Ads by Google Ads by Google

Falepuipui se ali’i talavou ona o le talepe fale ma le gaoi


[ata: foa'i]
ausage@samoanews.com

O le ali’i talavou e 24 tausaga le matua lea na ta’usala e le Fa’amasinoga i le mataupu lea na latou talepeina ai se faleoloa i Tafuna ae ave fa’agaoi oloa e silia i le $3,000 le tau, ua poloaina o ia na te tuliina masina e 28 i le toese i Tafuna, o se tasi lea o tuutuuga o lana nofovaavaaia e 7 tausaga.

 

O le vaiaso na te’a nei na tula’i ai le susuga a Albert “Pati” Faletoi Jr mo le lauina o lana faasalaga.

 

Talu mai le taimi na pu’e fa’apagota ai Faletoi Jr i le masina o Mati 2018, na taofia pea o ia i le toese ina ua le mafai ona ia totogi le tupe e $15,000 sa fa’atulaga e tatala ai o ia i tua.

 

Na ulua’i molia Faletoi Jr i moliaga mamafa e 2 o le gaoi faapea ai ma le talepe fale i le tulaga lua. Ae i lalo o le maliliega lea na sainia e Faletoi Jr ma le malo, lea fo’i na talia e le Fa’amasinoga i le masina o Iuni o le tausaga nei, na malie ai le ua molia e tali ioe i le moliaga mamafa o le gaoi, ae solofua e le Fa’amasinoga le isi moliaga o lo o totoe ai i le tagi sa fa’aulu e le malo.

 

I le tali ioe ai o Faletoi Jr na ia ta’utino ai e fa’apea, i le po o le aso 13 o Mati 2018 i Tafuna, na la osofaia ai ma sana uo se faleoloa Asia i Tafuna ma le fa’amoemoe e gaoi ni oloa.

 

A o la i ai i totonu, na la gaoia ai le tele o oloa e silia i le $3,000 lo latou tau aofa’i.

 

O oloa uma na la gaoia, e leai se oloa na toe faafo’i i le pule o le Faleoloa, pe na toe faafo’i i Leoleo i le taimi na su’esu’eina ai lenei mataupu.

 

Ina ua maua le avanoa o Faletoi Jr mai le fa’amasinoga, na ia fa’atoese ai loa e tusa ai o lana solitulafono. Na taua e Faletoi Jr i le Fa’amasinoga e faapea, ua sese le filifiliga sa ia faia i le po na tula’i mai ai le faalavelave, e mafua mai ina ua ova lona ‘ona. Sa ia faailoa i le Fa’amasinoga e fa’apea, o ia e ulumatua i le fanau e to’a 5 a ona matua, e na o lona Tina fo’i e faigaluega i le Kamupani i’a e tausi ai lo latou aiga.

 

E le o toe faigaluega lona Tama talu mai lava le fa’alavelave na lavea ai o ia, lea ua mafua ai ona taoto pea lava i le fale ua ma’i ma ua le mafai ona toe savali.

 

Na ta’utino Faletoi Jr i le fa’amasinoga e fa’apea, afai ae maua se isi avanoa mo ia, o le a taumafai loa e fai se suiga i lona olaga. Na ia taua lona salamo moni e tusa ai o lana solitulafono sa faia, ma ua ia iloa fo’i ma mautinoa, e le o se nofoaga lelei le Falepuipui mo ia.

 

Na lagolagoina le ali’i loia fautua ia Ryan Anderson faatoesega a le ua molia, ma ia talosagaina ai loa le Fa’amasinoga ina ia talia le Fautuaga a le Ofisa Faanofovaavaaia, ina ia faasala Faletoi Jr i se fa’asalaga faanofovaavaaia.

 

Na faailoa e Anderson i le fa’amasinoga le salamo moni o lenei ali’i talavou mai lana solitulafono sa faia, ma ua ia aoaoina fo’i se lesona taua mai le mea sa tupu, atoa ai ma masina e tele nat aofia ai o ia i le toese e faatalitali ai se faaiuga o lana matuapu.

 

E ui i le matuia o le solitulafono a Faletoi Jr, ae na taua e lana loia i le Fa’amasinoga e fa’apea, e agava’a lava o ia mo le tuuina atu i ai o se isi avanoa, ina ia mafai ai ona toe fuata’i lona olaga ma toe amata se isi amataga fou mo ia.

 

“O Faletoi Jr, o se ali’i talavou o lo o i ai se lumana’i lelei mo ia. E le o le toese le taunuuga o lona olaga, o mea fo’i sa tutupu, na atagia mai ai le sese o lana faaiuga sa faia, ae ua salamo mo ia mai lana solitulafono, ma ua manatu fo’i e toe susu’e se isi itulau fou o lona olaga. Faamolemole lau afioga i le Fa’amasino Sili, se avanoa se tasi mo lenei ali’i talavou,” o le talosaga lea a le ali’i loia fautua ia Anderson.

 

Na lagolagoina e le loia a le malo le talosaga mo se fa’asalaga faanofovaavaaia. Na taua e Doug Lowe e faapea, na pau le itu o lo o naunau mai i ai le Pule o le Faleoloa na a’afia, ia toe totogi atu le tupe mo le taui o ana meatotino ua leiloloa.

 

Sa ia taua atili fo’i e fa’apea, e leai ma se oloa na toe faafo’i, ae na leiloloa uma lava i le taimi o le solitulafono.

 

Na talosagaina fo’i e le loia a le malo le tatau lea ona i ai sina faasalaga faa falepuipui e tuuina atu ia Faletoi Jr, ina ia aoaoina ai lona mafaufau mai le mea sese sa ia faia.

 

O le 16 masina lea na taofia ai Faletoi Jr i le toese e faatali ai se faaiuga o lana mataupu, e manatu le itu a le malo, ia aofia lea i se faasalaga faa falepuipui e tuuina atu e le Fa’amasinoga ia te ia.

 

A o le i aga’i atu ali’i Fa’amasino e iloilo sa latou faaiuga, na fesili Kruse i lona fia malamalama, pe sa i ai se oloa na toe faafo’i mai mea sa gaoia. Na tali Anderson, “E leai ma se oloa na toe faafo’i.”

 

Na toe fesili Kruse ia Anderson, pe na te iloa o fea na ave ai e Faletoi Jr oloa uma nei na la gaoia ma le ali’i o lo o molia i laua i lenei mataupu. Na tali Anderson, e tusa ai o le fa’amatalaga a le ua molia, o le tele o oloa na gaoia na tufatufa i isi o ana uo sa latou inupia fa’atasi ina ua mae’a le osofaiga.

 

Saunoa Kruse e fa’apea, o le matuia o ituaiga faalavelave faapenei, o le aafia ai fua o tagata faipisinisi o loo pagatia e tau saili ni auala e faaolaola ai a latou pisinisi mo le manuia o latou aiga.

 

O tupulaga i ona po nei, ua matua faigata lava ona faatonutonu, o nisi fo’i ua leai lava se popole i meatotino ma mea aoga a isi tagata e oo lava i o latou aiga, ae ua latou tafili saunoa lava i ai ona o le manatu e faamalie ai manaoga o loo nonofo ma i latou.

 

O ni isi o tuutuuga o le nofovaavaaia e 7 tausaga a Faletoi Jr, o lona tuliina lea o masina e 28 i le toese i Tafuna, e aofia ai ma masina e 16 lea ua mae’a ona ia tuliina. E le faatagaina o ia ona toe alu i le nofoaga o loo i ai le faleoloa na a’afia, e le mafai fo’i ona ia toe taumafai e fa’afesoota’i lana uo lea o lo o molia fa’atasi i laua i lenei mataupu.

 

Ua poloaina o ia e totogi le tupe e $3,000 mo le tau o oloa na gaoia, e le tatau fo’i ona ia toe solia se tulafono a le malo, a ia avea o ia o se tasi e tausisi i tulafono i taimi uma.