Ads by Google Ads by Google

Fiu e saili le faila a le fafine mai Tonga ua ova aso i Amerika Samoa

ausage@samoanews.com

Na fa’amaonia mai e se sui sinia o le Ofisa o Femalagaaiga i le Samoa News, le fiu lea e tau saili le faila a le fafine mai Tonga lea na mae’a i le tausaga na te’a nei le aoga o lona ID nofomau, ua le maua.

 

Na taua e lea sui sinia e fa’apea, ina ua ia sailia pusa o lo o teuina ai faila a tagata mai fafo i totonu o le Ofisa o Femalagaaiga, na ia iloa ai e le o i ai se faila a le fafine Tonga e pei ona taua.

 

Na tuuina atu e le Samoa News i le sui sinia fa’amaumauga uma e fa’atatau i le fafine Tonga lenei, e aofia ai le numera o lona ID lea na mae’a le aoga i le aso 3 Aperila 2017, o lona igoa atoa, atoa ai ma le ituaiga ID o lo o ia umia.

 

Ina ua fesiligia le sui sinia pe aisea ua tuai ai ona toe fa’afo’i le fafine Tonga i lona atunu’u, pe afai o lea ua fa’amaonia ua mae’a le aoga o lona ID i le tausaga na te’a nei, na fa’amanino e le sui sinia e fa’apea, tusa lava pe ua mae’a le aoga o le ID a le tagata mai fafo, e i ai lona aia e faia ai sana iloiloga i luma o le Komiti Fa’afoe, tusa lava poo lea ua talosaga lana sponsor e fa’aleaoga lona toe sponsor ina o lea tama’ita’i ae toe fa’afo’i loa i lona atunu’u.

 

“E manino le Vaega 41 o le Tulafono o Femalagaaiga, soo se tagata mai fafo ua manatu lana sponsor e fa’aleaoga le avanoa sa ia sponsor ina ai o ia, e i ai lava le aia tatau o lea tagata e faia ai sana iloiloga faapitoa i luma o le Komiti Fa’afoe, mo le fa’amaninoina o le mataupu e pei ona a’afia ai o ia,” o le saunoaga lea a sui sinia.

 

“A o le i faia le iloiloga a le tagata mai fafo i luma o le Komiti Fa’afoe, e muamua ona tauaao e le Ofisa o Femalagaaiga faamaumauga uma e uiga i le mataupu, ma tuuina atu ai loa aso e 20 i le tagata mai fafo e tuuina mai ai sana tali e tusa ai o ni tuuaiga fa’asaga ia te ia.”

 

O totonu o le 20 aso lea ua tuu atu e le ofisa o femalagaaiga i le tagata mai fafo, e mafai ai loa ona fa’atinoina sana iloiloga i luma o le Komiti Fa’afoe, ona faia ai loa lea e le Komiti Fa’afoe sana faaiuga maumaututu e fa’avae i luga o mau ua latou taulimaina.

 

“E le mafai ona otomeki lava ona fa’afo’i le tagata mai fafo i lona atunu’u pe afai ua mae’a le aoga o lona ID, se’i vagana ua fa’amalieina vaega o le tulafono,” o le saunoaga lea a le sui sinia.

 

Ae fia fa’ailoa e le Samoa News e faapea, afai o le tulafono sa’o lea ua fa’ailoa mai e le sui sinia, o le mea moni, ua i ai faaiuga ua mae’a ona faia e le Ofisa o Femalagaaiga ua atagia mai ai le le tausisia o vaega o le tulafono.

 

O lea tulaga e aofia ai le fa’afo’i fa’amalosi o tagata mai fafo ua mae’a le aoga o latou ID, e aunoa ma le tuuina atu o le avanoa e faia ai ni a latou iloiloga faapitoa i luma o le Komiti Fa’afoe, ina ia tusa ai ma a latou aia tatau.

 

O le mataupu e fa’atatau i le fafine Tonga e pei ona talanoaina nei, o lo o tula’i mai ai masalosaloga, ua mafua ona tuai le toe fa’afoiina atu o ia i Tonga, ona o lea ua aofia ai se tasi o tagata faigaluega sinia a le Ofisa o le Kovana Sili.

 

O le masina o Tesema 2016 na tuuina atu ai e le sponsor sana tusi i le Komiti Fa’afoe faapea ai ma le Pulesili o le Ofisa o Femalagaaiga ia Peseta Dennis Fuimaono, e fa’aleaoga ai lona toe sponsor ina o lea tama’ita’i, ae poloaina loa le toe fa’afo’i ese atu o ia ma Amerika Samoa, ina ua ia le usitaia ni isi o vaega o Tulafono tau Femalagaaiga.

 

Na taua e se molimau fa’atuatuaina i le Samoa News e fa’apea, na faailoa e se tagata faigaluega sinia a le Ofisa o Femalagaaiga i le sponsor e fa’apea, ua mae’a ona fa’atonuina i latou e se tagata faigaluega sinia mai le Ofisa o le Kovana, e aua ne’i fa’afoia le fafine Tonga i lona atunu’u, ae tu’u atu le mataupu faitalia o ia ma sponsor le fafine.

 

Na taua e le sponsor a le fafine Tonga i le Samoa News e fa’apea, e tatau lava ona uia ala o le tulafono, pe afai ua manatu le tagata faigaluega sinia a le Kovana e avea o ia ma sponsor fou, ae le o le faia o auala e atagia mai ai le soli o le tulafono.