Ads by Google Ads by Google

Fautuaina le au solitlulafono ina ia tau mamao ese a le ‘ava malosi

ausage@samoanews.com

Ua fautuaina e le afioga i le ali’i Fa’amasino ia Elvis P. Patea ni ali’i se to’alua na ta’usala e le Fa’amasinoga i moliaga o le faaoolima le fa’atupu vevesi, e le tatau ona la toe tagofia le ‘ava malosi i totonu o le 12 masina lea ua faanofovaavaaia ai i laua.

 

“E leai se aoga o le ‘ava malosi i o oulua olaga,” o le saunoaga lea a Patea i le taimi na lau ai fa’asalaga a i laua ua nofosala i le vaiaso na te’a nei.

 

“Ia lua tau mamao mai le tagofia o le ‘ava malosi, e le gata e mativa ai le aiga ae ono oo atu ai o oulua olaga i se isi tulaga e sili atu ona matuia i le lumana’i.”

 

O i laua e to’alua e aofia ai Falaniko Apelu ma Justin Alefa.

 

Na ulua’i tuuaia e le malo Apelu i moliaga e 3 e aofia ai le faaoolima i le tulaga tolu. Ae i lalo o le maliliega na sainia e Alefa ma le malo, na malie ai le ua molia e tali ioe i lea moliaga.

 

I le talia ai e le Fa’amasinoga o le maliliega, na solofua ai loa e le Fa’amasinoga moliaga sa totoe ai i le tagi a le malo.

 

Ina ua fesiligia e le Fa’amasinoga ia Apelu e fa’amatala lana gaioiga sa faia, na taua ai e le ua molia e fa’apea, i le po o le aso 23 o Aokso 2018, sa ia faaoolima ai i le ali’i o Lafitaga Lavea’i e ala i lona ta tu’iina o ona foliga ma kiki lona papa tua ao ta’atia o ia i lalo.

 

Na taua atili e le ua molia e fa’apea, o lona ita tele ia Lavea’i na mafua ai ona ia soli le tulafono.

 

Na taua e le itu a le malo e fa’apea, e ui o lea ua tali ioe Apelu i le moliaga mamafa o le faaoolima i le tulaga tolu, peita’i o lana gaioiga sa faia i lea aso e fai lava si matuia.

 

Na taua e le loia a le malo ia Jason Mitchell e fa’apea, i le aso e pei ona taua, na alu ai Apelu e saili Lavea’i ina ua ia maua le tala na fasi e Lavea’i le atali’i o lona uso matua. Na maua atu e Apelu ia Lavea’i o lo o taalo mai i le Taaloga Volipolo sa faia i luma o le fale o Lavea’i.

 

Na amata le vevesi i se tauga upu na tula’i mai i le va o Apelu ma Lavea’i, ae na mafai lava ona toe teuteu ina ua faatoese Lavea’i ia Apelu. Na taua e Lavea’i ia Apelu, o le vave o lona ita na mafua ai ona ia fasi le atali’i o lona uso matua.

 

E ui na fa’atoese le na a’afia ia Apelu, ae na taua e le malo le vaaia pea o le loto tiga ma le ita faamoemoe o Apelu. I ni nai minute mulimuli ane ai a o fa’agasolo pea le Taaloga Volipolo, na alu atu ai loa Apelu ma faapo Lavea’i e ala i lona ta tu’i o ona foliga ma pau ai loa Lavea’i i lalo.

 

A o ta’atia Lavea’i i lalo, na kiki e Apelu lona papatua ma lona fatafata. O tagata sa i ai i le Volipolo na laga atu ma taofi le ua molia ma logo ai loa Leoleo.

 

Ina ua maua lona avanoa, sa faatoese ai loa Apelu i le Fa’amasinoga e tusa ai o lana gaioiga sa faia. Na faatoese fo’i Apelu ia Lavea’i ma lona aiga e tusa ai o le fa’alavelave na tula’i mai i lo la va. Na taua e le ua molia e fa’apea, o po e 3 na taofia ai o ia i le Falepuipui ina ua fa’atoa mae’a ona loka o ia e Leoleo, ua ia a’oa’oina ai se lesona taua, e le o se nofoaga lelei le Toese mo ia.

 

Na taua e loia a le malo i le Fa’amasinoga e fa’apea, sa matua ova le ‘ona o Apelu i le aso na ia fa’atinoina ai le solitulafono.

 

I le mataupu a Iafeta, na ulua’i tu’uaia o ia i moliaga mama e tolu e aofia ai le tete’e atu i Leoleo a o taumafai e pu’e fa’apagota o ia. Ae i lalo o se maliliega na sainia e Iafeta ma le malo, lea fo’i na talia e le Fa’amasinoga, na tali ioe ai le ua molia i lea moliaga.

 

I le tali ioe ai o Iafeta i le moliaga e pei ona ta’usala ai o ia, sa ia ta’utino ai e fa’apea, i le aso 25 o Iulai 2018 i Nu’uuli, sa ia faia ai ni gaioiga e save’u ai le nonofo filemu o aiga tuaoi, e ala i lona laulauvavale ma fa’asese tagata o le aiga latou te tuaoi a o ‘ona o ia.

 

Na taua e le loia a le malo ia Mitchell e fa’apea, o le vevesi na tula’i mai ina ua aga’i atu Iafeta ma folasola lona tafana o tagata o le aiga latou te tuaoi, ina ua ia ita i le taufeai o le ta’ifau a le aiga.

 

Na fiu tagata o le aiga e tuli ese Iafeta mai luma o le latou fale, ae sa fa’aauau pea ona faia e le ua molia folafolaga tau fa’amata’u i le aiga.

 

Na iloa loa e Iafeta ua taunu’u le ta’avale a Leoleo, sola ese loa mai luma o le fale ae aga’i atu i tua i le pogisa ma fiu ai Leoleo e tau saili o ia. I le taeao po lava o le aso na sosoo ai, na toe aga’i atu ai Leoleo i le fale o Iafeta, ma maua atu ai o ia o lo o moe i tua o lana ‘shack’.

 

A o aga’i atu Leoleo ma Iafeta i le Ofisa o Leoleo i Tafuna, na talosaga le ua molia e ave o ia i le Falema’i ona o lo o ia lagonaina le tiga o lona ulu faapea ai ma lona tino. Ina ua taunu’u i le Falema’i, na toe sola ese ai fo’i le ua molia mai lalo o le vaavaaiga a Leoleo.

 

Sa molimauina e Leoleo le ‘ona o Iafeta i le taimi na latou taofia faapagota ai o ia mai lona fale i Nu’uuli.

 

Ina ua maua lona avanoa, sa ia fa’atoese ai i le Fa’amasinoga e tusa ai o lana solitulafono sa faia. Na taua e le ua molia, ua mae’a ona fa’atoese ona matua i le latou aiga tuaoi, ma ua talia lelei fo’i e le aiga le faatoesega.

 

Sa ia ta’utino atili e fa’apea, na te le toe tagofia le ‘ava malosi pe na te toe soliina fo’i le tulafono.

 

O ni isi o tuutuuga o le fa’asalaga fa’anofovaavaaia a i laua nei e ta’i 12 masina, e aofia ai le totogi o le salatupe e ta’i $100 a le tagata, faasa ona toe tagofia le ‘ava malosi poo fualaau fa’asaina, ma ia auai i aoaoga e fesoasoani ai i le leaga o le ‘ava malosi.

 

Ua fautuaina fo’i i laua ina ia fa’aauau pea ona galulue i galuega o lo o la galulue ai, asiasi i le Ofisa Faanofovaavaaia fa’atasi i le masina, ma aua nei o la toe solia se tulafono a le malo.