Ads by Google Ads by Google

Fesiligia Vaiau mafua’aga ua to’atele ai tagata leai ni pepa nofomau

Ua fesiligia e le afioga i le ali’i Faipule mai le itumalo o Saole le mafua’aga ua ala ai ona to’atele tagata mai isi atunu’u o lo o nonofo fa’asolitulafono i Amerika Samoa e aunoa ma ni pepa nofomau.

 

Na taua e le afioga a Kitara Vaiau i luma o le Maota o Sui i le vaiaso na te’a nei e fa’apea, ua fa’atiga taliga (tulou) lona faitau atu i le nusipepa i le tele o aso o fa’asalalau mai ai tala e fa’atatau i tagata mai fafo e leai ni pepa nofomau ae o lo o molia i lo latou faia o solitulafono eseese.

 

“E le o se tulaga matagofie lea tulaga i le faitau atu i ai o tagatanu’u o Amerika Samoa, e atagia mai ai le fa’atamala o le Ofisa o Femalagaaiga e fa’atino la latou pito laau e ala i le fa’amalosia lea o tulafono tau femalagaaiga,” o le saunoaga lea a Vaiau i luma o le maota o sui.

 

Saunoa le ali’i faipule e fa’apea, e le o se tulaga lelei le faitau atu i tala fa’asalalau o taua ai ni tagata mai fafo sa nonofo faasolitulafono e aunoa ma ni pepa nofomau, ae toe a’afia fo’i i ni solitulafono mamafa i totonu o le atunu’u.

 

“O ituaiga faafitauli faapenei e atagia mai ai, e le o galulue le ofisa o femalagaaiga e fa’atino a latou tiute tauave,” o le saunoaga lea a Vaiau.

 

“Na tofia le ofisa o femalagaaiga latou te faamalosi le tulafono, ma mautinoa e leai se tagata mai fafo e ova ona aso i le atunu’u.”

 

O le fautuaga a le afioga i le ali’i faipule e pei ona ia folasia i luma o le maota o sui, o le tatau lea i le ofisa o femalagaaiga ona latou fa’atulaga le polokalame faapitoa e ala i le saunia o se faila e tuu i ai le lisi o tagata mai fafo o le a mae’a aso o pemita na malaga mai ai, ina ia faigofie ona latou logoina i latou poo latou sponsor fo’i, ae toe 2 pe 3 aso mae’a a latou pemita.

 

“Afai e fa’atinoina e le ofisa o femalagaaiga le ituaiga auala lea, o le logo o tagata mai fafo poo latou sponsor fo’i e faailoa i ai toe 2 pe toe 3 fo’i aso ona mae’a lea o le pemita na malaga mai ai le tagata mai fafo, o le mea moni e le toe i ai ni tagata mai fafo e nonofo faasolitulafono i le atunu’u, e le toe i ai fo’i ni tagata e aafia i ni solitulafono,” o le saunoaga lea a Vaiau.

 

O se tasi o atugaluga e pei ona saunoa le ali’i faipule, o le alu ai o tupe a le malo e tausi ma fafaga ai tagata mai fafo o loo taofia i le falepuipui ona o solitulafono eseese ua latou fa’atinoina.

 

Na lagolagoina e nisi o afioga i faipule le mataupu e pei ona saunoa i ai Vaiau. Saunoa nisi faipule e faapea, o se tasi o faafitauli ua maitauina, e le gata i le fa’atamala o le ofisa o femalagaaiga, ae oo lava fo’i i le sponsor e le o fa’amalosia lona tiute i lalo o le tulafono, e ala i lona toe faafo’iina lea o le tagata mai fafo sa ia aumaia i totonu o le atunu’u.

 

O nisi o mataupu ogaoga e pei ona taua e ni isi o faipule ua molimauina i le atunuu i le taimi nei, e le gata ua aafia ai tagata mai fafo e leai ni pepa nofomau, ae ua aafia atu ai fo’i ma sponsor ona ua fa’aoolima i ai tagata mai fafo.

 

O se mataupu lata mai e pei ona molia ai se ali’i i le tulafono, i lona taumafai lea e fa’aoo le oti i lana sponsor a o moe o ia, e mafua mai i se vevesi na alia’e mai i le siaki a le FEMA.

 

O le masina na te’a nei na taofia ai e leoleo le ali’i o Vaimoe Seumanu ma molia i molaiga mamafa e 2 o le taumafai e faaoo le oti i se tagata, atoa ai ma le faaoolima i le tulaga muamua. E $100,000 le tupe ua fa’atulaga e totogi ona fa’atoa mafai lea ona tatala Seumanu i tua mai le toese i Tafuna.

 

O le ita o Seumanu i lana sponsor ina ua le maua sana vaega i le siaki e $11,000 mai le FEMA mo mea faaleagaina i le afa o Gita, na ia manatu ai loa e faaoo le oti i lana sponsor. Na taua i faamaumauga a le fa’amasinoga le aga’i atu o Seumanu ma maua atu lana sponsor o loo moe i totonu o le fa’asee o lona fale, ona ia tago lea i le agaese ma taumafai e sesele ai lona ua (tulou) ma le faamoemoe ia oo ai le maliu ia te ia, peita’i e le i taunu’u lea fuafuaga.

 

O lo o taofia pea Seumanu i le toese i Tafuna e faatali ai le aso e toe tula’i ai i luma o le fa’amasinoga.

 

Saunoa afioga i Faipule e faapea, o ituaiga gaioiga faapenei o loo aafia ai tagata mai fafo ma a latou sponsor, o se tulaga ua tatau ai i le ofisa o femalagaaiga ona mata’itu lelei le faamalosia o le tulafono ina ia mautinoa, e le toe tulai mai nei ituaiga faalavelave i le lumana’i.