Ads by Google Ads by Google

Filifilia le Pentagon Samoa Construction e fausia le fale’ai fou o le TCF


Se vaaiga i le galuega mo le fausiaina o le fale’ai fou mo pagota i le toese i Tafuna [ata foa’i]
ausage@samoanews.com

O le konekarate faufale o le Pentagon Samoa Construction lea ua filifilia e le malo o Amerika Samoa, tauala mai i le fa’aiuga a le afioga i le Kovana Sili ia Lolo Matalasi Moliga i le vaiaso na te’a nei, latou te fausia le fale’ai fou mo le Toese i Tafuna.

 

Na fa’amaonia mai e le Pule o lea konekarate, tofa Taupau Tauileave Toluono i le Samoa News i le vaiaso na te’a nei, le tu’u atu aloaia lea o le galuega latou te fa’atinoina ma le fa’amoemoe, e tatau ona mae’a i totonu o le 4 vaiaso.

 

“O lea ua matou galulue i sifi e 2 ina ia mafai ai ona fa’ataunu’u le finagalo o le malo o Amerika Samoa mo le fausia lea o le galuega i vaiaso e 4,” o le saunoaga lea a Taupau. O le galuega e tusa ma le 46’ x 68’ futu le umi ma le lautele.

 

O Taupau, o le isi lea sa i ai fa’atasi ma le Kovana i le taimi na asia faafuase’i ai e le Ta’ita’i o le atunu’u ma nisi o lana Kapeneta le nofoaga autu o le Toese i le vaiaso na te’a nei, ona o ripoti i le tulaga fa’aletonu ua i ai le fale’ai.

 

I lea asiasiga, na fa’atonu ai loa e le ali’i Kovana le tatau lea ona amata le galuega, ma tu’u atu ai loa le galuega e fausia e le Pentagon Samoa Construction.

 

Na taua e se molimau i le Samoa News e fa’apea, o le faaiuga ua faia e le Kovana e fausia ai se fale’ai fou mo le toese, o se faaiuga ua leva na tatau ona silasila toto’a i ai Ta’ita’i o le atunu’u, aemaise lava i Ta’ita’i o le Ofisa o Leoleo, ona o le tulaga fa’aletonu o loo i ai le nofoaga i Tafuna.

 

Ae na taua e ni isi o le atunu’u i le Samoa News lo latou le lagolagoina o le faaiuga ua faia e le ali’i Kovana, o lona asia lea o le nofoaga i le toese ma vave lana faaiuga e fa’aleleia ai vaega o loo fa’aletonu, ae o loo tele isi nofoaga e tatau ona ave i ai lana fa’amuamua e pei o le Falema’i i Fagaalu.

 

Saunoa se tasi o Tamali’i o le atunu’u e faapea, o loo tumau pea tulaga fa’aletonu o le auaunaga a le falema’i i Fagaalu i le taimi nei, ma ua tatau i Ta’ita’i o le atunu’u ona fai i ai se faaiuga.

 

O ni isi o ia fa’aletonu ua tele tausaga o i ai pea ae foliga mai e le o ave lava i ai se fa’amamafa, e pei o le tele o itula o fa’atali tagata gasegase mo le taimi e vaai ai le foma’i, e le o lava foma’i e vaaia le soifua maloloina o le atunu’u, atoa ai ma le fa’aletonu o vaega e fa’atino ai le tautua a le pulega o Falema’i.