Ads by Google Ads by Google

Falepuipui Sopi Senio Jr ina ua le usita’i i tuutuuga o lana nofovaavaaia


[ata: foa'i]
ausage@samoanews.com

O le ali’i lea o lo o nofovaavaaia mo le 5 tausaga talu mai le 2015, e mafua mai i le fa’alavelave lea na ia talepeina ai le masini ATM i Leone i le 2012, ua toe taofia nei o ia i le falepuipui i Tafuna, ina ua fa’amaonia e le fa’amasinoga lona le usitaia o tuutuuga o lana nofovaavaaia.

 

O le vaiaso na te’a nei na tu’uina atu ai le fa’aiuga a le Fa’amasinoga Maualuga i le susuga a Sopi Senio Jr. O le afioga i le ali’i Fa’amasino Sili Lagolago ia Fiti Sunia na fa’atautaia le iloiloga o lenei mataupu, ae lagolagosua i ai afioga i ali’i Fa’amasino Lagolago ia Mamea Sala Jr ma Tunupopo Alalafaga Tunupopo.

 

O le ali’i loia fautua ia Michael White na tula’i mo Senio Jr, ae o le tama’ita’i loia sili lagolago ia Laura Garvey na tula’i mo le itu a le malo.

 

O nisi o tuutuuga o le nofovaavaaia a Senio Jr na tuuina atu i le 2015, ia alu e vaai le Ofisa Faanofovaavaaia fa’atasi i le masina, totogi le salatupe e $1,000, atoa ai ma le toe totogiina o le tupe mo mea sa fa’aleagaina i lana solitulafono e $4,428.50.

 

O le masina na te’a nei na fa’amaonia ai e le fa’amasinoga maualuga tu’uaiga fa’asaga ia Senio Jr, i lona le usitaia lea o tuutuuga o lana nofovaavaaia.

 

Na taua i le ripoti a le Ofisa Faanofovaavaaia e faapea, talu lava ona magalo mai le ua molia mai le toese i le 2 tausaga talu ai, e le i oo atu lava o ia e vaai le Ofisa Faanofovaavaaia, na te le’i totogiina fo’i se tupe o lana salatupe atoa ai ma le tupe mo le taui o mea totino sa ia fa’aleagaina.

 

Ina ua maua le avanoa o Senio Jr mai le fa’amasinoga, sa ia fa’atoese ai e tusa o lona le usitaia o tuutuuga o lana nofovaavaaia.

 

Na ia taua e fa’apea, ua tele masina o taumafai e saili sana galuega peita’i e le i maua. Sa ia taumafai fo’i e saili ni avanoa faigaluega i ni isi o pisinisi ma kamupani i le atunu’u, peita’i sa le maua lava se avanoa mo ia, o le mafua’aga lea ua le mafai ai ona totogi lana salatupe faapea ai ma le tupe na fa’atonu o ia e totogi.

 

Ae i le mataupu o lona le oo atu e vaai le Ofisa Faanofovaavaaia, na finau Senio Jr e faapea, e tele masina o taofia o ia i le falema’i i Fagaalu talu mai le tausaga na te’a nei, e mafua mai i le fa’alavelave lea na ia manu’a tigaina ai, ina ua fana o ia e se ali’i pagota.

 

O lea fa’alavelave e pei ona taua e Senio Jr, na a’afia ai o ia i ni pulu fana, ma mafua ai loa ona taofia o ia i le falema’i mo se taimi umi.

 

O le taimi nei, ua mae’a se tasi o togafitiga na aveese ai le isi pulu fana, ae o lo o totoe ai pea lava le isi pulu fana i totonu o lona tino e le mafai ona aveese. Na talosaga le ua molia mo se avanoa se’i toe saili ai sana galuega e totogi ai lana salatupe.

 

Sa ia fa’ailoa i le fa’amasinoga e fa’apea, e le faapea ua ia le amanaia tuutuuga o lana nofovaavaaia, ae ona o le fa’alavelave na a’afia ai, o le mafua’aga lena ua ala ai ona tula’i mai lenei fa’aletonu.

 

Na talosaga White i le fa’amasinoga mo se avanoa e fa’aauau ai pea ona tatala le ua molia i tua e saili sana galuega. Na taua e White e fa’apea, o le faalavelave lea na a’afia ai Senio Jr i le masina o Aokuso 2018, na mafua ai ona taofia o ia i le falema’i mo se taimi umi. Sa taua fo’i e White e fa’apea, talu mai lava le fa’alavelave na a’afia ai Senio Jr i se laau malosi i le tausaga na te’a nei, ua le toe tutusa lava le atoatoa o lona malosi.

 

Na ioe le loia a le malo ina ia tu’u se avanoa ia Senio Jr e saili ai sana galuega.

 

Ina ua mae’a ona iloilo e le fa’amasinoga faamaumauga uma e uiga i lenei mataupu, sa tuuina mai ai loa la latou fa’aiuga fa’asaga ia Senio Jr.

 

Na taua e Sunia e fa’apea, o lo o manino i le ripoti a le Ofisa Faanofovaavaaia, e 2 tausaga talu ona magalo Senio Jr, e lei oo atu lava e vaai le Ofisa Faanofovaavaaia, na te lei totogiina fo’i se $1 e tasi o lana salatupe, poo le totogi o meatotino sa ia fa’aleagaina.

 

Na faailoa e Sunia ia Senio Jr e fa’apea, “Matou te le taliaina lou faia o se alofaga i luma o le fa’amasinoga i le mafuaaga na ala ai ona le totogiina lau salatupe, faapea ai ma lou le totogiina o le tau mo meatotino sa e fa’aleagaina. Matou te le taliaina fo’i lau alofaga ua tuuina mai, na mafua ona e le alu e vaai le ofisa faanofovaavaaia i masina ta’itasi, ona sa taofia oe i le falema’i i Faga’alu.”

 

Na faailoa e Sunia e fa’apea, o le fa’alavelave na a’afia ai le ua molia na fa’atoa tula’i mai i le tausaga na te’a nei, ae o le 2 tausaga talu ona magalo mai i tua mai le toese, e le’i oo ai lava e asiasi i le ofisa Faanofovaavaaia, pe saili fo’i sana galuega e totogi ai tupe sa fautuaina o ia e totogi.

 

O le faaiuga la a le fa’amasinoga, ua fa’aleaogaina nei le nofovaavaaia a Senio Jr, ae ua poloaina loa o ia e tuli masina o lo o totoe o lana fa’asalaga fa’a falepuipui e 5 tausaga sa tuuina atu e le fa’amasinoga.

 

Mai le fa’asalaga fa’a falepuipui e 36 masina sa tatau ona tuli e Senio Jr i le 2015, e na o le 20 masina sa ia tuliina, ae totoe ai loa masina e 16. O lea la ua poloaina o ia e le fa’amasinoga na te tuliina masina e 16 o lo o totoe o lana fa’asalaga, ma ia totogi lana salatupe e $1,000, atoa ai ma le tupe e $4,428.50 mo le tau o mea totino sa fa’aleagaina i lana solitulafono.

 

O le masina o Oketopa o le 2012 na osofa’i ai e Senio Jr le masini ATM a le Faletupe o le ANZ sa i luma o le faleoloa o le FJ&P Kruse Store i Leone. E lei manuia taumafaiga a le ua molia e gaoi le tupe sa i totonu o le ato tupe mamafa lenei.

 

I lalo o se maliliega na sainia e le ua molia ma le malo i le 2015, na tali ioe ai le ua molia i le moliaga mamafa fo le fa’aleaga meatotino i le tulaga muamua, o le moliaga mamafa fo’i lea na ta’usala ai o ia.