O le ali’i lea e to’afa i ai pagota na sosola i tua mai le toese i Tafuna i le amataga o le tausaga nei, ua fa’asala e le fa’amasinoga o ia e taofia i le falepuipui mo le 28 masina, o se tasi lea o tuutuuga o lana nofovaavaaia e 7 tausaga, ina ua fa’amaonia moliaga o le gaoi ma le talepe fale sa tu’uaia ai o ia.

O le vaiaso na te’a nei na tu’uina atu ai le fa’asalaga a le Fa’amasinoga Maualuga fa’asaga i le susuga a Timata Naea, o se ali’i e  21 tausaga le matua o lona soifua.

E 3 mataupu tau solitulafono na molia ai e le malo ia Naea. I le mataupu 1, na molia ai o ia i le moliaga o le gaoi. I le tagi lona 2, sa molia ai o ia i moliaga mamafa eseese e aofia ai moliaga e 4 o le gaoi, 3 moliaga o le talepe fale i le tulaga lua, 2 moliaga o le talepe fale i le tulaga muamua, ma le moliaga o le sola ese mai le falepuipui. I le tagi lona 3, na molia ai o ia i le moliaga o le sola ese mai le falepuipui.

I lalo o se maliliega na sainia e le malo ma Naea, na malie ai naea e tali ioe i moliaga e 3 o le gaoi, ma le moliaga e tasi o le talepe fale i le tulaga muamua. O isi uma moliaga o loo totoe ai i tagi e 3 sa fa’aulu e le malo, e aofia ai ma moliaga e 2 o lona sola i tua mai le falepuipui, na malie le malo o le a solofua pe afai ae tali ioe Naea i moliaga mamafa e 4 e pei ona latou malilie i ai.

I le tali ioe ai o Naea i moliaga mamafa e 4, na ia ta’utino ai e faapea, i le aso 7 Setema 2017, na alu ai i totonu o se faleoloa i Nuuuli ma gaoi mai se masini o le ituaiga o le Samsung Galaxy Note 7 tablet e silia i le $100 lona tau.

Sa ia ta’utino fo’i i luma o le fa’amasinoga e fa’apea, i le aso 7 Novema 2017, sa ia ulufale ai i totonu o se fale i Nuuuli i le po ma ia gaoia ni meatotino a le aiga. O mea sa ia gaoia e aofia ai seevae, laptops, sipika, ie toga tele, o se Apple iPad e tusa ma le $5,000 le tau aofa’i.

Na tautino atili le ua molia e fa’apea, o le gaioiga sa ia faia sa le tusa lea ma ala o le tulafono, e leai fo’i se fa’atanaga na tuuina atu ia te ia e ulufale fa’amalosi ai i totonu o faleoloa na a’afia atoa ai ma le fale o le aiga na a’afia.

O le vaiaso na te’a nei na tula’i ai Naea i luma o le Fa’amasinoga Maualuga mo le lauina o lana fa’asalaga. O le afioga i le ali’i Fa’amasino ia Elvis P. Patea sa fofogaina le fa’aiuga a Naea, fa’atasi ai ma le lagolagosua a afioga i ali’i Fa’amasino Lagolago ia Satele Lili’o Satele ma Paepae I. Fai’ai.

O le ali’i loia fautua ia Michael White na tula’i mo Naea i lenei mataupu, ae o le ali’i loia ia Robert Morris na tula’i mo le malo.

Na fa’atoese Naea e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai e tausi lona Tina matua, ua toe lava o ia o lo o totoe i le aiga. Na taua atili e Naea e fa’apea, o masina ia sa taofia ai o ia i le falepuipui, ua ia aoaoina mai ai se lesona taua i lona olaga, e le tatau ona toe ma’imauina aso o lona olaga e nofosala ai i totonu o le toese, ae ua tatau ona fai se suiga lelei mo ia.

Na ta’utino le ua molia, ua lagona lona salamo moni e tusa ai o lana solitulafono, na te le toe faia fo’i se solitulafono fa’apenei i le lumana’i. Sa ia fa’atoese i le malo o Amerika Samoa, o lona nu’u o Faleniu, o lona aiga atoa, ae fa’apitoa ai ia i latou uma na a’afia a latou meatotino i lana gaioiga sa faia.

Na talosaga lana loia i le fa’amasinoga mo se fa’asalaga fa’anofovaavaaia. Na taua e Michael White e fa’apea, o Naea o se ali’i talavou ua sese lana filifiliga sa faia, e mafua mai ina ua pipi’i atu o ia i isi tupulaga lava i totonu o le nu’u, ma latou inupia fa’atasi atu ai lava i le leva o le po, seia oo ina fa’aosoosoina i latou e fa’atino loa gaioiga e soli ai ma le tulafono.

Na faailoa e White i le fa’amasinoga e fa’apea, ua lagona e Naea lona salamo moni e tusa ai o lana solitulafono, ma ua ia mana’omia fo’i se avanoa e toe fo’i ai i lona aiga. Na talosaga White mo se fa’asalaga fa’anofovaavaaia, ma ia aofia le umi lea ua mae’a ona ia tuliina i le toese e fai ma ana fa’asalaga i lenei mataupu.

Na lagolagoina e le loia a le malo le talosaga ina ia faasala le ua molia i se fa’asalaga faanofovaavaaia, e aofia ai ma sina taimi na te tuliina i le toese i Tafuna.

A o le i tuuina atu le fa’aiuga a le fa’amasinoga, na fesili Patea i le loia a le malo, pe faapefea le tulaga o le toe totogiina lea o le taui mo meatotino a aiga ma pisinisi na a’afia. Na tali le loia a le malo, sa latou feutana’i ma sui o aiga ma pisinisi o loo aafia i lenei mataupu i le masina o Novema o le tausaga na te’a nei, ma o loo latou talosagaina le tatau lea ona toe totogi atu a latou meatotino.

Na avea le fesili a le fa’amasino ma itu na fa’atoa talosagaina ai e le malo le tatau lea ona faatonu Naea e totogi le $5,000 mo mea sa fa’aleagaina ma gaoia mai aiga ma pisinisi na a’afia.

E 7 tausaga na manatu le fa’amasinoga e loka ai Naea i le toese, peita’i ua fa’amalumalu lona tuliina o lea fa’asalaga, ae o le a nofovaavaaia o ia mo le umi e 7 tausaga i lalo o tuutuuga e ao ona usita’i i ai. O ni isi o ia tuutuuga e aofia ai lona tuliina o masina e 28 i le toese i Tafuna, e aofia ai ma le umi lea sa taofia ai o ia e fa’atali ai se fa’aiuga o lana mataupu.

Afai ae magalo mai tua, e tatau ona saili sana galuega e galue tumau ai i totonu o le 90 aso.  E le i poloaina e le fa’amasinoga Naea na te totogiina se tupe mo mea sa fa’aleagaina. Saunoa Patea e fa’apea, o le a faila e le malo i se isi a latou talosaga le manaoga ina ia totogi e le ua molia le tupe mo le taui o meatotino sa ave fa’agaoi i lenei mataupu.