Ads by Google Ads by Google

Fesiligia Faamasinoga ta’iala a le malo mo i latou e a’afia i solitulafono


[ata: foa'i]
ausage@samoanews.com

E ui o lea ua talia e le Faamasinoga Maualuga le talosaga a se ali’i Loia o loo tu’uaia i lona ave fa’agaoi o se vaega tupe e silia i le $121,000 mai le Faalapotopotoga o le Hope Dialysis Center, e malaga atu ai i Amerika mo ana talavai, peita’i o lea ua fa’atulaga e le Fa’amasinoga se isi iloiloga mo lenei mataupu, e talanoaina ai le mataupu i poloaiga mai le Ofisa o Femalagaaiga e taofia ai i latou o loo molia i tulafono mai lo latou tuua o le atunu’u.

 

O le mae’a ai ona iloilo e le Fa’amasinoga o pepa uma sa tuuina atu e le susuga a Richard deSaulles ma lana loia fautua ia Marcellus Talaimalo Uiagalelei, na tu’uina mai ai loa e le afioga i le ali’i Fa’amasino ia Fiti A. Sunia lana poloaiga e faataga ai deSaulles ona malaga ese atu ma le atunu’u.

 

O le po o le aso 11 o Iulai, 2019 na tuua ai e deSaulles le atunu’u mo ana talavai i Kalefonia, ma le fa’amoemoe e tatau ona toe taunu’u mai i le atunu’u i le aso 12 o Oketopa.

 

O le aso 1 o Iulai na faia ai le ulua’i iloiloiga o lenei mataupu, peita’i na toe tolopo mai e le Fa’amasinoga i le aso 10 o Iulai, ona sa i ai nisi o pepa na finagalo le Fa’amasinoga e fia silasila i ai a o le i tuuina mai lana fa’aiuga aloaia.

 

Ina ua toe valaau la le mataupu a deSaulles i le aso Lulu na te’a nei, na fa’ailoa ai loa e Sunia le tauaao lea e le Fa’amasinoga o pepa uma sa mana’omia, e aofia ai se ripoti mai le Foma’i o le a faia togafitiga ma le taotoga a le ua molia, e faamaonia mai ai taimi ma le aso o le talavai; o tusi mai tagata sa fesoasoani i le totogiina o le tupe o lo o tatala ai le ua molia i tua, atoa ai ma le faamaoniga o le totogiina lea e le ua molia i le tinoitupe e $20,000 e faamaonia ai lona toe fo’i mai i le atunu’u.

 

A o le i tuuina atu le fa’aiuga a le fa’amasinoga, na toe fesili le afioga a Sunia i le loia a le malo pe i ai se isi vaega na te fia faaopoopo e tusa ai o le talosaga a le ua molia.

 

Na taua e le ali’i Loia Sili lagolago ia Doug Lowe le tumau pea o lona tete’e i le talosaga a le ua molia e malaga atu ai i fafo mo lana talavai, ona o le popolega o le malo o lo o i ai, i le ono mafai lea ona sola ese deSaulles mai le atunu’u pe a malaga atu i fafo.

 

Na fesili Sunia poo a faamaoniga e lagolagoina ai le mau tete’e a le malo. Ae na tali Lowe e fa’apea, e i ai le talitonuga o le malo, e le toe fo’i mai deSaulles pe afai e fa’ataga na te tuua le atunu’u, ona o lea ua i ai uma i Amerika lona aiga, e le o toe i ai lava se isi o totoe i Amerika Samoa nei.

 

Na taua e Lowe e fa’apea, e le o toe totoe lava se mea e ono mafai ai ona taofia deSaulles i Amerika Samoa. E le gata ua tapuni lona Ofisa Loia sa fa’atuina, ua toe malaga uma e se atu lona to’alua ma lona aiga, ua toe lava o ia o lo o totoe i le teritori.

 

“Na pau lava le itu lea o lo o taofia ai deSaulles i totonu o Amerika Samoa, o lana mataupu o lo o fa’agasolo i luma o le Fa’amasinoga i le taimi nei,” o le finau lea a Lowe.

 

Na faauilavea Uiagalelei ma faamanino i le Fa’amasinoga mea uma ua tuuina atu e le la itu e faamaonia ai le malaga a deSaulles mo lana talavai ma toe fo’i mai.

 

Na taua e Uiagalelei e fa’apea, o lea ua tuuina mai le tusi faamaonia mai le foma’i mo le taotoga a deSaulles, o lea ua totogi le tinoitupe e $20,000, o lea fo’i ua tuuina mai tusi mai tagata sa latou fesoasoani i le totogiina o le tupe e tatala ai deSaulles i tua, o mea uma ia e lagolagoina ai le mafua’aga autu o le naunau o le ua molia e malaga i Kalefonia mo lana talavai.

 

“Ou te le iloa la poo le a tonu le itu lea e tumau ai le finau tete’e o le malo,” o le saunoaga lea a Uiagalelei.

 

Na toe saunoa Lowe ma ia taua e fa’apea, o se tasi o mataupu o lo o atugalu i ai le malo, o le toe totogiina lea o le tupe a le o lo o a’afia i lenei mataupu. Na taua atili e Lowe e fa’apea, ua uma ona la talanoa ma le o loo aafia i lenei mataupu, o loo faailoa mai fo’i lona atugaluga o loo i ai i le le mafai lea ona toe totogi atu o lana tupe pe afai ae sola ese le ua molia ma le atunu’u.

 

Na faaiulavea Sunia ma ia faailoa ia Lowe e fa’apea, e le o se tiute lena o le Fa’amasinoga o le taumafai e ao mai ni aitalafu.

 

O le mae’a ai o faafinauga a itu e lua, na tuuina atu ai loa e Sunia lana faaiuga e talia aloaia ai le talosaga a deSaulles.

 

Ae ina ua fesiligia e Sunia ia Lowe pe sa i ai sa latou poloaiga e taofi mai ai deSaulles mai lona tuua o le atunu’u, na tali Lowe, e leai se poloaiga na tuuina atu.

 

Na toe fesili Sunia pe aisea, ae na toe tali Lowe, e le mafai e le Ofisa o le Loia Sili ona tuuina atu ni poloaiga e taofia ai ni sitiseni Amerika poo Nesionale fo’i e faasa ai ona latou tuua le atunu’u, pe afai o lo o molia i latou i ni solitulafono.

 

Na toe fesili fia malamalama Sunia, po o ai na faia lea faaiuga ae na tali se tasi o loia a le malo sa i ai fo’i i totonu o le potu fa’amasino ia Christy Dunn e fa’apea, o le faatonuga sa tuuina atu i le Loia Sili a le malo.

 

Sa fiamalamalama atili le Fa’amasinoga, poo le faaiuga lea e le mafai ai ona tuuina atu ni tusi taofi mo sitiseni ma Nesionale pe afai o lo o i ai ni solitulafono fa’asaga ia te i latou, e apalai fo’i i soo se taimi, tusa lava pe ua mae’a ona tuuina mai se poloaiga a le Fa’amasinoga e faasa ai ona tuua e i latou nei le atunu’u.

 

Na tali Dunn e fa’apea, tusa lava pe ua i ai se poloaiga a le fa’amasinoga e faasa ai i latou nei ona tuua le atunu’u, e le mafai lava e le Ofisa o le Loia Sili ona latou tuuina atu se tusi e taofia ai i latou nei mai lo latou malaga ese atu ma le atunu’u.

 

O le aso 19 o Iulai lea ua fa’atulaga ai le iloiloga faapitoa o lenei mataupu, ma ua poloaina e Sunia loia a itu e lua ina ia sailiili atili e uiga i lenei mataupu.

 

O loo tu’uaia e le malo ia deSaulles i le moliaga o le gaoi ma le ave fa’agaoi o ni tupe sa tuuina atu i lalo o lana vaavaaia.