniga na talia ai le foa'i a le susuga Domata Peko ma le faletua Anna Peko e $500,000 mo le fausaga o le ulua'i fale mo le Falema'i Fou, ina ia fa'amanuia ia te ia ma lona olaga faigaluega, olaga ta'alo ai i le Football, ae maise o le fa'amanuiaga fo'i o le la'ua nofo fou i le suafa To'omata ua fa'ae'e i le ali'i ta'alo. [ata: Leua Aiono Frost]

O se va'aiga lea i le fa'ailo sa fa'atautauina e fa'alauiloa ai le foa'i taua na faia e le ali'i ta'alo Football Domata Peko ma le faletua Anna ina ia fausia ai le ulua'i fale lea ua fa'aigoaina fo'i ia i la'ua, e aga atu lea e fa'aaogaina mo le Falema'i Fou: Mission of Hope Community Health Center. [ata: Leua Aiono Frost]

Na fa'atasia le mamalu o le atunu'u o lo'o latou talosia, fa'atalitalia ma mo'omo'o fo'i i le amataga o le falema'i fou i le atunu'u i le faletalimalo o le Tradewinds i le taeao ananafi ina ia talia le foa'i tau tupe mo lea galuega, fa'atasi ai ma fa'alauiloaina o le Komiti Fa'afoe ua mae'a fa'atula'ia, latou te mataituina le amatalia o lea polokti aoga.

 

O le aumalaga o foma'i fa'apitoa, tamaita'i tausima'i ma i latou e to'a 14 na malaga mai le Eau Claire Medical Centers mai South Carolina, ma nisi fo'i o ta'ita'i o le Malo sa vala'aulia mo le fa'amoemoe atoa ai ma le to'atele na latou iloa lea fa'atasiga, sa auai e avea ma molimau o lea fa'amoemoe lelei.

 

O le foa'i na taua'aina lea e se tasi o alo o le atunu'u, To'omata Domata Peko ma le faletua Anna le $500,000 e amata ai le fausaga o le ulua'i fale mo lea falema'i, lea ua fa'aigoaina o le Mission of Hope Community Health Center, American Samoa.

 

Ona o tulaga o le tau, ma nai toe feuiuia'iga o pepa e fa'amautu ai le lisi o le eleele, ua le fa'ataunu'uina ai le suaina o le eleele i le nofoaga tonu i le Paka Liona lea ua mae'a fa'amautu mai mo lea galuega. Peita'i, ona ua malaga mai le atali'i  o Amerika Samoa, o lo'o ta'alo i le Denver Broncos, Peko o Lauli'i ma Pago Pago, fa'atasi ai ma le mo le taua'aoina aloaia o lenei vaega tupe tele, ua le toe tolopoina ai le fa'amoemoe, ae ua talia ma le fa'afetai tele le foa'i.

 

Saunoa Peko ma ia fa'ailoa lona agaga fa'afetai i le avanoa ua ia maua, le malosi fo'i e ta'alo ai mai le Atua, ua aoga ai i ona tagatanu'u. "Sa i ai mo'omo'oga e fia aoga mai i nai o'u matua matutua, uso ma tuafafine i le tatou nei malo. O ai fo'i na ilu pe talutalu, o le tausaga lenei e mafai ai ona faia lenei foa'i mo se falema'i ina ia togafitia ai tatou gasegase iinei ma le tau feoa'i ai outou matua matutua i va'alele, e saili togafitiga. Fa'afetai i talosaga, aua e leai lava se failoto pe a o'o ina lavea ma fa'aletonu ai le avanoa e maua ai se tupe e tausia ai matua ae maise aiga ma saili ai se aoga mo outou uma. Fa'afetai lea i a outou talosaga." E faia lea tautalaga ma loimata o le ali'i ta'alo, aua sa faigata ia te ia lona ta'ua o si ona tama ma lona tina ua auai i lenei fa'amoemoe, ona o lo'o si'ima'i fo'i i fafo.

 

"A leai lou outou tapua'iga, e le mafaia e a outou fanau ona a'e manuia se taumafaiga a'o matou to'esea atu ai mai ia te outou matua pele ma aiga.Tatalo pea i le Atua ia maua pea le malosi, e le gata ai ia te a'u a'o isi uso ma tuafafine uma o lo'o sailimalo i so'o se ala i fafo atu o Amerika Samoa, ona o le naunau e fia fai mea lelei mo le tatou atunu'u, le tatou malo ae maise nai o matou matua, aiga ma ona tagata lautele. O a'u nei, a'o se isi fo'i o i latou uma a taeao i manuia, ma avanoa fa'apenei e toe fo'i mai ai ma se 'ai lelei, ae a le tatou atunu'u ma tatou pelega. Fa'afetai tele mo le avanoa, ua ou maua e faia ai lenei foa'i."

 

Na tula'i fo'i le faletua, ma ia fa'apipi'i atu lana tautalaga e fa'ailoa lo la'ua fiafia fa'atasi i lenei avanoa ua la'ua maua. E le o ia fo'i o se tasi mai Amerika, ae o se tasi fo'i na ola a'e i lona fo'i atunu'u laititi, ma e pei lava fo'i o Samoa le ola taumafai. O lenei poloketi ua aoga tele mo tagata uma o Amerika Samoa, ae maise fo'i o so'o se tasi e fa'agasegasea ma ua mana'omia togafitiga a'o i ai i Amerika Samoa.

 

Na i ai le avanoa mo le ali'i Foma'i malaga mai South Carolina, o le CEO o le EAU Claire Medical Centers e 23 i lea lava Setete, Dr. Hamilton, ma ia faailoa mai ai lona fa'anaunauta'iga. "O lenei galuega ua faia ina ia talafeagai ma lagona, le aganu'u, fa'atasi ai ma le moomia o tagata Amerika Samoa. Ua pau sa'u vaega ua faia i ai, o le fesoasoani lea i le sainia o pepa, fa'aulu le talosaga ma isi mea e aoga ai lo'u agava'a fa'afoma'i ma le agava'a fo'i ua maua ona o le fausaga o isi falema'i uma ua aofia fa'atasi i le EAU Claire Medical Centers i South Carolina, ina ia vave fa'amaonia ai le tatau ona fa'atuina se isi falemai i le teritori. Fa'afetai tele ia i latou sa moemiti i mea lelei, ma ituaiga tautua e mana'omia e o tatou tagata i lenei atunu'u, ua mautinoa ua talia a tatou talosaga, ma ua tu'uina mai fo'i le avanoa e fa'atino ai o tatou mana'oga."

 

Na fa'alauiloa le Komiti Fa'afoe Tofia ua amata nei le latou galuega e fa'amautu ai le amataga o le galuega mo le falema'i fou lenei: Ta'ita'ifono/Peresetene, Bishop Vaifanua Mulitauaopele; Sui Peresetene/Sui Taitaifono Rev. Asaua Fuimaono; Failautusi Nancy Tupa'i Kupa; Teutupe Ava Mulitauaopele; Sui Totino Salaia Gabbard; Jason Betham; Saili Samoa; Rosa Banse; Rev. Afa Uta'i.

 

O le kamupani ua manumalo nei i le tauofoga mo lenei galuega, o le PRIMO Construction.

 

I le fa'aatausiusiuga o lea lava fa'atasiga, sa tula'i ai le susuga le Faife'au Toeaina Asaua Fuimaono ma ia fa'alauiloa le taua'aoina atu o le suafa "To'omata" i le susuga Domata Peko na te tau'avea. Na fa'aula ia te ia, ma sa faia fo'i le sauniga mamalu o le fa'apa'iaina fa'aleagaga o lana nofo. Na taua'aoina lea o meaalofa taua mo lana nofo, ae maise ia mati'e maualuga ai lana ti'a a'o tauva o ia i le fa'agatama o lo'o ua tautua ai i lona atunu'u ma ona tagata.

 

O le meaalofa na taua'aoina e aofia ai lona to'oto'o, o le fue ma le Tanoa na taua'aoina i le faletua, ina ia sua pea le tanoa i sosia ma manuia mai le Atua ona o le agaalofa ma le agalelei ua la'ua foa'i ai mo Amerika Samoa, e ala i le ulua'i fale mo le Maota Gasegase fou.

 

Na tufatufaina mitiafu ma sainia fo'i ata matagofie o le ali'i ta'alo mo i latou uma na auai i lea sauniga mamalu, ma iloga fo'i manuia o le Atua, aua o le fa'amoemoe ua taunu'u o le la'au o le soifua lea.