Ads by Google Ads by Google

Faila malo moliaga fa’aopoopo fa’asaga ali’i Leoleo ia Mosese Lomu


[ata: SN]
ausage@samoanews.com

O le vaiaso na te'a nei lea na faila ai e le malo le isi moliaga fa’aopoopo fa’asaga i le ali’i Leoleo ia Mosese Lomu, e mafua mai lava i le mataupu e pei ona tu’uaia ai o ia ma isi Leoleo sa galulue i le toese i Tafuna e to’atolu, i lo latou a’afia lea i le mataupu e pei ona sola ai i tua se ali’i pagota ma fana se ali’i i Leone i le masina o Aokuso na te’a nei.

 

O le moliaga fou ua faila fa’asaga ia Lomu, o lona fa’alavelave lea i le molimau a le malo. O se solitulafono o le vaega D i le fa’atulagaina o solitualfono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe mo le umi e le silia i le $5,000.

 

O le aso Lulu na fa’atulaga e faia ai le ulua’i iloiloga a Lomu. A o le i fa’ataunu’uina le ulua’i iloiloga, na muamua fa’agasolo le iloiloga mo le moliaga fou lea ua faila fa’asaga ia te ia.

 

O le mae’a ai ona faila e le malo o le moliaga fou fa’asaga ia Lomu, na fa’atulaga ai loa e le afioga i le ali’i Fa’amasino ia Fiti Sunia le tupe e $5,000 e totogi, ona fa’atoa mafai lea ona tatala o ia i tua.

 

Na finau le loia a Lomu ia Ryan Anderson i le fa’amasinoga ina ia fa’aaoga le tupe lea na totogi e Lomu i lana ulua’i mataupu e tatala ai o ia i tua mai le mataupu fou lea ua faila e le malo. Na tete’e le loia a le malo ia Woodrow Pengelly i le talosaga a le loia a Lomu.

 

Na taua e Pengelly e fa’apea, e fai lava si matuia o le tagi fou lea ua faila fa’asaga ia Lomu. O ia tu’uaiga e aofia ai lona taumafai e fa’afesoota’i molimau a le malo, e ui o lea sa fautuaina o ia e le fa’amasinoga e aua ne’i taumafai e fa’afeso’ota’i molimau a le malo.

 

Na teena e le afioga a Sunia le talosaga a le itu tete’e, ma fa’atulaga ai loa e le fa’amasinoga le tupe e $5,000 e totogi e tatala ai Lomu mo le mataupu fou ua faila fa’asaga ia te ia.

 

Na toe fautuaina e Sunia ia Lomu ina ia aua ne’i toe taumafai e fa’afesoota’i molimau a le malo i soo se auala. Afai na te le usitaia lea poloaiga, e ono avea lea ma auala e fa’aleaoga ai loa le avanoa o loo tatala ai o ia i tua.

 

ULUA’I ILOILOGA

 

O le ulua’i iloiloga a Lomu lea na fa’ataunuuina i le vaiaso nei, na faavae lea i luga i le ulua’i tagi na faila e le malo fa’asaga ia te ia.

 

I le tagi muamua fa’asaga ia Lomu, o loo tu’uaia ai o ia i moliaga mamafa e 2. O ia moliaga e aofia ai le faia o gaioiga fa’asolitulafono, atoa ai ma le fa’aleagaina o fa’amaumauga fa’alaua’itele. O ia moliaga o le vaega C lea o solitulafono mamafa, lea e mafai ona fa’asala ai se tasi i le toese mo le umi e le siliai le 7 tausaga, pe fa’asala fo’i i le salatupe e le silia i le $5,000.

 

E tasi le molimau na valaau e le malo i le taimi o le ulua’i iloiloga a Lomu, o le ali’i Leoleo Suesue lea ia Det. Justin Thomsen, lea sa taitaia le suesueina o lenei mataupu.

 

Na taua e Thomsen i lana molimau e fa’apea, o le vaveao o le aso 12 o Aokuso, 2018 na logoina ai o ia e le ali’i Leoleo Lutena ia Lt. Kolia Solaita, e fa’atatau i se fa’alavelave na manu’a ai se ali’i mai Leone i se fana, ma o lo o taua ai le igoa o le ali’i pagota ia Manu Lefatia.

 

Pe tusa o le itula e 3:30 i le vaveao o le aso lava lea, na fa’afesoota’i ai loa e Leoleo Sinia na auai i le suesueina o lenei mataupu le Toese i Tafuna, ina ia siaki le potu o loo loka ai Lefatia e vaai poo i ai o ia. O le tali sa tuuina mai e Leoleo o le Toese, o lo o i ai Lefatia i totonu o lona sela.

 

A o fa’agasolo suesuega a Leoleo i le taeao lava lea, na maua ai loa e Thomsen se fa’amatalaga mai se tasi o Leoleo o le toese, susuga ia Soliai, e fa’atatau i se taumafaiga a Lomu ma isi Leoleo ina ia tumau i latou i le latou fa’amatalaga e tasi pe a fesiligia e Leoleo. O lea fa’amatalaga, o le fa’ailoa lea i Leoleo, sa amata mai lava le siakiina o pagota i totonu o latou sela mai le itula e 11:00 i le po o le aso 11 o Aokuso, seia oo mai lava i le itula e 3:00 i le vaveao o le aso 12 o Aokuso.

 

Na taua e Thomsen i lana molimau e fa’apea, na manino i lana suesuega, e na o le tasi lava le taimi na siaki ai e Lomu ma lana Sifi totonu o sela o loo taofia ai pagota, e na o le itula e 11:00 i le po o le aso 11 o Aokuso. Fa’atoa toe siaki lava i le itula e 3:30 i le vaveao o le aso na sosoo ai, ina ua talosagaina e le Ta’ita’i Leoleo ia Foifua Foifua se gaioiga e siaki ai le sela a Lefatia poo i ai o ia.

 

Na taua atili e le ali’i Leoleo i lana molimau e fa’apea, na maua i lana suesuega le faia lea e le tama’ita’i Leoleo ia Viopapa Vitolio o ni suiga i totonu o le api sa tusia ai fa’amaumauga i mea e tutupu ma galuega fa’atino i le Toese, ina ia fa’ailoa ai, e ta’i 30 lava minute ma alu le siaki a Leoleo i totonu o le lotoa. Ae o le mea moni lava, e leai se mea fa’apea sa tupu.

 

Na mafua ona faia suiga e Vitolio, ona o le fa’atonuga sa tuuina atu e le susuga a Lomu, o ia lea o le Ta’ita’i Uati i lea taeao.

 

Ua i ai le fa’amoemoe o se taimi o le vaiaso nei e tuuina mai e le afioga i le ali’i fa’amasino ia Sunia sana fa’aiuga e fa’atatau i lenei mataupu.