Ads by Google Ads by Google

Fautua Savali i Faipule e fa’asoa atu na o mataupu e i ai faamaoniga


[ata: foa'i]
ausage@samoanews.com

Ua fautuaina e le afioga i le Fofoga Fetalai o le maota o sui ia Savali Talavou Ale afioga i Faipule o le maota, ina ia fa’asoa atu i luma o le maota na o mataupu e i ai fa’amaoniga, ae le o mataupu e maua mai i tala fa’alogo o lo o salalau solo i le ea.

 

“Aumai mau e fa’amaonia ai mataupu o loo outou saunoa mai ai, ae aua le soona aumaia mataupu e leai ni fa’avae ona e le logo lelei i le silasila atu a le maota,” o le saunoaga lea Savali e tali fuaitau atu lea i ni isi o mataupu na laga e le afioga i le ali’i Faipule mai le Itumalo o Manu’a #1 ia Vesi Talalelei Fautanu Jr, i le ulua’i aso na toe tauaofia ai le Fono Faitulafono talu mai lana malologa e 4 vaiaso na fa’atoa mae’a atu nei.

 

Saunoa Vesi e fa’apea, o ni isi o mataupu o lo o tu’u fesili ai le atunu’u, e le gata i le tuai ona maua o lafoga a tagata, ae o le tele o tupe o lo o fa’aalu i nei mau konekarate o lo o fausia galuega eseese a le malo.

 

I le tulaga o lafoga, na saunoa ai Vesi e fa’apea, o lea ua la’asia le 3 masina talu ona uma ona faila lafoga a tagata, ae foliga mai o lo o nonofo fa’atali pea le atunuu i se tali mai le malo i le taimi tonu e maua ai siaki o lafoga.

 

“E sili pe a saili ane e le maota poo le a le tulaga sa’o o lafoga, pau fa’amatalaga ua maua fai mai e lei taunu’u mai tupe mai fafo. Talosia e le o pasese mai i le fa’afitauli na tapunia ai le malo feterale,” o le saunoaga lea a Vesi.

 

I tulaga i konekarate a le malo, na saunoa ai Vesi e fa’apea, o le isi lenei mataupu o lo o tele i ai fesili a tagata. E le gata i le to’atele o tagata o lo o fa’a faigaluega e le malo i lalo o konekarate, ae faapea fo’i i galuega a le malo o lo o fa’atino e konekarate fau fale a le atunu’u.

 

“Saili ane poo le a se faiga sa’o o nei konekarate, o le isi lea vaega tupe tele o lo o manu’a ai le malo, ona o nei konekarate o lo o fa’aauau pea ona fa’atino e aunoa ma ni tapula’a, ae ua tele fo’i tupe ua soona fa’aalu e totogi ai nei konekarate ae le o mautinoa po o tonu ma sa’o auala o lo o fa’atinoina ai.”

 

I tulaga o konekarate, na saunoa ai Savali e fa’apea, ua uma ona fa’ataoto tulafono ma aiaiga e fai ai tulaga nei i lalo o le vaavaaiga a le malo. Sei vagana la ua i ai ni isi mataupu matuia o lo o tutupu o lo o silafia e Vesi, o ituaiga mataupu la ia e tatau ona iloilo e le maota.

 

“E le o logo lelei tulaga o mataupu o lo o talanoa mai ai le afioga i le ali’i Faipule. A tatou o e su’esu’e lelei tulaga ia, ia aumai ma ni mau fa’amaonia e lagolagoina ai a outou saunoaga, ina ia mafai ona fa’atino galuega a le maota, ae aua le soona aumaia mataupu faapenei e leai ni fa’avae toe leai ni mau fa’amaonia e lagolagina ai,” o le saunoaga lea a Savali.

 

Saunoa atili Savali e fa’apea, e i ai le matafaioi a le Fono e su’esu’e ma saili ai mataupu fa’apenei, ae afai o lo o tutupu ni tulaga faapea, e sili la pe a aumai i luma o le maota ma aumai fa’atasi ai ma fa’amaoniga.

 

“O le fautuaga mo a outou afioga i faipule, e le o se Fono lenei tou te aumaia i ai ni tala  tou te fa’alogo solo ai mai le auala. O la outou tiute o le puipui malu lea i le paia ma le mamalu o le Fono a le atunu’u, ae le o le maua lea o ni tama’i fa’amatalaga ona soona aumai lea i luma o le maota. Sailiili muamua pe faamaonia tulaga e pei ona atugalu i ai a outou afioga ona fa’atoa aumai lea i luma o le maota”.

 

O ni isi o mataupu sa laga i le maota o sui, o tulaga i fa’asea fa’asaga i le falema’i, o le ofisa o Leoleo faapea ai ma le Ofisa o Fa’asalalauga a le malo, le KVZK-TV ma lana auaunaga.

 

Saunoa le afioga i le ali’i Faipule ia Gafatasi Afalava e fa’apea, o se tasi o mataupu o lo o tu’u fesili ai pea lona afioaga i Aoloau, o le mafua’aga ua le mafai ai e le Ofisa Fa’asalalau ona toe malaga atu i nu’u ma afioaga i tua e pu’e mai ai sauniga o faigalotu a Ekalesia lea o lo o fa’asalalau i le Aso Sa, ae ua tu’u tasi lava le faaiuga e pu’e uma i le latou ofisa autu i Utulei.

 

E ui o se mataupu ua mae’a ona lalafo i ai le maota, ae na toe talosagaina lava e Gafatasi le Ta’ita’i o le Komiti o le Sailiga o le Tamaoaiga o le malo, afioga Faimealelei Anthony Fu’e Allen mo se avanoa e toe fa’atulaga ai se isi iloiloga mo lenei mataupu. O le aso Faraile o le vaiaso nei lea ua fa’atulaga e faia ai lea iloiloga.

 

O le afioga i le ali’i Faipule ia Vailoata E. Amituana’i na ia fesiligia le auaunaga a le falema’i o le LBJ i Faga’alu.

 

Saunoa Vailoata e fa’apea, e to’atele ni isi o le atunu’u ua fesiligia le mafua’aga ua ala ai ona atoa le 3 vaiaso o pe le ea malulu o le potu o lo o taofia ai Fanau laiti i le falema’i, ae o lo o fa’aauau pea ona fa’aaoga le auaunaga a lea vaega o le falema’i mo le atunu’u.

 

E o o fo’i i ta’avale a le EMS o lo o la’u mai ai le mamalu o le atunu’u, na taua e Vailoata le fesiligia e le atunu’u o le mafua’aga ua ala ai ona fa’aaoga Van e la’u mai ai le mamalu o tagata gasegase, ae ua le fa’aaoga ta’avale sa masani ona fa’aaoga i aso ua mavae.

 

O le afioga i le ali’i Faipule ia Loia Gutu na ia talosagaina se iloiloga ma le afioga i le Komesina o Leoleo, ona o le mataupu i le tapunia pea o le Ofisa o Leoleo i Fagaitua, lea e aofia ai le auaunaga a le Fale Fuimu ma le EMS.

 

Saunoa le afioga a Loia e fa’apea, sa i ai se maota o se tasi o aiga a lona itumalo na afaina i le malaia (mu) i le masina na te’a nei, e taunu’u atu le ta’avale fuimu ua liu efuefu uma le maota o le aiga. I lona talitonuga, ana i ai se ta’avale fuimu i Fagaitua, atonu e mafai ona maua se fesoasoani mo lenei aiga.

 

Saunoa atili Loia e fa’apea, ua maua i fa’amatalaga, o le le lava o le aufaigaluega le mafua’aga ua ala ai ona tapunia le auaunaga a le Ofisa o Leoleo, Fale Fuimu ma le EMS i Fagaitua.

 

Ae na ia saunoa e fa’apea, e sili atu le taua o le soifua o tagata na i lo ni isi lava mea o lenei olaga.

 

I le mataupu e fa’atatau i sauniga lotu o lo o pu’eina e le KVZK-TV, na saunoa ai Savali e fa’apea, e tatau ona sailiili lelei le maota i auala e tali ai mataupu faapenei, nai lo le fai ma aami afioga i Fa’atonu mo iloiloga, ae le o i ai lava se tulaga mautu o tino mai mo nei mataupu taua.