O le vaiaso na te’a nei na fa’asala ai e le Fa’amasinoga Maualuga le ali’i ave taxi lea na osofa’i e Leoleo lana ta’avale i le masina o Novema o le tausaga na te’a nei, ma maua i ai vaega o le pauta fa’asaina o le aisa.

E 20 masina lea ua fa’asala ai e le faamasinoga ia Taisia Lemalie e taofia ai o ia i le toese i Tafuna, o se tasi lea o tuutuuga o lana nofovaavaaia e 5 tausaga. Afai ae mae’a ona tuli lana fa’asalaga fa’a falepuipui, ona ia tuua lea o Amerika Samoa ae toe fo’i atu i lona aiga i Samoa, e le mafai ona ia toe ulufale mai i le teritori i le taimi atoa o lana nofovaavaaia.

O Lemalie, o se tasi lea e to’atolu i ai ali’i na pu’e fa’apagota e Leoleo, ina ua latou osofaia ni nofoaga se 2 i le taeao o le aso 9 o Novema, 2017, i lalo o se poloaiga mai le Fa’amasinoga e fa’ataga ai Leoleo ona latou saili nofoaga ma meatotino a i latou nei e to’atolu. O i latou ia e aofia ai Cody Wood Jr, Steven Tuatoo ma Lemalie.

Na osofaia muamua e Leoleo ia Taputimu ma pu’e fa’apagota mai ai Wood Jr, sosoo ai ma le pu’e fa’apagota o Tuatoo mai lona fale i Alofau, mulimuli ai loa pu’e fa’apagota Lemalie ina ua taofi e Leoleo lana ta’avale i luga o alatele i Pago Pago.

Na saili e Leoleo le tino o Lemalie ma maua i ai se paipa o lo o tumu i vaega o le pauta o le aisa. Sa maua ai fo’i isi vaega e fa’aaoga e i latou e tuleiina fualaau fa’asaina e pei o se seleulu, straws e tipi tulimanu atoa ai ma ni tama’i pepa iila e fa’aaoga e utu ai i totonu o le aisa.

Na ulua’i tu’uaia e le malo ia Lemalie i le moliaga mamafa o lona umia fa’asolitulafono lea o vaega o le pauta fa’asaina o le aisa, o se solitulafono e mafai ona fa’asala ai o ia i le toese mo le umi e le itiiti ifoi le 5 tausaga, pe fa’asala fo’i i le salatupe e le itiiti ifo i le $5,000. A i lalo o le maliliega na sainia e Lemalie ma le malo, na malie ai le ua molia e tali ioe i le moliaga lea ua toe teuteu e le malo le mamafa o lona fa’asalaga.

I le tali ioe ai o Lemalie i le moliaga e pei ona ta’usala ai o ia, sa ia ta’utino ai e fa’apea, i le taeao o le aso 9 o Novema, 2017, sa ia umia faasolitulafono ai vaega o le fualaau fa’asaina o le aisa e aunoa ma se fa’atanaga fa’aletulafono.

O le vaiaso na te’a nei na tula’i ai Lemalie i luma o le fa’amasinoga maualuga mo le lauina o lana fa’asalaga.

O le ali’i loia fautua mo tagata lautele ia Michael White na tula’i mo ia, ae o le ali’i loia sili lagolago ia Woodrow Pengelly na tula’i mo le itu a le malo.

Ina ua maua lona avanoa, na fa’atoese ai loa Lemalie e tusa ai o lana solitulafono sa faia. E le gata na fa’atoese i le fa’amasinoga, ae na fa’atoese fo’i i tagatanu’u ma le malo o Amerika Samoa, i lona le usitaia lea o tulafono a le malo.

Na faailoa e Lemalie i le fa’amasinoga, o le gaioiga sa ia faia ua atagia mai ai o ia o le tagata leaga ma le agasala. Sa ia taua fo’i lona aoaoina o se lesona taua mai masina e 10 na taofia ai o ia i le falepuipui. Sa ia talosaga i le fa’amasinoga mo se avanoa e toe fo’i atu ai e tausi lona aiga.

Na lagolagoina e lana loia lana fa’atoesega, ma faailoa ai e lana loia i le fa’amasinoga e fa’apea, ua matua salamo moni lava Lemalie, ua ia aoaoina fo’i se lesona taua i lona olaga. Na talosaga White i le fa’amasinoga ina ia talia le fautuaga o loo tuuina mai i totonu o le Ripoti a le Ofisa Faanofovaavaaia, ina ia faasala le ua molia i se fa’asalaga faanofovaavaaia.

Na lagolagoina e le loia a le malo le talosaga a White, ma ia fa’ailoa atu ai loa i le fa’amasinoga tuutuuga o le latou maliliega ma Lemalie, lea o loo taua ai le fa’asala o ia i se fa’asalaga faanofovaavaaia.

E 2 mataupu sa fia malamalama i ai le afioga i le ali’i fa’amasino sili ia Michael Kruse, a o le i tu’uina atu lana fa’aiuga mo Lemalie. E le gata sa fia malamalama po o ai e ana le taxi na fealua’i ai Lemalie, ae na fia malamalama fo’i i le mafua’aga na ala ai ona fa’aauau pea ona faigaluega Lemalie o se ave taxi, ae  o lona ID mai le Ofisa o Femalagaaiga e fa’ataga ai ona galue i le teritori, na muta lona aoga i le tausaga e 2014.

“E tatau i le malo ona vaavaai toto’a i ituaiga mataupu fa’apenei. E tusa ai ma le ripoti a le Ofisa Faanofovaavaaia, ua silia ma le 4 tausaga talu ona le toe aoga le ID e fa’ataga ai ona galue le ua molia, ae o lo o fa’aauau pea ona galue o ia o se ave taxi la’u pasese,” o le saunoaga lea a Kruse.

Na saunoa atili le afioga i le ali’i Fa’amasino e fa’apea, o le gaioiga sa faia e Lemalie i le mataupu e pei ona ta’usala ai o ia, e matua sili lava ona matuia.

E 5 tausaga na manatu le fa’amasinoga e faasala ai le ua molia i le falepuipui, peita’i ua fa’amalumalu lona tuliina o lea fa’asalaga fa’a falepuipui, ae ua nofovaavaaia o ia mo le umi e 5 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20 i le toese, ma totogi le salatupe e $2,000. A mae’a ona tuli lana fa’asalaga fa’a falepuipui, ona ia tuua lea o le atunuu, e le fa’atagaina o ia ona toe ulufale mai i totonu o le 5 tausaga o lana nofovaavaaia.

Na fa’atonu e Kruse le loia a le malo ina ia tuuina atu le kopi o le fa’aiuga a le fa’amasinoga i le Pule o le Ofisa o Femalagaaiga, ina ia latou silafia ai tuutuuga mo Lemalie, ma ia mautinoa e aofia lona igoa i le lisi o tagata e le tatau ona toe ulufale mai i le atunu’u.

E 10 masina lea ua mae’a ona tuli e Lemalie i le toese talu mai le masina o Novema o le tausaga na te’a nei na pu’e fa’apagota ai o ia e Leoleo. Lona uiga, toe 12 masina o lana fa’asalaga o lo o totoe.

O mataupu a Wood Jr ma Tuatoo, o lo o fa’aauau pea ona fa’agasolo i luma o le fa’amasinoga maualuga i le taimi nei. O le tausaga fou lea ua fa’atulaga e faia ai le fa’amasinoga autu a Wood Jr ae o le tausaga e 2020 ua fa’atulaga e faia ai le fa’amasinoga autu a Tuatoo.