E 28 masina lea ua faasala ai i le toese i Tafuna le tama’ita’i sa galue i le kamupani o le Western Union, ina ua faamaonia e le fa’amasinoga maualuga le moliaga o le ave faagaoi o tupe sa tuuina atu i lalo o lana vaavaaiga sa tuuaia ai o ia.

Na ulua’i tuuaia e le malo ia July Leilua Tautalaga i moliaga mamafa e 4, e aofia ai moliaga e 2 o le gaoi ma moliaga e 2 o le ave faagaoi o meatotino sa i lalo o lana vaavaaia. Ae i lalo o se maliliega sa latou sainia ma le malo, na tali ioe ai le ua molia i le moliaga e tasi o le ave faagaoi o meatotino sa tuuina atu i lalo o lana vaavaaia, ae solofua e le fa’amasinoga isi moliaga sa totoe ai i le tagi sa faaulu e le malo.

I le tali ioe ai o Tautalaga i le moliaga e pei ona tausala ai o ia e le fa’ amasinoga, sa ia tautino ai e fa’apea, i le aso 31 Me 2016 ao galue ai i le Western Union, sa ia gaoia ai le $14,000 mai le kamupani i ni gaioiga faasolitulafono se 2.

Sa ia ioeina lona taofia fa’alua o le aofa’i e ta’i $7,000 mai se tagata Asia na alu atu e lafo lana tupe i lona aiga i Saina.

Ina ua maua lona avanoa e fa’atoese ai i le fa’amasinoga, na ta’utino ai le ua molia ma lona loto fa’amaoni, e le toe tula’i mai lenei solitulafono i le lumana’i. Sa ia faatoese i le faamasinoga ma le malo e tusa ai o lana solitulafono, sa ia faatoese foi i le kamupani na a’afia e tusa ai o lana solitulafono.

Sa ia talosaga i le fa’amasinoga mo se isi avanoa mo ia, atoa ai ma lana ta’utinoga e le toe tula’i mai lenei solitulafono i le lumana’i.

Na taua e Tautalaga e fa’apea, o le lata i le 4 masina lea na taofia ai o ia i le toese ao faatalitali ai lana fa’asalaga, ua avea ma lesona taua mo lona olaga.

Na valaau e le loia a Tautalaga ia Michael White se sui o le aiga o le ua molia e molimau mo ia. Na taua e lea ali’i e fa’apea, o Tautalaga na fanau i Samoa, ae na aumai e lona Tama e fai ma o latou tuatafine ina ua fa’atoa fanau o ia. O le olaga atoa o Tautalaga na ola ai o ia i Amerika Samoa.

Na talosaga le loia a le ua molia i le fa’amasinoga mo se faasalaga faanofovaavaaia, atoa ai ma se avanoa e toe fo’i ai le ua molia e faigaluega ina ia mafai ai ona toe totogi le tupe sa ia gaoia.

Na lagolagoina e le loia a le malo ia Robert Morris le agava’a o Tautalaga mo se fa’asalaga nofovaavaaia. Sa ia talosagaina fo’i le fa’amasinoga ina ia tu’u se avanoa i le ua molia na te toe totogi ai le tupe sa ia gaoia.

Na taua atili e Morris e fa’apea, e ui o le ulua’i solitulafono lenei a Tautalaga, ae talitonu le malo o ia sa ta’ita’ia le gaioiga e pei ona molia uma ai o ia ma isi tama’ita’i faigaluega e to’alua i le gaoia o tupe mai le kamupani.

Na talia e le afioga i le ali’i Fa’amasino ia Elvis P. Patea fautuaga mo se faasalaga faanofovaavaaia, ma ia faanofovaavaaia ai loa le ua molia mo le 7 tausaga i lalo o poloaiga e ao ona usita’i i ai.

O ni isi o ia poloaiga e aofia ai lona tuliina o masina e 28 i le toese, ae a mae’a ona ia tuliina le 8 masina, ona tatalaina lea o ia i tua e alu e faigaluega ina ia toe totogi ai le tupe atoa e $14,000 sa ia gaoia.

Na fautuaina e Patea ia Tautalaga ina ia fa’aaoga tatau le avanoa ua tuuina atu mo ia, afai e leai, o lona uiga o le toe fa’afo’i o ia i Samoa.