Ads by Google Ads by Google

Falepuipui Thomas Siaumau mo le 30 tausaga


[ata: foa'i]
ausage@samoanews.com

E 30 tausaga lea ua faasala ai e le Fa’amasinoga Maualuga le susuga a Thomas Siaumau e nofosala ai i le toese i Tafuna, ina ua ta’usala o ia e se vaega iloilo iuga i moliaga e 7, lea na afua mai i le fa’alavelave lea na ia tafana ina ai se ta’avale Leoleo a o i ai se Leoleo i totonu i le po o le aso 14 o Tesema 2017 i tua o le malae Baseball i Tafuna.

 

O le aso Faraile la na te’a nei na tuuina atu ai le fa’asalaga a le fa’amasinoga mo lenei ali’i talavou e na o le 20 tausaga le matua.

 

O le afioga i le ali’i Fa’amasino Sili lagolago ia Fiti Sunia na tuuina atu le faasalaga, ae lagolagosua i ai afioga i ali’i Fa’amasino Lagolago ia Mamea Sala Jr ma Tunupopo Alalafaga.

 

Na taua e le Tina a Siaumau i luma o le Fa’amasinoga ma ona loimata tulaga lelei e fa’atatau i le olaga o Siaumau. E le gata o ia o se ali’i talavou e loto alofa ma loto fesoasoani, ae naunau fo’i e lagolago le pisinisi a lona aiga.

 

Na talosaga le Tina i le fa’amasinoga mo se avanoa la te toe mafuta ai ma si ana tama, atoa ai ma se avanoa e mafai ai ona toe mafuta atu Siaumau i lona to’alua ma lana fanau o lo o nonofo i le aai o Kalefonia.

 

Na faatoese Siaumau i le fa’amasinoga e tusa ai o lana solitulafono, ma ia talosagaina ai se isi avanoa se tasi mo ia se’i toe mafuta atu ai i lona aiga. Sa ia faailoa fo’i i le fa’amasinoga lona faanaunauga o lo o i ai, o lona fia mafuta atu lea i lona to’alua ma lana fanau laiti.

 

E leai se taimi na fa’atoese ai Siaumau i Leoleo na a’afia i le fa’alavelave e pei ona ta’usala ai o ia.

 

Na taua e lana loia ia Daniel Holladay e fa’apea, talu mai lava le taimi na fa’atoa pu’e faapagota ai e Leoleo ia Siaumau e oo mai lava i le taimi na lau ai lana fa’asalaga, o lo o tumau pea le talitonuga o Siaumau, e le nofosala o ia i lenei mataupu.

 

Na talosaga Holladay i le fa’amasinoga mo se fa’asalaga mama mo Siaumau, ina ia mafai ai ona vave magalo o ia ma fo’i atu e mafuta ma lona aiga, aemaise ai lona to’alua ma lana fanau i Kalefonia, peita’i na tete’e malosi i ai le loia a le malo.

 

Na taua e le tama’ita’i loia ia Christy Dunn e fa’apea, o le tasi ma le afa vaiaso lea na faagasolo ai le fa’amasinoga autu a Siaumau, na molimauina ai e le fa’amasinoga mau faamaonia eseese uma lava na mafai ona folasia e le malo e lagolago ai le latou tagi.

 

I le talitonuga o Dunn, e leai lava se isi ituaiga faasalaga e talafeagai mo Siaumau, se’i vagana ai se fa’asalaga fa’a falepuipui, ina ia mafai ai ona aoaoina e tagata lautele le tatau lea ona lagolago i le galuega a leoleo o lo o fa’atinoina, i le puipuia lea o le saogalemu o le atunu’u lautele.

 

E umi se taimi na malolo ai le fa’amasinoga, a o iloilo e ali’i Fa’amasino sa latou fa’aiuga e tusa ai o lenei mataupu.

 

Saunoa Sunia i le taimi na tuuina mai ai le fa’asalaga a le fa’amasinoga e fa’apea, ua fai si umi e le i toe tula’i mai lenei ituaiga vaaiga, o le tuuina atu lea e le Fa’amasinoga o se fa’asalaga i se tagata na ta’usala e se vaega iloilo iuga.

 

E le gata fo’i i lea, o se tagata ua ta’usala i ni solitulafono mamafa, e mafua mai i se fa’alavelave matuia sa fa’atinoina.

 

“O le itu e pito sili ona laki ai lenei mataupu, e leai se isi na manu’a, poo se soifua fo’i na ma’imau ai,” o le saunoaga lea a Sunia. I faamaumauga a le fa’amasinoga e pei ona taua e Sunia, o lo o manino mai ai le ta’usala muamua o Siaumau i le moliaga o le faaoolima ma le faaleaga meatotino i ni tausaga ua mavae atu, a o lea fo’i ua toe ta’usala ai o ia i ituaiga solitulafono lava nei i le taimi nei.

 

I lena faalavelave, na taua ai e Sunia le fa’aaoga o ma’a e tauai ma fa’aoolima ai i leoleo na aga’i atu e fa’afilemu le vevesi na tula’i mai i le nofoaga o Siaumau. I le faaiuga o le mataupu, na ta’usala ai Siaumau i moliaga o le faaoolima ma le faaleaga meatotino i lalo o se maliliega ma le malo, ma faasala ai e le fa’amasinoga o ia i se fa’asalaga faanofovaavaaia.

 

Saunoa sunia e fa’apea, i le siosiomaga o le soifuaga ma le atunu’u o lo o soifua ma ola ai tagata i totonu o Amerika Samoa, o se soifuaga e fa’avae mea uma i le ola faaaloalo ma le feavata’i o tagata uma.

 

“O le agaifanua a Samoa e mafua ai ona faigofie mea uma i totonu o lenei atunu’u, ma atagia mai ai le lelei o le olaga fetausia’i i le va o le isi tagata i le isi tagata.”

 

“O le mafuaaga lena sa le mana’omia ai ni a’upega i na aso, aua sa faalagolago tagata uma i le fa’aaloalo i le va o tagata e to’alua. O le ituaiga soifuaga fo’i lena na tutupu mai ai o tatou tagata, o le olaga faaaloalo.”

 

“O le mafua’aga fo’i lena e ala ai ona fausia ituaiga faigamalo e pei ona i ai la tatou faigamalo, ina ia atagia ai le ituaiga soifuaga moni e tatau mo tatou tagata, ma atagia mai ai vaega uma e pei ona aofia i totonu o le Feagaiga sa osia ma le malo tele o le Iunaite Setete i tausaga ua mavae.”

 

“I le mataupu e pei ona ta’usala ai Siaumau, ua matou maua i a matou sailiiliga le leai o se fa’aaloalo, ma atagia mai ai le le amanaia o le tulafono.”

 

“E fa’alagolago galuega fa’atino a Leoleo i luga o le fa’aaloalo, ae o le taimi lava e leai ai se fa’aaloalo mai tagata lautele, ona fa’aletonu fo’i lea o le fa’atinoina o tiute tauave a Leoleo. O le taimi fo’i e fa’aletonu ai le fa’atinoina o tiute a Leoleo, ona pagatia fo’i lea o si o tatou atunu’u.”

 

“O se mataupu e sili lenei ona matuia ma mata’utia, ma ua matou iloiloina fo’i, e le talafeagai se fa’asalaga faanofovaavaaia i lenei mataupu, ona o le tulaga lamatia sa i ai le soifua o Leoleo na a’afia.”

 

Saunoa Sunia e fa’apea, ina ua mae’a ona latou iloiloina ma ona uso a Fa’amasino mau faamaonia uma o lenei mataupu, na latou faai’ugafonoina ai loa lea, na pau le fa’asalaga e talafeagai mo Siaumau, o se fa’asalaga fa’a falepuipui.

 

Mo le moliaga o le faaoolima i le tulaga muamua, e 30 tausaga e faasala ai le ua molia i le toese; mo le moliaga o le faaaoga faasolitulafono o se a’upega, e 5 tausaga i le toese; mo le moliaga o le umia o se aupega e le faatagaina, e tasi le tausaga i le toese; mo moliaga e 2 o le faaleaga meatotino i le tulaga muamua, e ta’i 5 tausaga i le toese mo le moliaga e tasi; mo le moliaga o le faataga o se tagata e talavou i lalo o le tulafono e soli le tulafono, e 15 tausaga i le toese; ma le moliaga o le faatupu vevesi i nofoaga faitele, e 6 masina i le toese.

 

O nei faasalaga uma e tuli fa’atasi, lona uiga, e 30 tausaga le umi lea ua fa’asala ai Siaumau e le fa’amasinoga.