Ads by Google Ads by Google

FAIA'OGA & PULE A'OGA FAGAITUA HIGH - O I NUU TUFA LIPOTI FANAU A'OGA


[ata: foa'i]

Ua faia le suiga fou e le A'oga Maualuga a Fagaitua Vikings, ua le toe fa'atali sei o mai Matua i totonu e talatalanoa i togi o fanau ma piki atu Lipoti o latou Fanau mo lenei kuata o le aoga ua mae'a.

 

"O lea ua faia le suiga tele, o le a masi'i matou i tua i afio'aga e nonofo ai mo taimi atofa ina ia o ane i ai matua, fa'afaigofie fo'i ia i latou ma le tau o mai e fa'atali le pasi ae sili ai na'o le o ane lava i le nofoaga ua fa'ailoa atu mo le latou nu'u e avatu ai lipoti o latou alo,” o se tala lea a le alii Pule A'oga Butch Ta'ase.

 

O le fa'atulagaga lenei o taimi ma nu'u o le a tufa atu ai Ripoti o fanau a'oga i Fagaitua i matua:

 

Mo le motu o Aunu'u e malaga atu i ai le ali'i Pule A'oga, Sui Pule A'oga Danielle Mose ma sui faufautua a le Vasega Fa'aiuaso o lenei tausaga. Mai le itula e 8:00 se'ia pa'ia le itula e 9:30 i le taeao lava o le aso Faraile lea.

 

Ona soso'o mai lea ma le nu'u o Onenoa i Sasa'e se'ia o'o i Alofau o le a fa'amaopoopo le vasega o Faia'oga, Faufauatua, Pule A'oga ma le Sui Puleaoga i le faletalimalo o le Aiga o Utu i Amouli mo le taua'aoina atu o tatou Ripoti o le fanau. O itula i lea nofoaga e amata mai le 10:30 se'ia o'o i le 1:30 i le aoauli. O le a umi lea taimi ona o lo'o tele afio'aga o aofia i lea nofoaga e fa'atasi ane i ai.

 

Soso'o lea ma le afio'aga o Lauli'i i le faletalimalo o Vaimaona. O itula e faia ai lea fa'atasiga iina e amata mai le 2:00 i le 4:00 i le afiafi, o le aso Faraile lava lea.

 

O le afio'aga i Aua lea ua fa'atulaga ai le faletalimalo o Paopao ina ia pa'au uma atu i ai matua e talatalanoa ma feiloa'i ma faia'oga ae maise o Faufautua o vasega a tou fanau. O le a taua'ao atu ai fo'i latou lipoti ma e mafai fo'i ona fa'afesiligia nisi o mea e mana'omia ona iloa i le amio a lou alo i le vasega, ma lona soifua taumafai i le a'oga.

 

Ua fautuaina fo'i e taua tele ona susu mai le mamalu o matua ua tausaga i'u lou alo i le a'oga i lenei tausaga. E tatau ona iloa lelei, afai o maulalo togi o lou alo, e mafai ona i ai le 10 aso e toe talosagaina ai se fa'asa'oga o lona togi, po'o se isi fo'i galuega fa'aopoopo e tu'uina i lou alo ina ia toe fa'aoso ai ona togi i le togi e mafai ai ona fa'au'u.

 

Manatua e na'o le 10 aso mai le aso ua taua'aoina ai le lipoti e mafai ai ona fa'aulu talosaga fa'apenei, a uma, ona tumau loa lea o togi o le fanau.

 

O se isi fo'i tala mai le Laumua o le Vikings i Fagaitua, o le a faia ai se sauniga lotu fa'apitoa a le A'oga mo se tasi o le fanau aoga ua leiloa i le tai i Tula, ma ua o'o lava i lenei aso ananafi e le'i toe maua lona tino. O le aso tofi i le itula e 12:00 i le aoauli seia pa'ia le itula e 2:00 i le aoauli e faia ai le sauniga i le aoga maualuga.