Ads by Google Ads by Google

Faila e le malo moliaga fou fa’asaga ia Sio Godinet Jr


[ata: SN]
ausage@samoanews.com

I le toe faila ai e le malo o le latou tagi fa’asaga ia Sio Godinet Jr talu mai le taimi na solofua ai e le Fa’amasinoga Fa’aitumalo i le 2 vaiaso talu ai, ua atagia mai ai le i ai o moliaga fou e 4 ua fa’aopoopo e le malo i le pepa o le tagi ua latou fa’aulu, fa’atasi ai moliaga tuai e 4 na ulua’i tu’uaia ai le ua molia.

 

O moliaga fou e fa lea ua faila e le malo fa’asaga ia Godinet, e aofia ai le umia faasolitulafono o le pauta oona o le aisa ma le fa’amoemoe e tule’i ma fa’atau atu; umia faasolitulafono o le pauta oona o le aisa; umia fa’asolitulafono o le fualaau fa’asaina o le mariuana ma le fa’amoemoe e tulei maf a’atau atu; atoa ai ma le umia fa’asolitulafono o le fualaau fa’asainaole mariuana.

 

O ia moliaga na afua mai i le fa’alavelave lea na osofa’i ai e Leoleo le fale o Godinet i le afiafi o le aso 15 Me, 2018, ma tu’uaia le maua ai o se vaega tele o fualaau fa’asaina o le aisa ma le mariuana, atoa ai ma le tele o mea e fa’aaoga e utu ai fualaau fa’asaina ma le fa’amoemoe e fa’atau atu i si tagata.

 

O moliaga tuai e 4 o loo tu’uaia ai e le malo le ua molia, e tutusa lelei lava ma moliaga fou e 4 e pei ona taua i luga.

 

O moliaga tuai e 4 fa’asaga ia Godinet, na afua mai i le fa’alavelave lea na tula’i mai i le masina o Aperila o le tausaga nei, ina ua fa’atulaga e Leoleo se fa’atauga faapitoa, e ala i le fa’aaogaina o se molimau fa’atuatuaina, ma ia fa’atau mai ai fualaau fa’asaina mai le isi tagata o loo molia fa’atasi ma Godinet, o ia lea o Merika Lomu, mai totonu o se ta’avale a le ua molia, e ala i le tu’u atu i ai o le tupe ia Lomu, ae tuu atu e Lomu fualaau faasaina o le mariuana i le molimau i luma o Godinet.

 

O le aso 18 Iulai lea ua fa’atulaga e faia ai le ulua’i iloiloga o le mataupu a le ua molia i luma o le afioga i le ali’i fa’amasino ia Sunia, e iloilo ai e le fa’amasinoga mau a le malo, pe lava ma totoe e tofu atu ai le mataupu a le ua molia i luma o le fa’amasinoga maualuga.

 

E pei ona taua i le tagi a le malo, o le mataupu fa’asaga ia Godinet na tofu atu i le Vaega Faapitoa o Leoleo o loo suesueina fualaau fa’asaina i le masina o Fepuari o le tausaga nei, ina ua fa’ailoa i ai e se molimau fa’atuatuaina le faia lea o fefa’atauaiga o fualaau fa’asaina i le fale o Godinet i Pago Pago.

 

Na taua e le molimau i Leoleo lona vaaia o tagata e to’atele o loo aga’i atu i le fale o Godinet i Pago Pago ma fa’atau mai ai fualaau fa’asaina o le mariuana ma le aisa, e amata mai lava i le afiafi po ma fa’asolo atu ai i le po atoa seia oo lava i le taeao.

 

Na taua atili e le molimau i Leoleo lona fa’alogoina lea o se talanoaga a Godinet ma se tasi o ali’i, o loo faailoa i ai e Godinet le tulaga manuia ua i ai lana pisinisi o le fa’atauina atu lea o fualaau fa’asaina, lea e pei ona la galulue fa’atasi ai ma Lomu, ma ua vaaia fo’i le tupu ma ua to’atele tagata ua aga’i atu e fa’atau i lana pisinisi.

 

Sa taua e le molimau i Leoleo lona vaaia o Lomu o ia tuu atu pepa o loo i ai mariuana ma aisa i tagata fa’atau i le fale o Godinet. Na te vaaia fo’i tagata e fa’aaogaina fualaau faasaina, e aga’i atu i le fale o Godinet ma tupe ae fo’i mai ma pepa iila o loo i ai vaega o fualaau fa’asaina o le mariuana poo le pauta o le aisa.

 

Na faailoa e le molimau i Leoleo e fa’apea, o tagata uma sa masani ona fa’atau ia Lomu ao ia tuleiina fualaau fa’asaina i Fagatogo, ua aga’i uma atu i le nofoaga fou i Pago Pago, le fale o Godinet, lea ua avea nei ma nofoaga fou o loo tulei ma fa’atau mai ai e Lomu fualaau fa’asaina i ana tagata fa’atau.

 

O ni isi o taimi, e fesuisuia’i ai ta’avale e fa’aaoga e Godinet ma Lomu e fai ai kiliva o fualaau fa’asaina, ona o le taumafaiga ia faigata ona mateia i laua e Leoleo.

 

O le fale foga falelua a Godinet, o le fale lea na fa’ailoa e le molimau i Leoleo, o loo avea ma nofoaga o loo utu ma tuu pepa ai fualaau fa’asaina, ma le fa’amoemoe e tulei ma fa’atau atu i tagata fa’atau.

 

I le maua ai e Leoleo o fa’amatalaga uma e pei ona taua e le molimau, na fa’atulaga ai loa e Leoleo se fa’atau faapitoa e fa’aaoga ai le molimau, ina ia mautinoa e fa’amaonia tuuaiga o loo tulei ma fa’atau atu e Lomu ma Godinet fualaau fa’asaina.

 

I le masina o Aperila o le tausaga nei, na fa’atino ai loa e Leoleo se fa’atau faapitoa, e ala i le fa’aaogaina o le latou molimau fa’atuatuaina. Na tuu e Leoleo le tupe i le molimau, na faafesootai lea e le molimau ia Lomu ma faailoa i ai lona mana’o e fia fa’atau mai sana taga mariuana.

 

I le aso na faia ai le fa’atau, sa malaga atu ai Lomu ma Godinet i le ta’avale a Godinet. Sa aga’i atu le molimau ma tuu le tupe ia Lomu, ona tago lea o Lomu ma aumai le pepa iila o loo i ai mariuana ma tuu atu i le molimau ao vaai i ai Godinet. Na fo’i le molimau ma ave le pepa sa i ai mariuana i Leoleo.

 

I le aso 15 Me o le tausaga nei, na osofa’i ai loa e Leoleo le fale o Godinet i Pago, i lalo o se poloaiga a le fa’amasinoga. O se tasi o potu tuufua i le fale foga falelua a Godinet na maua i ai e Leoleo ia Lomu ma le alii o Lyon Grey ma se vaega tele o fualaau fa’asaina, e foliga mai o loo galulue i laua e utu pepa fualaau fa’asaina.

 

Sa maua ai fo’i e Leoleo ma se isi ali’i e igoa ia M.F o loo taumafai e lafi i le isi itu o le fale. E le i maua Godinet i totonu o le tama’i potu lea sa maua i ai fualaau fa’asaina, ae sa maua i totonu o le isi ona fale.

 

E ese mai i fualaau fa’asaina, sa maua ai fo’i se tinoitupe tele, atoa ai ma vaega e fa’aaoga e utu ai fualaau fa’asaina ma le fa’amoemoe e tule’i atu i isi tagata.

 

Na taofia uma e Leoleo i latou e to’afa na maua i le fale o Godinet, peita’i ina ua faila e le malo le latou tagi, e na o le to’atolu i latou na molia. O i latou ia e aofia ai Godinet, Lomu ma Grey. O le alii o M.F e lei molia, ae na toe tatala i tua e Leoleo.

 

E $50,000 le tinoitupe lea ua fa’atulaga e totogi ona fa’atoa mafai lea ona tatala Godinet i tua mai le toese i Tafuna.