Ads by Google Ads by Google

Falepuipui le Tina na ia gaoia le silia $118,000 mai le Forsgren Ltd. Inc


[ata: foa'i]
ausage@samoanews.com

E 9 masina lea ua fa’asala ai e le Fa’amasinoga Maualuga le Tina na ia ave fa’agaoi le silia i le $118,000 mai le kamupani a le Forsgren Ltd. Inc sa galue ai, ina ua ta’usala o ia i le moliaga mamafa o le gaoi.

 

O le vaiaso nei na tula’i ai Jennifer Atafua i luma o le fa’amasinoga mo le tuuina atu o le fa’asalaga. O le ali’i Loia tua ia Marcellus Talaimalo Uiagalelei na tula’i mo Atafua, ae o le tama’ita’i loia sili lagolago ia Christy Dunn na fai ma sui o le malo.

 

Na ulua’i tu’uaia e le malo ia Atafua i moliaga mamafa e 2 o le gaoi ma le ave faagaoi o tupe sa tuuina atu i lalo o lana vaavaaiga.

 

Ae i lalo o le maliliega na sainia e le ua molia ma le malo ma talia e le fa’amasinoga, na malie ai Atafau e tali ioe i le moliaga mamafa o le gaoi. Na ta’utino le ua molia, sa ia ave faagaoi se vaega tupe e tusa ma le $118,910.30 mai le kamupani sa galue ai e aunoa ma se fa’atanaga fa’aletulafono.

 

 I lona tali ioe ai i le moliaga e pei ona ta’usala ai o ia, na ia ta’utino ai e fa’apea, i le va e 2 tausaga a o galue i le Forsgren Ltd. Inc mo le faia o fa’amaumauga i teugatupe a le kamupani, sa ia gaoia ai se vaega tupe.

 

Na taua i tuutuuga o le maliliega e fa’apea, i le aso 3 o Setema 2018, na maitauina ai e le Peresetene a le Forsgren’s Ltd, Inc se eseesega mata’utia i le ripoti o tupe a le kamupani o lo i i ai, ma fa’amaumauga o lo o tuuina mai i teugatupe a le Faletupe.

 

I faamaumauga o teugatupe a le kamupani, o lo o atagia mai ai le aofa’i e $61,304.92, ae i le ripoti mai le Faletupe i teugatupe, o loo fa’ailoa mai ai le aofaiga e $247,525.84.

 

O Atafu e pei ona taua i fa’amaumauga a le fa’amasinoga, sa galue o ia i le aoina mai lea o tupe mai pisinisi eseese o loo i lalo o le pulega a le Forsgren ma teu i le faletupe.

 

I le aso na sosoo ai, na toe talanoa ai Atafu ma le Peresetene e uiga i lenei mataupu, o iina na ia faailoa ai loa lona fa’aaogaina o tupe a le kamupani mo ia lava.

 

I le fa’afofoga ai o le Peresetene i le ta’utinoga a Atafu, sa ia fa’atonuina ai loa le Pule o le Vaega o Tupe a le kamupani ina ia amata se suesuega faalotoifale e uiga i lenei mataupu. Sa fia manino le Peresetene i fa’amaumauga uma e fa’atatau i tupe sa ao ma tupe fo’i sa teu e Atafu i totonu o le faletupe, ina ia mafai ai ona fa’atusatusa faamaumauga nei e lua ma iloa tonu ai loa le aofa’i o le tupe a le kamupani ua leiloa.

 

Na ta’utino fo’i Atafu i le Pule o le Ofisa sa fa’atinoina le suesuega i lona fa’aaogaina lea o tupe a le kamupani mo ia lava. Sa ia fa’atoese fo’i e tusa ai o lona le fa’amaoni i le fa’atinoina o lana galuega.

 

E pei ona taua e Atafu i le Pule o le Kamupani, e tusa ua 3 tausaga o fa’aauau pea lona ave faagaoi o tupe a le kamupani. O ni isi o tupe sa ia fa’aaoga e totogi ai lana ta’avale, o isi tupe sa fa’aaoga mo manaoga a lona aiga e aofia ai le latou malaga i Ausetalia, atoa ai ma isi tupe na fa’atupe ai manaoga a le Ekalesia.

 

E pei ona maua i suesuega a le Kamupani, e tele naua se vaega tupe a le kamupani na leiloa mai i le gaioiga a Atafu, peita’i na taua e Atafu i le Pule o le kamupani, e tusa ma le $90,000 le aofa’iga o le tupe sa ia fa’aaogaina.

 

Ae i suesuega a le kamupani na manino mai ai, e tusa ma le $118,910.30 le aofa’i o le tupe ua manino na fa’aaoga e Atafu.

 

I le aso 1 o Oketopa, 2018, na fesiligia ai loa e Leoleo Suesue ia Atafu e tusa ai o lenei mataupu. I lea fa’atalatalanoaga, na ta’utino ai Atafu i lona ave fa’agaoi o se vasega tupe tele mai le kamupani sa galue ai. O ia vaega tupe sa ia aveese mai i tupe e ao mai i isi pisinisi e aofia ai le ofisa autu, o le Koko Bean, Sports Domain, Niuborn faapea ai ma le Carl’s Jr.

 

Na ta’utino Atafu i Leoleo e fa’apea, o le tausaga e 2015 na amata ai ona ia ave faagaoia tupe a le kamupani. O ni isi o tupe sa ia fa’aaoga e totogi ai isi manaoga a le kamupani, ae o isi tupe sa ia fa’aaogaina mo ia lava. I le aso 20 o Setema 2018, na tusi ai e Atafu se tusi ma ave i le Peresetene o le Kamupani e fa’atatau i lenei mataupu. E le gata sa ia fa’atoese i ai e tusa ai o le mea sese sa ia faia, ae sa ia fa’ailoa fo’i i ai e fa’apea, e tusa ma le $119,000 le aofa’i o le tupe a le kamupani sa ia fa’aaogaina i se auala fa’asolitulafono.

 

Na faatoese le ua molia i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i lona aiga e mafuta ma lona to’alua ma lana fanau. Sa ia fa’atoese fo’i i le pulega a le Forsgren Ltd. Inc, i lona le fa’amaoni i le fa’atinoina o ona tiute.

 

E to’alua molimau na valaau e le itu tete’e e fesoasoani mo se fa’asalaga mama mo Atafua. O ia molimau e aofia ai le to’alua a le ua molia ma se Tina o le Ekalesia. Na taua e ia molimau e fa’apea, o Atafua, o se Tina loto alofa, loto maualalo ma loto fesoasoani i soo se tasi.

 

Na taua e le to’alua a le ua molia i luma o le fa’amasinoga, o le a ia totogiina le ta’i $400 i le masina pe afai e poloaina e le fa’amasinoga Atafua e toe totogi le tupe sa ia gaoia.

 

Na talosagaina e loia a itu uma e lua le fa’amasinoga ina ia fa’asala le ua molia i se fa’asalaga fa’anofovaavaaia, ma ia poloaina o ia e toe totogi atoa le tupe sa ia gaoia mai le kamupani na galue ai.

 

O nisi o tuutuuga o le fa’asalaga faanofovaavaaia e 5 tausaga a Atafua, o lona tuliina lea o masina e 20 i le toese i Tafuna, totogi le salatupe e $2,000, ma toe totogi atoa le tupe sa ia ave faagaoi e $118,910.30.

 

Mo le fa’asalaga fa’a falepuipui, e na o le 9 masina lea ua poloaina o ia e tuli, ae o isi masina e 11 o loo totoe ai, ua fa’amalumalu e le fa’amasinoga.

 

O afioga i ali’i Fa’amasino Lagolago ia Mamea Sala Jr ma Tunupopo Alalafaga Tunupopo na lagolagosua ia Sunia i le iloiloina o lenei fa’aiuga.