Falepuipui le Tina na ia gaoia le ie afuelo
O le Tina lea na ia gaoia le ie afuelo mai se tasi Tina ae fa’atau atu i se Tamaloa Tonga ina ia maua mai ai se tupe e fafaga ai lana fanau, sosoo ai ma lona taumafai e totogi tupe se tagata faigaluega a le malo ina ia mafai ai ona liliu atu ia te ia pepa o se ta’avale i se auala fa’asolitulafono, ua fa’asala e le Fa’amasinoga Maualuga e taofia i le toese mo le 20 masina, o se tasi lea o tuutuuga o lana nofovaavaaia e 5 tausaga.
E 2 mataupu eseese na molia ai e le malo ia Sauleli’a Amituana’i, poo Li’a Amituana’i fo’i e pei ona iloa ai o ia e le to’atele. I le mataupu muamua, na molia ai o ia i le moliaga o le gaoi atoa ai ma le ave faagaoi o se meatotino a se isi tagata, o solitulafono mamafa uma o le vaega C. I le tagi lona lua, na molia ai o ia i le taumafai e gaoi, taumafai e faia faiga fa’aalatua, atoa ai ma lona totogi tupe o se tagata faigaluega a le malo i se auala tua, o solitulafono mamafa uma ia o le vaega D.
I lalo o se maliliega na sainia e Amituana’i ma le malo, na ia tali ioe ai i le moliaga o le gaoi na toe teuteu e le malo, o le vaega A lea o solitulafono mama, ma le moliaga o le totogi tupe o se tagata faigaluega a le malo, o le vaega D o le solitulafono mamafa.
I le tali ioe ai o Amituana’i i moliaga e pei ona ta’usala ai o ia, na ia ta’utino ai e fa’apea, i le aso 17 Iulai 2017, na ia gaoia ai se ie toga, le afuelo mai se tasi Tina, ma ia fa’atau atu i se Tamaloa Tonga i le $300, mo se tupe e fafaga ai lana fanau.
Sa ia ta’utino atili e fa’apea, i le aso 11 o Iulai lava, sa ia folafola lona tuuina atu o le $200 i se tagata faigaluega a le Ofisa o Ta’avale Afi a le malo i Tafuna (OMV), ina ia mafai ai ona liliu atu pepa o se ta’avale i le igoa o lona to’alua.
Ina ua maua lona avanoa e fa’aleo ai lana talosaga i le fa’amasinoga, na fa’atoese ai loa Amituana’i e tusa ai o lana solitulafono, ma ia taua ai lona matua salamo e tusa ai o lana solitulafono sa faia. Sa ia faailoa i le fa’amasinoga e fa’apea, o loo taofia fa’atasi uma i laua ma lona to’alua i le toese i Tafuna i le taimi nei, ma ua leai se isi e tausia lana fanau.
Ona o lea tulaga, na mafua ai loa ona auina atu lana fanau e tausi e lona Tina i Ausetalia i le taimi nei. Sa ia talosaga mo se avanoa e toe fo’i ai i lona aiga e tausi lana fanau.
Na fa’ailoa e le afioga a le Fa’amasino Sili ia Michael Kruse ia Amituana’i e fa’apea, o loo taua i le ripoti a le Ofisa Faanofovaavaaia, talu lava ona ulufale mai i Amerika Samoa i le 2005, e lei i ai lava ni ona pepa nofomau.
Na ioe Amituana’i i le ripoti a le Ofisa Faanofovaavaaia, atoa ai ma lana fa’amatalaga e fa’apea, ina ua ulufale mai i Amerika Samoa i le masina o Aperila 2005, na aveese atu ai e le tagata e suafa ia Joe Maluia lona tusi folau, e oo mai lava i le taimi nei, na te lei toe vaai lava i lona tusi folau.
Na fesili Kruse ia Amituana’i poo Joe Maluia o se tagata faigaluega a le Ofisa o Femalagaaiga, na tali le ua molia, ioe.
Na talosaga le loia a le ua molia ia Michael White i le fa’amasinoga mo se avanoa e fa’asala ai Amituana’i i se fa’asalaga faanofovaavaaia, ina ia maua ai le avanoa e toe fo’i ai e tausi lana fanau. Na taua atili e White le salamo fa’amaoni o Amituana’i mai lana solitulafono, ma ua tele se lesona ua ia a’oa’oina talu mai le taimi umi lea na taofia ai o ia i le falepuipui e fa’atalitali ai le aso e lau ai lana fa’asalaga.
Na ioeina e le ali’i loia sa tula’i mo le malo ia Woodrow Pengelly le agava’a o Amituana’i i se fa’asalaga faanofovaavaaia, peita’i i lalo o tuutuuga e aofia ai lona tuua o Amerika Samoa ae toe fo’i atu i lona aiga i Samoa, ona o tulaga fa’aletonu i ona pepa nofomau.
E 6 tausaga na manatu le fa’amasinoga e faasala ai Amituana’i i le toese i Tafuna, peita’i ua fa’amalumalu lona tuliina o lea fa’asalaga fa’a falepuipui, ae ua faanofovaavaaia o ia mo le 5 tausaga i lalo o poloaiga e ao ona ia usita’i i ai.
O ni isi o ia tuutuuga e aofia ai lona tuliina o masina e 20 i le toese peita’i, a mae’a loa ona ia tuliina le umi e 12 masina, ona taofi loa lea o le tuliina fa’amae’a o isi masina e 8 o loo totoe ai, ae sauni loa e toe fo’i atu i Samoa mo le umi o lana nofovaavaaia e 5 tausaga.