Ads by Google Ads by Google

Falepuipui le ali’i na ia osofaia fale teuoloa a le StarKist ma le NAPA


[ata: foa'i]
ausage@samoanews.com

O le ali’i e 31 tausaga le matua lea na ta’usala i lona ulufale fa’amalosi i totonu o le fale teuoloa a le kamupani o le StarKist, sosoo ai ma lona osofaia o le kamupani a le NAPA, ua fa’asala e le fa’amasinoga maualuga o ia e taofia i le toese i Tafuna.

 

E 28 masina na manatu le fa’amasinoga e tatau ona fa’asala ai Tuuaifuaina Vaapuu i le falepuipui i Tafuna, ae talu ai talosaga a loia faapea ai ma le molimau a lona faletua, ua manatu ai le fa’amasinoga, ua lava na o le 8 masina e loka ai o ia i totonu o le toese.

 

Na ulua’i tu’uaia e le malo ia Va’apu’u i moliaga mamafa o le talepe fale i le tulaga muamua atoa ai ma le gaoi, o vaega C uma ia o solitulafono mamafa. Ae i lalo o se maliliega na sainia e le malo ma ua talia fo’i e le fa’amasinoga, na malie ai Va’apu’u e tali ioe i le moliaga na toe teuteu e le malo, le moliaga o le talepe fale i le tulaga 2.

 

I le tali ioe ai o Va’apu’u i le moliaga e pei ona ta’usala ai o ia, sa ia taua ai e fa’apea, i se taimi o le aso 31 Mati, 2018, sa ia ulufale faamalosi ai i totonu o le fale teuoloa a le StarKist i Tafuna ma le fa’amoemoe e fa’atino ai se solitulafono i totonu.

 

A o i ai i totonu o le fale, sa ia gaoia ai se computer e tusa ma le $896 lona tau, ma se ato computer e $30 lona tau. Na ta’utino atili Va’apu’u e fa’apea, o mea totino sa ia gaoia, e patino i se tasi o tagata faigaluega.

 

Na taua atili e le ua molia e fa’apea, i le aso 1 o Mati, 2018 na ia ulufale fa’amalosi ai fo’i i totonu o le NAPA i Tafuna, ma le fa’amoemoe e fa’atino ai se solitulafono i totonu.

 

A o i ai i totonu o lea fale, sa ia gaoia ai ni oloa e aofia ai se pusa suauu e tusa ma le $54 lona tau, atoa ai ma totoga o taavale e tusa ma le $136 le tau aofa’i.

 

O le aso Faraile o le vaiaso na te’a nei na tula’i ai Va’apuu i luma o le fa’amasinoga maualuga mo le lauina o lana fa’asalaga. O le ali’i loia fautua ia Michael White na tula’i mo ia, ae o le ali’i loia sili algolago ia Jason Mitchell na tula’i mo le itu a le malo.

 

Ina ua maua lona avanoa e fa’aleo ai lana talosaga fa’ai’u a o le i tuuina mai le fa’asalaga a le fa’amasinoga, na fa’atoese ai le ua molia e tusa ai o lana solitulafono. Sa ia fa’atoese i le fa’amasinoga faapea ai le malo o Amerika Samoa. E le i fa’atoese o ia i kamupani na a’afia i lana solitulafono, poo le tagata faigaluega e ana le masini computer sa ia gaoia.

 

Na taua e Vaapuu e fa’apea, i lona talitonuga o loo i ai, e le mafai ona suia lona olaga se’i vagana ua suia ona manatunatuga. Sa ia ta’utino e fa’apea, a o i ai i totonu o le toese, sa ia fesili i le Atua pe aisea ua saisaitia ai lona olaga i totonu o le falepuipui.

 

“Sa talanoa mai le Atua i lo’u loto ma fa’ailoa mai ia te a’u e fa’apea, e i ai le mafua’aga na ala ai ona ia tuuina a’u i totonu o le falepuipui. E finagalo le Atua ia ou a’oa’oina se lesona taua mai lo’u olaga sese ma le agasala sa i ai,” o le fa’amatalaga lea a Vaapuu.

 

Sa ia taua atili e fa’apea, soo se mea lava e tupu e i ai lona mafua’aga, o le ala fo’i lena e talitonu atoatoa ai lona mafaufau, e i ai le polokalame fa’apitoa a le Atua mo ia, ua mafua ai ona tuuina atu o ia i le falepuipui.

 

I le fa’aiuga o lana talosaga, sa ia talosaga ai i le fa’amasinoga mo se avanoa e toe fo’i atu ai i tua e tausi lona aiga.

 

Na molimau le faletua o Vaapuu ma ia taua ai i le fa’amasinoga e fa’apea, o le ua molia o se tagata faigata. O ia fo’i na mafua ai ona taofia o ia i le toese, ona o lona manatu ia aoaoina e lona to’alua se lesona taua mai le olaga sa ia ola ai. Na faai’u le molimau a le faletua a le ua molia i lona talosagaina lea o le fa’amasinoga ina ia tuu se avanoa i lona to’alua e toe fo’i atu ai i tua e fesoasoani i le tausiga o le la aiga.

 

Na tutu fa’atasi loia a itu e lua e finau i le fa’amasinoga mo se fa’asalaga faanofovaavaaia mo Vaapuu. Na taua e le loia a Vaapuu e fa’apea, e agava’a le ua molia i se fa’asalaga faanofovaavaaia, e le gata ua suia lona olaga, ae o le taimi muamua fo’i lenei fa’atoa solitulafono ai o ia. Ae sili ai i lo lena, ua uma ona toe fa’afo’i le masini computer na gaoia e le ua molia.

 

Na lagolagoina e le loia a le malo le talosaga a White, ma ia finau fo’i i le fa’amasinoga, ina ia fa’anofovaavaaia Vaapuu.

 

Saunoa le afioga i le ali’i Fa’amasino Sili lagolago ia Elvis P. Patea e fa’apea, mai le tele o tagata solitulafono ua oo atu i luma o le fa’amasinoga, e tulaga ese ai lava le ali’i o Va’apu’u, ona o le meaalofa o le fa’asoa e pei ona fa’aalia i le taimi o lana folasaga fa’ai’u.

 

O le tele fo’i o mataupu tau solitulafono e oo atu i luma o le fa’amasinoga, e tofu lava le mataupu ma mau fa’amaonia, e le tutusa uma fo’i mataupu ta’itasi.

 

I le mataupu a Vaapuu, sa faigata i le fa’amasinoga ona talitonuina le saunoaga a le ua molia. Ona sa ia taua lona salamo faamaoni e tusa ai o lana solitulafono sa faia, atoa ai ma lona fa’ailoa i lana loia, ua uma ona toe fa’afo’i le masini computer sa ia gaoia.

 

Ae i le ripoti sa saunia e le Ofisa Faanofovaavaaia, o loo taua ai se fa’amatalaga a Vaapuu sa tuuina atu i le sui o le Ofisa Faanofovaavaaia, lea o loo taua ai lona fa’atau atu o le masini computer i se tasi o ana uo.

 

O ni isi o tuutuuga o le faasalaga faanofovaavaaia a Vaapuu e 7 tausaga, e aofia ai lona tuliina o masina e 28 i le falepuipui, peita’i, ua manatu le fa’amasinoga, ua lava masina e 8 e taofia ai o ia, e aofia ai ma le umi e silia i le 5 masina lea ua mae’a ona ia tuliina i le toese, e fai ma ana fa’asalaga i lenei mataupu. Ua poloaina fo’i o ia na te totogi le $136 mo oloa sa ia gaoia mai le NAPA.

 

Ua fa’asa ona ia toe alu i le lotoa a le NAPA poo le lotoa o le fale teuoloa a le StarKist i Tafuna, fa’asa fo’i ona ia toe alu i soo se vaega o loo i ai Stand Taxi i Tafuna.