Ads by Google Ads by Google

Falepuipui le Tina na maua i ai fualaau fa’asaina

ausage@samoanews.com

E 180 aso lea ua fa’asala ai e le Fa’amasinoga Maualuga se Tina e taofia ai i le Toese i Tafuna, ina ua fa’amaonia e le Fa’amasinoga i le masina na te’a nei le moliaga o lona umia fa’asolitulafono o vaega o fualaau fa’asaina sa tu’uaia ai o ia e le malo.

 

O le fa’asalaga faa falepuipui ua tuuina atu e le Fa’amasinoga ia Christina S. Malauulu, 48 tausaga le matua o lona soifua, o se tasi lea o tuutuuga o lana nofovaavaaia e 5 tausaga.

 

O le tama’ita’i loia sili lagolago ia Christy Dunn na tula’i mo le itu a le malo, ae o le ali’i loia fautua ia Michael White na tula’i mo Malauulu, lea sa taofia pea lava i le Toese talu mai le taimi na pu’e fa’apagota ai o ia e Leoleo, ina ua le mafai ona ia totogi le tupe e $5,000 sa fa’atulaga e tatala ai o ia i tua.

 

Na ulua’i molia e le malo ia Malauulu i le moliaga pito sili ona mamafa, o lona umia fa’asolitulafono lea o vaega o le pauta fa’asaina o le aisa.

 

Ae i lalo o se maliliega na sainia e Malauulu ma le malo, lea fo’i na talia e le Fa’amasinoga Maualuga, na malie ai le malo latou te toe faia se teuteuga i le mamafa o le solitulafono na ulua’i molia ai Malauulu, ina ia fa’ailoa ai le moliaga feololo o le umia faasolitulafono o vaega o le pauta fa’asaina o le aisa, lea e mafai ona fa’asala ai se tasi i le toese mo le umi e mafai ona oo atu i le 5 tausaga, pe fa’asala foi i le salatupe e mafai ona oo atu i le $5,000, poo le fa’asala fo’i i fa’asalaga uma ia e lua.

 

I le tali ioe ai o Malauulu i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le masina o Iuni o le tausaga nei, sa ia umia faasolitulafono ai vaega o le pauta fa’asaina o le aisa, ina ua taofia a Leoleo le ta’avale mautotogi (rental car) sa malaga ai.

 

Ina maua lona avanoa mai le Fa’amasinoga, na fa’atoese ai loa le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i fai sona aoga i lona aiga.

 

Na taua atili e le ua molia e fa’apea, o le sese o le filifiliga sa ia faia atoa ai ma aafiaga tau i fualaau fa’asaina na aafia ai lona olaga, o isi ia o mafua’aga ua ala ai ona fa’aletonu lona olaga.

 

A o lei tuuina atu faafinauga a Loia mo se fa’asalaga mo Malauulu, na fesili le afioga i le ali’i Fa’amasino Sili ia Michael Kruse i le Tina ua molia, e foliga mai e masani le Fa’amasinoga ia te ia.

 

“Sa i ai se isi mataupu na aumai ai oe lata mai i luma o le Fa’amasinoga,” o le fesili lea a Kruse ia Malauulu.

 

Na tali le ua molia e fa’apea, na pau lana iloiloga lata mai na mafua ai ona tula’i i luma o le Fa’amasinoga, o lana talosaga mo se fa’atanaga e malaga atu ai i Hawaii e auai i le maliu o si ana tama teine na maliu ona o se gasegase sa a’afia ai o ia. O lea talosaga, sa teena e le Fa’amasinoga.

 

Na finau le ali’i loia fautua ia White i le Fa’amasinoga mo se fa’asalaga faanofovaavaaia mo Malauulu. Saunoa White e fa’apea, e ui i le matuia o le solitulafono ua ta’usala ai lenei Tina, peita’i e atagia mai i le Ripoti a le Ofisa Faanofovaavaaia, e tele le avanoa e mafai ai ona toe suia lona olaga, pe afai ae auai o ia i ni aoaoga fa’a faufautua e fesoasoani ai i le fa’afitauli o lona tagofia lea o fualaau fa’asaina o lo o a’afia ai o ia.

 

Saunoa atili White e fa’apea, e le na o Malauulu se tagata ua oo i ai aafiaga faapenei, o le aafia lea o le olaga ona o aafiaga tau i fualaau fa’asaina. Peita’i o le auala e mafai ona foia ai lea fa’afitauli, o le galulue fa’atasi lea ma le Ofisa Faanofovaavaaia ina ia mautinoa, e le toe aafia lava lona olaga i nisi aafiaga i le lumana’i.

 

Na lagolagoina e le loia a le malo ia Dunn le faafinauga a White, mo se fa’asalaga faanofovaavaaia mo Malauulu. Na taua e Dunn e fa’apea, e talitonu le malo, e mafai ona toe suia le olaga o lenei Tina pe afai ae auai i ni aoaoga faa faufautua e fesoasoani ai i le faafitauli o lona tagofia o fualaau fa’asaina.

 

A o le i tuuina mai le fa’asalaga a le Fa’amasinoga, na saunoa Kruse e faapea, o le mataupu e pei ona ta’usala ai le ua molia, na tula’i mai ina ua taofi e Leoleo se ta’avale sa ia fa’afoeina i luga o le alatele a le malo.

 

Ina ua saili e Leoleo totonu o le ta’avale, sa latou maua ai loa se tama’i pepa iila o lo o i ai vaega o le pauta fa’asaina o le aisa. Ina ua fesiligia e Leoleo le ua molia e uiga i le pepa iila sa i ai fualaau fa’asaina, sa ia fa’ailoa i Leoleo, o ia e ana le pepa sa maua i le ta’avale.

 

E pei ona taua e le malo i le latou tagi e fa’apea, a o le i maua e Leoleo le telefoni e fa’atatau i le ta’avale o lo o fa’afoeina e le ua molia, o le taimi lea ua leva ona i ai le suafa o Malauulu i le lisi o tagata o loo galulue Leoleo e saili ma mata’ituina, ona sa masalomia le i ai o sona sootaga i le ali’i pagota lea o loo tu’uaia sa sola i tua ma ia faaaoga se fana e faaoo ai manu’a i se isi ali’i i Leone i le 2 tausaga talu ai.

 

E 5 tausaga na manatu le Fa’amasinoga e fa’asala ai Malauulu i le toese, o lea faasalaga faa falepuipui ua faamalumalu lona tuliina, ae o le a faanofovaavaaia o ia mo le 5 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o masina e 20 i le Toese i Tafuna, peita’i, o le a lava nao aso e 180 na te tuliina i le toese (tusa lea e 6 masina), ae o le umi o loo totoe ai o lana faasalaga faa falepuipui e 20 masina, o le a taofi lona tuliina, se’i vagana ua toe tuuina atu se isi poloaiga a le Fa’amasinoga.

 

Ua poloaina fo’i e le Fa’amasinoga ia Malauulu e aua ne’i ona toe tagofia le ‘ava malosi poo fualaau fa’asaina, e mafai fo’i ona suesueina lona tino i masina ta’itasi ina ia mautinoa ai, o lo o ia usitaia lenei tuutuuga a le Fa’amasinoga.

 

O le saunoaga mulimuli a le Fa’amasinoga sa tuuina atu ia Malauulu e fa’apea, “Siaula, ua tele le aafiaga o lou olaga ona o le faafitauli o lou tagofia lea o le pauta fa’asaina o le aisa.”

 

Na tali Malauulu fai mai, “Faatoese atu i lau afioga i le Fa’amasino Sili.”

 

Sa toe saunoa Kruse e fa’apea, “Aua e te tau fa’atoese mai i le Fa’amasinoga, aua afai e te le usitaia poloaiga ua tuuina atu o lau Faanofovaavaaia, o le a poloaina loa oe e te tuliina tausaga e 5 i le Toese i Tafuna. Ia e mafaufau loloto i ai i le tulaga lena.”

 

O le tausaga e 2017, na faasala ai e le Fa’amasinoga Faaitumalo ia Malauulu e nofovaavaaia mo le 6 masina, ina ua ta’usala o ia i le moliaga mama o le fa’atupu vevesi i nofoaga faitele.

 

Na taua e le malo i le latou tagi e fa’apea, na tu le ta’avale a Malauulu ma ia fesili atu i ni ali’i sa savavali i luga o le alatele, poo ai o i latou lea na faasalalauina le tala i totonu o le nu’u o ia o loo tuleiina fualaau fa’asaina. Na taua e le malo le se’i e Malauulu o lana fana, le ituaiga ol e .45 ma faafefe ai ali’i nei.