Ads by Google Ads by Google

Falepuipui mo le 20 masina le ali’i sa avea ma Leoleo a le malo

ausage@samoanews.com

E 20 masina lea ua fa’asala ai e le Fa’amasinoga Maualuga se ali’i sa avea ma Leoleo a le malo, ina ua ta’usala o ia i le moliaga mama o lona fa’aaoga lea o lona tulaga fa’a tagata faigaluega a le malo, e sailia ai ni taui mo ia lava i ni auala fa’aalatua.

 

O le fa’asalaga fa’a falepuipui ua tuuina atu mo le susuga a Fa’auma Malo, o se tasi lea o tuutuuga o lana nofovaavaaia e 5 tausaga ua tuuina atu e le fa’amasinoga, ina ua lauina lona fa’asalaga i le vaiaso na te’a nei.

 

I le tali ioe ai o Malo i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i le va o le masina o Aperila ma Iuni o le tausaga e 2017, sa ia taumafai ai e fa’aaoga sese lona tulaga o ia o se Leoleo a le malo, e tauanau ai se ali’i ina ia totogi atu se vaega tupe e tusa ma le $2,000 mo ia.

 

Ina ua maua lona avanoa mai le fa’amasinoga, sa fa’atoese ai loa le ua molia e tusa ai o lana solitulafono. Sa ia talosaga i le fa’amasinoga mo se avanoa e aua ai ne’i lokaina o ia i le toese, ona e leai se isi e tausia lana fanau. O lona to’alua o loo malaga atu o ia i fafo mo ana koleniga i le militeli.

 

Na talosaga lana loia fautua ia Michael White i le fa’amasinoga mo se fa’asalaga fa’a nofovaavaaia. Na lagolagoina fo’i e le loia a le malo ia Christy Dunn le talosaga a le itu tete’e.

 

Saunoa le afioga i le ali’i Fa’amasino Sili ia Michael Kruse e fa’apea, e matuia tele le gaioiga sa faia e le ua molia, i lona fa’aaoga sese lea o lona tulaga o se Leoleo e tauanau ai tupe mai tagata lautele.

 

Na tali le loia a le ua molia ma faapea atu i le fa’amasinoga, e ui ua ta’usala Malo i lenei solitulafono, peita’i na te le’i aumaia se tupe mai le ali’i na a’afia.

 

Na saunoa Kruse ia White e fa’apea, “Ana o a’u o se Komesina o Leoleo, ou te le mana’omia ni Leoleo amio eleelea faapea i totonu o la’u Matagaluega, e tatau fo’i ona e malamalama i le tulaga lea aua sa avea fo’i oe ma Leoleo”.

 

A o le i tuuina atu le fa’aiuga a le fa’amasinoga, na fa’aalu e le fa’amasinoga se taimi e auiliili ai mau faamaonia o lenei mataupu, e pei o le tulaga lenei, i le va o le masina o Aperila ma Me o le tausaga ne’i, na tula’i mai ai se fa’alavelave laititi tau ta’avale i tua o le auala e ui atu i le uafu o lo o taula ai le va’a mai Samoa, le Lady Naomi.

 

O lea fa’alavelave na mafua mai ina ua taia e le loli sa ave e le ali’i na a’afia se ta’avale sa paka ai i tafatafa o le auala. Na taua e le ali’i na a’afia i Leoleo e fa’apea, ao taumafai e fa’asolomuli le Loli a le Ofisa o Galuega a le malo na momoli atu ai se uta, sa fa’afuase’i ona ia so’aina ai le pito o se ta’avale sa paka i tafatafa o le auala, ma fa’aleagaina ai le moli.

 

Na fa’ailoa e Malo i le ali’i na a’afia e fa’apea, afai na te tuuina atu ni pepa sala ia te ia (ticket), e $400 lana tupe e alu ai, ae afai na te fa’amagaloina o ia, e na o le $100 le tupe na te totogiina. Na manatu le ali’i na a’afia e sili pe a totogi na o le $100. O lea na ia fai ai loa ia Malo, o le a ia totogiina le $100, ae fa’atoa mau i le taimi e maua ai lana siaki i le isi vaiaso.

 

Talu mai le taimi lea, e lei toe fetaui lava Malo ma le ali’i na a’afia. Ae i le tuana’i ai o le masina talu ona tuana’i le fa’alavelave, na toe fetaui ai Malo ma le ali’i na a’afia i le maketi i Fagatogo. Na faailoa e Malo i le ali’i lea e fa’apea, talu ai ua ia olegia o ia e uiga i le $100, o le a sui le aofa’i o le tupe na te totogiina atu ia te ia i le aofaiga e $1,000.

 

Na malie le ali’i na a’afia ma ia talosaga ia Malo, se’i maua sana tupe ona totogi atu lea o lana tupe, ona o lea fa’atoa amata i lana galuega fou i le Island Breeze i Fagaalu - e le o toe faigaluega i le Ofisa o Galuega a le malo.

 

Ina ua la fetaui, sa fai loa i ai le ua molia, talu ai ua ie olegia fa’alua o ia, ua sii i le $2,000 le aofa’i o le tupe lea ua ia nofo aitalafu ai ia te ia. Sa le utuva le alu o Malo i le fale faigaluega a le ali’i na aafia ma tauanau mai le tupe.

 

O lo o taua i fa’amaumauga a le fa’amasinoga le talosaga o Malo i se tasi o tagata faigaluega, ina ia fa’atonu le latou Pule e taofi le siaki a le ali’i o lo o a’afia e aua le tuuina i ai, ona o loo aitalafu ia te ia i se vaega tupe tele.

 

Ina ua fesiligia e Leoleo ia Malo e uiga i lenei mataupu, sa ia ioeina ai lona faia o lenei amio i le ali’i na a’afia ma le faanaunauga na te maua mai ai se tupe. Na ioe Malo i lona fa’aaoga le tatau o le malosi sa ia te ia e ala i le tofiga Leoleo, e fa’afefe ai le ali’i na aafia ina ia maua mai ai le tupe.

 

Sa ia taua atili fo’i i Leoleo lona matua naunau lava ina ia ona mauaina le tupe sa ia fai i le ali’i na a’afia e totogi atu, ona o tulaga faaletonu i le itu tau tupe ua a’afia ai lona aiga.

 

O isi tuutuuga o le nofovaavaaia a Malo, e aofia ao lona tuua lea o le atunu’u ae toe fo’i atu i Samoa, ma aumau ai mo le umi o lana nofovaavaaia, peita’i o le a taofia le faataunuuina o lea tuutuuga, se’i vagana ua toe tuuina mai se isi faaiuga a le fa’amasinoga.

 

“O le faaiuga ua tuuina atu mo le ua molia o lo o atagia atu ai, e le mama i le fa’amasinoga le matuia o le moliaga ua ta’usala ai lenei ali’i,” o le saunoaga lea a Kruse.