O le mataupu e fa’atatau i se Tina mai le atunu’u o Filipaina lea ua musu e tuua le atunu’u, e ui ua le mafai ona toe fa’afou lona pepa (ID) e fa’aauau ai ona nofo ma galue i Amerika Samoa, ua fesiligia ai e le sponsor a lea Tina auala o lo o fa’amalosia ai tulafono a le Ofisa o Femalagaaiga.

E talitonu le Samoa News, o le mataupu e fa’atatau i le Tina lenei, o lo o avea ma ogatotonu o talanoaga o loo fa’agasolo i le taimi nei i le va o le sponsor, o le Ofisa o Femalagaaiga atoa ai ma le Komiti Fa’afoe.

O le mataupu na alia’e mai ina ua mae’a le aoga o le ID e mafai ai ona galue lea Tina i Amerika Samoa, ma poloaina ai loa o ia na te tuua le atunu’u i le aso Lua o le vaiaso nei ina ua mae’a ona totogi e lana sponsor lona pasese e toe fo’i atu ai i Filipaina. Ae tusa ai o ripoti ua maua e le Samoa News, ua musu le Tina e tuua le atunu’u.

O le Tina lenei ua tusa ma le 10 tausaga o galue i se pisinisi su’isu’i e pulea e se tagata faipisinisi i Amerika Samoa. O le pule o le pisinisi su’isu’i o loo sponsor ina le Tina lenei mai Filipaina. Peita’i ane o le fa’afitauli ua tula’i mai, ua mana’o le Tina lenei e sui lana galuega, ma ia faia ai loa le gaioiga e alu ese mai ai i lana sponsor, ae alu ua faigaluega i le pisinisi a le ulugali’i fou lea ua ia manatu e fai ma ana sponsor.

Ina ua mae’a le aoga o le ID a le Tina lenei i le masina o Me na mavae atu, na aga’i atu ai loa le sponsor ma faailoa i le Ofisa o Femalagaaiga le tulaga ua i ai pepa nofomau a le Fafine, fa’atasi ai ma lana talosaga ina ia toe fa’afo’i loa o ia i lona atunu’u.

Na tuuina atu e le sponsor se tusi i le Pulesili o le Ofisa o Femalagaaiga, atoa ai ma le Ta’ita’ifono o le Komiti Fa’afoe o Femalagaaiga, e fa’ailoa ai le tulaga atoa o le mataupu, fa’atasi ai ma lana talosaga ina ia fa’amalosia loa le tulafono ae toe fa’afo’i le Tina i Filipaina, ona o lea ua le talafeagai ma tulafono tau femalagaaiga lona aumau ai i le atunu’u.

Na fa’amaonia mai e le Taitaifono o le Komiti Faafoe o Femalagaaiga i le Samoa News, le tauaaoina lea e le Komiti Fa’afoe o le tusi mai le sponsor, atoa ai ma le fa’amaninoina atoa o le mataupu e pei ona tula’i mai, aemaise ai le tatau lea ona toe fa’afo’i o le Tina i lona atunu’u, ona o lea ua le toe aoga lona pepa e nofomau ai i Amerka Samoa.

E le i finagalo le Ta’ita’ifono na te tuuina mai ni isi fa’amatalaga auiliili e uiga i lenei mataupu. Peita’i na taua e se totino o le Komiti Fa’afoe, e 20 aso lea ua tuuina atu i le Tina na te tuua ai Amerika Samoa. Afai e leai, o le a fa’amalosia loa le tulafono ma aveese fa’amalosi ai o ia mai le atunu’u.

Na taua e le sui o le Komiti Fa’afoe e fa’apea, e le tau toe fesiligia lava se isi fa’amatalaga e uiga i lenei mataupu. O lea ua manino le mata o le vai, ua mae’a le aoga o le pepa e fa’ataga ai ona nofo le Tina i Amerika Samoa, lona uiga, ua avea o ia ma tagata ua ova aso e nofo ai i le atunu’u.

“O lea ua manino mai le mataupu, ua le usitaia e le Tina lea tulafono tau femalagaaiga. Lona uiga la, ua tatau i le Ofisa o Femalagaaiga ona fa’atino la latou tiute e ala i le fa’amalosia o le tulafono. E le mafai e le Komiti Fa’afoe ona sopola’a atu i le tiute a le Ofisa o Femalagaaiga,” o le molimau lea a le sui o le Komiti Fa’afoe.

Ina ua fesiligia poo fea vaega o le tulafono ua le usitaia e le Tina, ae na saunoa le sui o le Komiti Fa’afoe, e le gata ua uma le aoga o lona pepa e nofo ai i Amerika Samoa, a o lea fo’i ua sui le galuega e galue ai e aunoa ma se fa’atanaga mai le Komiti Fa’afoe.

Ae na taua e se sui sooupu e fesoota’i i le Tina o lo o autu i ai lenei talanoaga, e le o le Tina lea na musu e fa’afou lona ID, o lana sponsor na musu e toe fa’afou lona ID. Na taua fo’i e le sui lea e fa’apea, ua mae’a ona i ai le loia e fesoasoani i le mataupu a le Tina, ma ua manatu fo’i lea Tina e finau lana mataupu i luma o le Fa’amasinoga.