Ads by Google Ads by Google

Falepuipui se ali’i Faifeau mo le 180 aso


[ata: foa'i]
ausage@samoanews.com

E 180 aso (tusa lea e 6 masina) lea ua faasala ai e le Faamasinoga Maualuga se ali’i Faifeau i le Toese i Tafuna, ina ua ta’usala o ia e se vaega iloilo iuga i le moliaga o lona faia o gaioiga e lamatia ai le saogalemu o fanau e talavou i lalo o le tulafono.

 

Ona o puipuiga i le teineititi o loo a’afia, ua le mafai ai e le Samoa News ona fa’ailoa le suafa o le ali’i Faifeau. Ae pei ona taua i fa’amaumauga a le fa’amasinoga, o le teineititi e 13 tausaga na a’afia i lenei mataupu, o le afafine moni lava o le ali’i Faifeau, peita’i na fa’atamafai o ia e se tasi o ulugali’i. Ae o le taimi na tula’i mai ai le fa’alavelave, sa asiasi mai o ia i le fale o le Faifeau ma lona aiga.

 

Na ulua’i molia e le malo le ali’i Faifeau i moliaga mamafa e 3 o le faia o uiga faasotoma, tagofia o itutinosa o se teineitiiti i le tulaga muamua, fa’apea ai ma le faia o uiga le taupulea i se teineititi e aiga i ai. Sa molia fo’i o ia i le moliaga mama o le faia o amioga e ono lamatia ai le saogalemu o fanau laiti.

 

Ae i le mae’a ai ona iloilo e le vaega iloilo iuga e to’a 6 o mau fa’amaonia uma o lenei mataupu, na latou tuuina mai ai loa le fa’aiuga, e le nofosala le ali’i Faifeau i moliaga mamafa e 3, ae nofosala o ia i le moliaga mama e tasi, o lona faia lea o gaioiga e lamatia ai le soifua lelei o fanau laiti.

 

O le aso Faraile na te’a nei na tula’i ai le alii Faifeau i luma o le Fa’amasinoga Maualuga mo le lauina o lana fa’asalaga.

 

O le ali’i loia sili lagolago ia Robert Morris na tula’i mo le malo, ae o ali’i loia fautua lagolago ia Rob McNeill ma Ryan Anderson na tula’i mo le ali’i Faifeau.

 

Ina ua maua lona avanoa mai le fa’amasinoga, sa ia fa’atoese ai i le fa’amasinoga e tusa ai o lana solitulafono sa faia, ma ia talosagaina ai se isi avanoa e fa’aauau ai pea le avea o ia ma Faifeau o lana Ekalesia, atoa ai ma le fa’aauauina lea o lana tausiga i lona to’alua ma lana fanau.

 

E le i fa’atoese le ali’i Faifeau i lona afafine na a’afia i le mataupu e pei ona ta’usala ai o ia e le vaega iloilo iuga.

 

Na fa’amatala e lana loia ia McNeill i le fa’amasinoga se tala’aga puupuu o le olaga o le ali’i Faifeau, amata mai i le taimi na soifua a’e ai o ia i lona aiga i Samoa i le tausaga e 1961, ma aga’i atu ai i Ausetalia e fa’aauau ai lana aoga ina ua 19 ona tausaga le matua, ma avea ai o ia ma tagata inisinia.

 

Na mae’a lana aoga i Ausetalia ona aga’i atu ai lea o ia i Niu Sila ma faia ai lona aiga, ma fananau ai lana fanau matutua e to’alua.

 

O le tausaga e 1995 na toe fo’i ane ai le ali’i Faifeau ma lona aiga i Samoa, ma fananau ai le isi ana fanau e to’alua. O le tausaga e 1999 na malaga mai ai loa o ia ma le aiga i Amerika Samoa nei, ma fanau ai lona afafine laititi, lea na mulimuli ane vavae tama i le isi ulugali’i, o ia fo’i lena o loo a’afia i lenei mataupu.

 

E tele galuega na galue ai le ali’i Faifeau i Amerika Samoa, seia oo ina fa faigaluega e le kamupani o ia o se inisinia i le 2014 seia oo mai lava i le taimi nei. O le masina o Ianuari o le tausaga nei na fa’auu ai o ia e avea ma Faifeau.

 

Na taua e McNeill e fa’apea, o le mataupu e pei ona ta’usala ai le ua molia, ua fai ma to’atuga i le lotoifale o lona aiga. Sa ia fesiligia fo’i le mafua’aga ua ala ai ona ta’usala e le vaega iloilo iuga le Faifeau i le moliaga mama e tasi, e ui o lea ua solofua moliaga mamafa.

 

Na faaiu le faafinauga a McNeill i lona talosagaina lea o le fa’amasinoga ina ia fa’asala le ua molia i se fa’asalaga nofovaavaaia.

 

Na tete’e i ai le loia a le malo ia Morris i le talosaga a le itu tete’e, ae sa ia finau ina ia faasala le ua molia i le faasalaga pito sili ona mamafa e pei ona fautua mai i ai le tulafono.

 

Na taua e Morris lona ofo tele i le faaiuga a le vaega iloilo iuga, e pei ona solofua ai moliaga mamafa ae tausala le ua molia i le moliaga mama. Na taua e le loia a le malo e fa’apea, na fa’aaoga e le vaega iloilo iuga o latou lagona ma le manatu o le ali’i Faifeau lea na molia, e fa’avae ai i luga la latou fa’aiuga, ae le faalagolago le latou faaiuga i mau faamaonia.

 

Na finau atili Morris e fa’apea, na matua lava ma malolosi mau na tuuina atu e le malo e lagolago ai le latou tagi fa’asaga i le ua molia.

 

A o le i tuuina mai le fa’aiuga a le fa’amasinoga, na fa’ailoa e le afioga i le ali’i Fa’amasino Sili ia Michael Kruse nisi o vaega na mafua ai ona faigata i le vaega iloilo iuga ona tuuina mai sa latou fa’aiuga.

 

O se tasi o vaega, o le le mafai lea e le malo ona aumaia le teineititi na a’afia e molimau i luma o le vaega iloio iuga. Saunoa Kruse e faapea, o le isi lea mau maumau tutu e faalagolago i ai le faaiuga a le vaega iloilo iuga.

 

I le faaiuga, na faasala ai loa e le fa’amasinoga le alii Faifeau e taofia i le falepuipui mo le 180 aso, atoa ai ma lona totogi o le salatupe e $1,000.