O lenei tausaga ua toe pale ai fo’i le Faia’oga mai le aoga maualuga a Tafuna i le fa’ailoga, “Faia’oga o le Tausaga.” O ia lea o Edney Apulu ma o ia fo’i o le taitaifono o le Social Studies i le aoga maualuga.

I se saunoaga fa’afetai a le ali’i faia’oga, sa ia fa’aalia ai lona agaga faafetai tele i lana vasega, ma le fanau a’oga i le Laumua o le Toa, le susuga fo’i le Pule A’oga Tutuila Togilau ma le tama’ita’i sui pule a’oga, le vasega o faia’oga, i latou sa latou filifili ina ia fa’aulu o ia i lenei tausaga.

Sa ia fa’afetaia le Fa’atonu sili o Aoga, Dr. Ruth Matagi-Tofiga, ma le komiti filifili na latou sailia e ala i aiaiga fa’ataoto a lenei polokalama mo faia’oga, lona sui fa’atauva’a.

O Apulu ua atoa nei le 8 tausaga talu ona faia’oga i Tafuna, ma o lea fo’i lana galuega na taliu mai loa ua mae’a kolisi i fafo.

“O le ausia ai o lenei fa’ailoga, ua ou fa’afetaia ai le avanoa na ou maua e avea ai ma faia’oga, ina ia a’oa’oina fanau a le tatou atunu’u, ia popoto ma atamamai, ia mafai fo’i ona latou tutu mai i o latou taimi ua matutua ma agava’a, e toe fa’afo’i se sao mo le malo na fa’afaileleina i latou a’o fa’ato’a soifua mai,” o le saunoaga lea a Apulu.

“Fa’afetai i le tapua’iga a nai o’u matua ae maise Mom, ma le matou aiga atoa i Nuuuli. Fa’afetai le tatalo mo i matou le fanau ina ia manuia.”

“Fa’amalo fa’apitoa i nai uso a faia’oga sa matou aofia i lenei taumafaiga, mautinoa o a’u nei ae o outou a taeao. Tau ina ia tatou maua le malosi fa’alemafaufau, le agaga e a’oa’oina ai fanau a le tatou atunu’u ma onosa’i tele lava. O la outou pule lea!”

“O le ausia ai ona maua o lenei fa’ailoga, o se miti ua tino mai, ma o le a avea lea aoga lelei, e toe fa’aosofia atili ai le fiafia, e a’oa’o le fanau i potu a’oga.”