Ads by Google Ads by Google

Filifili Fa’amasinoga pe agava’a le molimau malo i le mataupu a Faumui


[ata: foa'i]
ausage@samoanews.com

O le taoto atu nei i se filifiliga a le Fa’amasinoga Maualuga, pe agava’a ona valaau e le malo le latou molimau fa’apitoa mai fafo, lea ua fuafua e molimau i le fa’amasinoga autu a le ali’i ave pasi lea o lo o tu’uaia i le faia o uiga mataga i se tama’ita’i e 15 tausaga le matua.

 

O le vaiaso na te’a nei na valaau ai le mataupu a Kirisimasi Faumui i luma o le fa’amasinoga maualuga, ona o se talosaga na fa’aulu e lana loia fautua ia Michael White, e talosagaina ai le fa’amasinoga maualuga ina ia taofi le molimau fou a le malo lea ua sauni e valaau i le taimi o le fa’amasinoga autu, lea ua fa’atulaga e faia i le aso 20 Aokuso, 2018.

 

Na taua e White i lana folasaga e fa’apea, e le talafeagai le gaioiga ua faia e le malo, o le fa’afuase’i lea ona fa’ailoa mai o le latou molimau fou, a o lea ua toe 2 vaiaso fa’ataunu’u le fa’amasinoga.

 

I le talitonuga o White, sa tatau ona vave logo atu e le malo le latou molimau fou lea, ina ia lava se taimi e sailiili ai e le latou itu lea molimau, ma faitau ni ripoti e fa’atatau i ona agava’a ma mataupu sa aofia ai o ia i tausaga ua mavae.

 

Na faailoa e White i le fa’amasinoga e fa’apea, o le mataupu o loo tu’uaia ai Faumui, e le o se mataupu mama, e le gata e matuia tu’uaiga ae tatau fo’i ona malosi le latou tali atu e tusa ai o tu’uaiga a le malo.

 

I le mae’a ai o le fa’afinauga a White, sa ia talosagaina ai loa le tatau lea ona taofi le malo mai le valaauina o le latou molimau fou lea. Na tete’e le loia a le malo ia Woodrow Pengelly i le fa’afinauga a le itu tete’e.

 

Na taua e Pengelly e fa’apea, o le molimau fou lea ua fuafua le malo e valaau, e le o se tagata na aofia o ia i le suesueina o lenei mataupu, ae o se tagata ua lava lona tomai i ituaiga mataupu e aofia ai le mataupu o loo tu’uaia ai Faumui.

 

Na taua atili e Pengelly le mafai lea ona latou tuuina atu se ripoti mo White ma lana itu, e faitau i ai ma malamalama i tala’aga o le molimau fou a le malo. Na tete’e i ai White i lea fa’amatalaga. Na taua e White e fa’apea, e le lava le taimi o loo totoe e mafai ai ona toe fa’aofi atu le molimau fou lea a le malo. Afai e manatu le malo e valaau le latou molimau, sa tatau ona i ai sa latou ripoti tusitusia ina ia mafai fo’i ona faitau ai a latou tagata e i ai le tomai faapitoa i mataupu faapenei, ma malamalama ai i le tulaga tonu o lenei mataupu.

 

O le vaiaso nei lea ua fa’atulaga e le fa’amasinoga e toe valaau ai le mataupu a Faumui, ona tuu aloaia atu loa lea o se faaiuga a le fa’amasinoga, pe talia le talosaga a le malo, pe teena fo’i.

 

O Faumui o loo tu’uaia i moliaga mamafa eseese e aofia ai moliaga e 2 o le faia o amioga faasotoma; 2 moliaga o le faia o sauaga fa’afeusuaiga; 3 moliaga o le tagofia o itutinosa o se tama’ita’i e le fa’aipoipo i ai, ma le moliaga e tasi o le fa’iaiga i se tagata a laititi ma le tulafono.

 

O lenei mataupu na alia’e mai i le tausaga na te’a nei, ina ua faila e le Tina o le tama’ita’i e 15 tausaga le matua se tagi i le ofisa o Leoleo, fa’asaga ia Faumui ma uiga mataga sa ia faia i lana tama.

 

Na taua e le tama’ita’i na a’afia i Leoleo e fa’apea, o le masina o Aokuso o le tausaga e 2015 na amata mai ai le la mafutaga fa’aleulugali’i ma Faumui, ae o le taimi lea fa’atoa fa’auu mai o ia i le Vasega 8.

 

Talu mai lea taimi, sa fa’aauau ai pea le la mafutaga, ma o ni isi o taimi e tagofia ai e Faumui ona itutinosa, o isi fo’i taimi la te fai’aiga ai.

 

O ni isi o auala sa tuuaia ai e le malo le ua molia, o lona fa’atauina lea o se telefoni ae ave i le tama’ita’i na a’afia, ina ia mafai ai ona la fesoota’i ma talanoa. Na teena e Faumui tu’uaiga fa’asaga ia te ia, ina ua fesiligia o ia e Leoleo e uiga i lenei mataupu.

 

O lo o tumau pea tuutuuga o loo tatala ai le ua molia i tua, e fa’atali ai taualumaga o lana mataupu i luma o le fa’amasinoga maualuga a le atunu’u.