Ads by Google Ads by Google

Fa’aulu i le Maota o Sui pili si’i totogi o faipule ma senetoa


[ata: foa'i]

O lo’o ua taoto nei i luma o le Maota o Sui se tulafono taufa’aofi e si’i ai totogi o afioga i senetoa o le Maota Maugalua ma faipule o le Maota o Sui. O lea mataupu, e ala i se pili sa fa’auluina e le afioga i le faipule ia Faimealelei Anthony Fue Allen i le amataga o le vaiaso lenei.

 

O le talosaga i le si’itaga e $10,000 i le tausaga mo sui uma o le Fono Faitulafono.

 

E pei ona fa’amanino i le tulafono taufa’aofi, o lo’o talosagaina ai le siitaga o totogi o taitai o le Fono - le afioga i le Peresitene o le Maota Maualuga ma le afioga i le Fofoga Fetalai o le Maota o Sui - e si’i mai i le $30,000 o lo’o i ai nei le tulafono i le $40,000 i le tausaga.

 

O isi afioga i senetoa ma faipule o le si’itaga mai le $25,000 o lo’o i ai nei i le $35,000 i le tausaga. O le sui faipule mai Swains Island, e si’i mai le $20,000 i le $30,000 i le tausaga.

 

O le aso e aloaia ai lenei tulafono taufa’aofi pe afai e pasia e le Fono ma sainia e le Kovana Sili, o le aso muamua lava o le isi nofoaiga a le Fono Faitulafono.

 

I lalo o le tulafono o lo’o i ai nei, o lo’o fa’ailoa ai e fa’apea e le mafai e se Nofoaiga a le Fono o lo’o tauaofia ona si’i o latou totogi. Ae peitai e mafai e le Nofoaiga ona si’i totogi o le isi Nofoaiga i luma atu.

 

O lona uiga, i se isi fa’amatalaga fa’amalamalama gofie, e le mafai e le Nofoaiga Lona 36 a le Fono Faitulafono o lo’o tulai mai i le taimi nei ona si’i lava e i latou o latou totogi. Ae peitai e mafai e le Nofoaiga 36 ona si’i totogi o le Nofoaiga o lo’o i luma atu, le Nofoaiga Lona 37, i le lua tausaga o lo’o lumana’i.

 

I le tausaga e 2016 sa tulai mai ai foi lenei mataupu i se pili sa fa’auluina i le Maota o Sui e si’i ai totogi o senetoa ma faipule i le ta’i $20,000 i le tausaga.

 

I lea vaitaimi sa tetele fa’atuiesega mai le lautele, ma sa faia se solo tete’e i le malae i Fagatogo. Ma e le’i manuia lea taumafaiga i lea vaitaimi.

 

E i ai foi isi tausaga ua te’a sa i ai foi isi tulafono taufa’aofi mo se siitaga o totogi o senetoa ma faipule, ae le’i manuia ia taumafaiga.

 

Ua le gata i totogi o senetoa ma faipule, fa’apea ma taitai o le Fono, o lo’o manino mai foi i le tulafono a latou tupe maua e fesoasoani i le fa’agaoioiga o o latou tiute.

 

Mo ta’ita’i o le Fono, e ta’i $40,000 i le tausaga, ae o afioga i senetoa ma faipule e maua le ta’i $30,000 i le tausaga.