Ads by Google Ads by Google

Fesuiaia ta’ita’iga Charlie 110th BN-442nd Infantry Regiment


I le sauniga mamalu o le fesuiaiga o tofiga o le Charlie Company a le US Army Reserve i Tafuna, e ao fo'i ona fa'atautaia i le fesui'aiga o le Fu'a e ta'ita'ia ai le Palatuni. O le taimi tonu lea ua taua'aoina atu ai e LTC Mathew Cloud le fu'a mai ia Cpt. Carneen Cotton ma pasi atu ia Cpt. Timothy Shea. O ia lea e toe faao'o atu le Fu'a i le ta'ita'o Satini o le Charlie Palatuni. [ata: Leua Aiono Frost]

Le taimi ua fa'apine ai e LTC Mathew Cloud, le Commander o le Charlie 100th Battallion 442nd Infantry Regiment ia Cpt. Carneen Cotton, lea ua tu'ua le ta'ita'iga o le Kamupani mo lona avanoa e faigaluega ai i Montgomery, Alabama. [ata: Leua Aiono Frost]

O le taeao na fa'ataunu'u ai le sauniga mamalu e suia ai tofiga ta'itai o le Charlie Co. 100th Battalion 442nd Infantry Regiment i le Potu Fono o le US Army Reserve i Tafuna.

 

O lea sauniga sa fa'atautaia ina ia fa'amae'a ai le tautua matavela a Capt. Carneen Cotton ae fa'ae'e le ta'ita'iga o le Charlie Company i le susuga Cpt. Timothy Shea. O le sauniga lotu sa ta'ita'ia lea e le tama'ita'i Faife'au Lagolago mo le US Army Reserve, Dr Julia Levi Foifua i le tatalo, ona fa'atautaia lea o le sauniga mamalu e tusa ai o fa'ataotoga o nei ituaiga o sauniga e le militeri.

 

I se tasi o vaega sa tutula'i tagata uma, ae suia le ta'ita'iga o le Kamupani a Charlie e fa'ailo ina taua'aoina o le Fu'a na aumaia e le Satini Ta'ita'i o le Palatuni, SFC Kelvin Tuamasaga ma taua'ao sa'o ia Capt. Carneen Cotton, fa'ao'o atu e Cotton i le Commander LTC. Mathew Cloud ma toe taua'ao atu i le susuga Capt Timothy Shea ina ia fa'aauau ai le ta'ita'iga ua fa'agasolo nei o le Charlie Company.

 

Na tomuli lea fesuia'iga o ta'ita'iga i le toe fa'afo'i mai e Capt Timothy Shea o le fu'a i le Satini ta'ita'i o le Kamupani a Charlie - SPC Tuamasaga. Ona usuina lea o vi'i o le US Army ma le vi'i fo'i o le Palatuni a le Charlie company, fa'atasi ma le latou ta'ita'i fou ua ta'imua mai ia te'i latou uma.

 

Na i ai avanoa sa saunoa fa'amavae ai Capt Carneen Cotton ma i lana saunoaga sa ia fa'aalia ai lona fiafia tele i lona taunu'u mai ma galue ai i le ta'ita'iga ai i latou uma na galulue fa'atasi i le US Army Reserve i Tafuna.

 

"I lo'u o'o mai ua ou maua se avanoa matagofie e galulue fa'atasi ai ma nisi e matua vavalalata i lo'u agaga ona e leai se fa'aituau, ae fiafia fa'atasi e fa'atino tiute ma faiva e tautuaina ai ali'i ma tama'ita'i fitafita o lo'o koleni fa'apitoa i tomai ma le malosi e mo'omia i totonu o le tatou US Army Reserve. Ua iloga le malolosi o fitafita e gasolo atu iinei, e le taumatea fo'i lo latou usiusita'i ma le fa'alogo gofie i fa'atonuga."

 

E le'i gata ai lona taumafai e fa'aofi mai nisi tomai fou i tatou fitafita talavou. "O le amataga o la'u galuega na ou va'aia ai e i ai nisi ala fou e mafai ona fa'alautele ai le atamai ma le iloa ona fa'atino tiute e le vasega o fitafita mai le tatou nei itu o le Army Fa'aleoleo a le Malo Tele. Ua gafatia ona feso'ota'i atu ma le polokalama sinia mai melesia ma ua aoga tele i fa'alautele atili o le atamai i metotia tau le agava'a fa'afitafita. Ua feso'ota'i lea tulaga ma ua iloga le aoga o lea fo'i taumafaiga."

 

E le gata i lea ae ua fa'alautele le va'ai i ala e galulue fa'atasi ai nei Kamupani i le tatou Army Reserve ma le lautele o le atunu'u. O lea sa matua matilatila ai ona sapaia o le tu'ufa'atasia o le aualo o le Fautasi i le tu'uaga va'a.

 

"O le auai o le Charlie i le tu'ugava'a e fa'autagia ai le a'ano tonu o le galulue fa'atasi ma le aganu'u fa'asamoa e matua lago lelei ai so'o se folauga i lenei teritori. Fa'afetai ua mae'a, ae ua avea ma se fiafiaga i fitafita uma, ona fai i latou ma ni sui e fa'aulufale mai ni mea lelei ma fa'amatagofieina aso fa'apitoa o le latou malo fa'alotoifale."

 

E le'i galo fo'i ia te ia fa'afetai mo i latou uma na tofu sao i lona ola saogalemu ai i le tatou nei teritori ma sa fesoasoani malosi fo'i ia te ia i lana galuega. "Ou te iloa ana le avea ai ma se uo i le to'atele, e le faigofie la'u galuega, ma le ausia le tele o ou fa'amoemoega sa taumafai i ai, a'o o'u tautua ai i Amerika Samoa ma ona tagata, ae maise o le tatou Kamupani a Charlie. Fa'afetai aua e tofusia lava outou ma se sao matagofie mo a'u, e le fa'agaloina la outou fesoasoani, ae ou te fa'afetaia aua, ua ou maua ni uo i lo'u olaga atoa."

 

Ua avea fo'i o ia ma se tasi o Totino o le Kalapu a le Liona i Pago Pago nei, i lona toe tausaga i Amerika Samoa.

 

"O lo'u avea ai ma Liona i le tatou Kalapu, o se tasi lea o tofi ua ou fa'atauaina, aua ua ou va'aia le aoga o polokalama ma galuega fa'atino a le Liona mo tagatanu'u ma le mamalu lautele o le atunu'u ona o poloketi ua latou una'ia, galulue i ai ma fa'atula'ia. Ia fa'aauau ai pea, ae ua outou iloa fo'i, ou te alu, a'o a'u lava o le totino o le Kalapu a le Liona i Amerika Samoa nei."

 

Ina ua tula'i fo'i le susuga Capt Timothy Shea mo lana tima'iga sa ia fa'ailoa ai lona fiafia e amatalia lana tautua, ma e manatu fo'i o ia, o a lava galuega ua mae'a amatalia e CPT. Carneen Cotton, e ao ina fa'aauau, ma fa'aleleia atili mo isi fitafita uma o le a gasolo mai i le Palatuni fa'atasi ai ma i latou ua mae'a tautua ai.

 

"Ou te fa'afetaia lenei avanoa matagofie ua ou maua ou te galue ai i Amerika Samoa nei i le Palatusi a Charlie, ma ou te fa'afetaia le amana'ia fo'i o lou nei sui ou te galue ai. Peita'i, o le lumana'i e taua nai lo se isi mea ua mae'a ou faia i le Charlie, o lea tau ona ia tatou maua le agaga maulalo e galulue ai, ia onosa'i fo'i i ni mea e tiga ai, ae ia tatou taumafai atili e fa'ataunu'u a'oa'oga ma tautua lelei mo fitafita uma e soloa'i mai i le tatou Kamupani, ma avea ma totino fo'i o le US Army Reserve i Amerika Samoa. Ia tatou ausia tapula'a fa'atulaga mai e tatou te galulue aga'i i ai!"

 

O lana fa'afetai sa ia avatu i le vasega o fitafita uma o lo'o ua mae'a i ai i le Charlie Company sa ia fa'apea ai, "Fa'afetai mo la outou tautua, ae tausaili isi ala lelei uma e fa'aleleia atili ai lo tatou faiva. Alofagia, tatou galulue fa'atasi e manuia ai faiva."

 

Na fa'apineina fo'i le tama'ita'i o Cpt. Carneen Cotton e le ali'i Ta'ita'i o le 100th BN-442nd Infantry Regiment LTC Mathew Cloud, e agatonu ai lana tautua ua mae'a nei i le tatou US Army Reserve.