O le aso Faraile o le vaiaso nei lea ua fa’atulaga e toe fofogaina ai le mataupu a le ali’i o Paulo JrPaulo i luma o le Fa’amasinoga Maualuga, mo le tuuina atu o se fa’aiuga a le fa’amasinoga e tusa ai o le mataupu lea ua ta’usala ai o ia, i lona umia fa’asolitulafono o vaega o le laau fa’asaina o le mariuana.

O se tasi o itu o lo o fili tagaga ai finagalo o ali’i Fa’amasino, o le filifili lea pe toe fa’afo’i Paulo Jr i lona atunu’u o Samoa na malaga mai ai, pe nofo pea iinei e pei ona talosagaina e lana loia.

Na pu’e faapagota e Leoleo ia Paulo Jr i le aso 22 Setema 2017 i Atu’u, i luma o le kamupani i’a a le StarKist Samoa, i le mae’a ai lea ona ripotia e ni isi o tagata faigaluega i Leoleo le fa’atau atu e le ua molia o sikaleti mariuana i ni isi o tagata faigaluega.

Na aga’i atu Leoleo ma latou pu’e fa’apagota loa Paulo Jr, ae maua ai i totonu o lana ato se tama’i afifi o lo o i ai sikaleti mariuana e 24. Na faailoa e le ua molia i Leoleo ina ua fesiligia o ia i le aso lea, o le tele o sikaleti mariuana ua mae’a ona fa’atau i tagata faigaluega.

Ina ua valaau le mataupu a Paulo Jr i le vaiaso na te’a nei, na talosagaina ai e lana loia ia Kate Hannaher le fa’amasinoga, ina ia talia le fautuaga a le Ofisa Faanofovaavaaia, e faasala le ua molia i se fa’asalaga faanofovaavaaia. Sa ia talosagaina fo’i le fa’amasinoga ina ia aua ne’i faia sana poloaiga e fa’afo’i ai le ua molia i Samoa, a ia fa’aauau pea ona aumau o ia i le teritori.

Na faailoa e Hannaher i le fa’amasinoga, ua silia laititi lava ma le 8 masina talu ona taofia Paulo Jr i le toese, ma, o se tulaga lelei fo’i le fa’aaoga o le taimi lea e fai ma ana fa’asalaga i lenei mataupu, a tatala loa o ia i tua e saili sana galuega e totogi ai lana sala i le fa’amasinoga.

Na vave ona faauilavea le afioga i le Fa’amasino Sili ia Michael Kruse ma saunoa e fa’apea, e le tau fa’ailoaina le tulaga lea. O loo manino le tulafono, e aofia ai lava ma le taimi lea na tuli e le tagata i le falepuipui i totonu o lana fa’asalaga.

“Pau le itu e tatau ona e finau mai ai, o le tuutuugao le nofovaavaaia e tuua ai e Paulo Jr le atunu’u. E tatau ona e faailoa mai ia te i matou, poo le a se mafua’aga o le a le mafai ai ona matou poloaina o ia ina ia tuua Amerika Samoa ae toe fo’i atu i Samoa,” o le saunoaga lea a Kruse i le loia a Paulo Jr.

Na ioe le tama’ita’i loia i le saunoaga a Kruse. Na taua e Hannaher e fa’apea, e ui lava o Paulo Jr na fanau i Samoa, ae o lona olaga atoa lava o Amerika Samoa. Na taunuu mai o ia i Amerika Samoa ina ua 4 ona tausaga, ma aoga ai lava i lona olaga atoa iinei seia oo ina fa’au’u ma maua ai loa lana galuega. Na taua e le tama’ita’i loia e fa’atua, o Amerika Samoa, o le nu’u moni lava lea o Paulo Jr.

Na faailoa atili e le tama’ita’i loia fautua e fa’apea, o lo o tumau pea le lelei o pepa nofomau a le ua molia, fa’atoa mae’a le aoga i le masina o Setema o le tausaga nei.

“O ia o se ali’i talavou ua ia faia se mea sese e sili ona fa’avalevalea. O se ali’i e faalagolago i ai lona aiga, o lea fo’i fa’atoa ta’usala o ia i se solitulafono mamafa talu lona olaga atoa.” o le fa’amatalaga lea a Hannaher.

Na faamanatu e le tama’ita’i loia fautua e fa’apea, ina ua fa’atulaga le mataupu a Paulo Jr i le 2 vaiaso talu ai e lau ai lana fa’asalaga, sa to’atele lona aiga na i ai i totonu o le potu fa’amasino mo le lagolagoina o lona fa’amoemoe.

Na toe faauilavea Kruse ma saunoa e fa’apea, o se tasi o itu o loo atugalu i ai le fa’amasinoga, ona o loo taua i totonu o le ripoti a le Ofisa Faanofovaavaaia, e ese mai i tupe sa maua mai i lana galuega, sa fa’aaoga e le ua molia le fa’atauina atu o mariuana e fesoasoani ai i tupe maua mo lona aiga.

Na ioe Hannaher i le saunoaga a Kruse, ma ia taua ai e fa’apea, o le gaioiga sa faia e le ua molia, o se gaioiga ua sili ona sese. Sa ia taua atili fo’i e fa’apea, e ui i le sese o le gaioiga a le ua molia, ae o le mea moni lava, e le o se alofaga lea mai lana solitulafono. Na taua e Hannaher e faapea, e oo lava foi i tagata ola matitiva i atunuu lima vaivai, latou te faia fo’i le tulaga lea. Ae i lona taofi, o se faaiuga e sili ona sese.

Na soisoi Kruse ma ia saunoa e fa’apea, “E tatau la ona alu le ua molia i Kalefonia e nofo ai, aua o loo fa’ataga ai iina le mariuana. O Amerika Samoa lenei, e le taliaina ai le ituaiga tulaga lea o le fa’aaoga o faatoaga faapenei e tausi ai aiga.”

Ina ua maua le avanoa e fa’atoese ai, na ta’utino ai loa le ua molia i le fa’amasinoga, ua lagona lona sese e tusa ai o lana solitulafono sa faia. Sa ia talosagaina fo’i se avanoa e toe fo’i atu ai e tausi ona matua ma fesoasoani i le atina’eina o lona aiga.

I le mae’a ai ona malolo o le fa’amasinoga mo sina taimi puupuu, na faia ai loa le faaiuga a le fa’amasinoga e toe tolopo le lauina o le fa’asalaga a Paulo Jr seia aulia le aso Faraile o le vaiaso nei.

O lea faaiuga, ia maua ai se avnaoa o le Ofisa Faanofovaavaaia e sailiili atili ai, pe i ai ni isi o le aiga o Paulo Jr na a’afia i le tuleiina o fualaau fa’asaina o le mariuana lea na mafua ai ona molia lenei ali’i talavou.

Ua poloaina fo’i e Kruse le Ofisa Faanofovaavaaia ina ia suesue le talaaga o le aiga o le ua molia, ina ia maua mai ai ni fa’amatalaga e fesoasoani i le fa’amasinoga i lana fa’aiuga o le a tuuina atu.