Ads by Google Ads by Google

Fa’atula’i falema’i tumaoti fou - EAU Claire Medical Center


Le susuga Bishop Mulitauaopele o lo'o galue malosi mo le falema'i fou ina ia fa'atula'ia i le tatou atunu'u, ae o ia fo'i o le Auauna a le Atua i le Ekalesia Papatiso, ua fa'ato'a mafuta fo'i ma se tasi o ali'i Fitafita Tuai John Pritchard. [ata: Leua Aiono Frost]

Ua mae'a ona fa'atulaga le aso 5 Iulai i le taeao e suaina ai le eleele i le Paka Liona, e fa'atulaga i le va o Lua Street ma Tolu Street, mo le fa'avae o le falema'i fou e amata ona fausia ai.

 

O lenei falema'i ua fa'atupeina e le EAU Claire Medical Center mai Columbus, South Carolina, ma o lo'o malaga so'o mai fo'i latou aumalaga o Foma'i Fa'apitoa i gasegase lautele, va'aiga ma talavai a tamaiti i le tele o tausaga, ma ua a'e ai se tofa i lona Komiti Fa'afoe, CEO Stewart Hamilton, e fa'atula'ia loa se lala iinei. I South Carolina, e 35 o latou falema'i o lo'o fa'agaoioia ai.

 

O le susuga ia Bishop Mulitauaopele, o se tasi sa tautua i le US Army ma ua litea, ae ua fa'amautu lona aiga ma le faletua o Eva Mulitauaopele i South Carolina lava, o lo ua mafua ai ona maua lenei feso'ota'iga ma le EAU Claire Medical Centers ma Amerika Samoa.

 

O Eva Mulitauaopele ua atoa le 10 tausaga o lana tautua i le EAU Claire Medical Clinics ma o le ala lea o le latou naunauta'i e fesoasoani mai i togafitiga ma sailia gasegase o tagata o Samoa na lua.

 

O le aso 26 o Iuni o le a o'o mai ai le aumalaga e to'a 14 ma fa'aopoopo fa'atasi ma le aumalaga e to'a 15 lea ua tapena e Bishop Mulitauaopele iinei, ona malaga loa lea mo le tolu aso o talavai i Samoa.

 

E toe malaga mai i le aso 2 Iulai ma amata talavai e lua i Amerika Samoa. O le aso 3 Iulai e faia ai le talavai i le TAOA i Pago Pago ma e va'aia ai lava na'o tagata matutua ua aofia i le Polokalama a le TAOA, ae o le aso 4 Iulai e faia ai talavai mo so'o se tasi i le Malumalu AOG Antioch i Iliili.

 

"O nei malaga uma sa fa'atautaia mai e le matou falema'i tele lea i South Carolina, ua avea fo'i ma se ala ua sailia ai e i matou ituaiga gasegase o a'afia tele ai o tatou tagatanu'u, ma iloa ai fo'i ituaiga togafitiga e ao ina faaleleia ai gasegase na, peita'i e le o maua uma ituaiga vaila'au ma fuala'au mo na togafitiga i le tatou faletalavai. O le ala lea ua a'e ai se tofa, e ao ina fa'atuina loa le falema'i fou, fa'auia mai i ai vaila'au ma fuala'au e talafeagai lelei ma togafitiga o gasegase o lo'o maua ai le lautele o tatou tagata, ma ua o'o mai ai fo'i ma le vasega o foma'i fa'apitoa e ao ina sailia gasegase o tatou tagata uma iinei,” o se saunoaga lea a Bishop Mulitauaopele.

 

O le suaina la o le eleele mo lenei poloketi i Paka Liona, ua fa'ailoa mai e Mulitauaopele, "O le a fa'atula'ia ai se fale e tusa ma aiaiga fa'afeterale lea ua fa'ailoa mai, e tusa ma le 3800 sikuea futu lona tele mo se Outpatient Clinic atoa. E tatau ona tautuaina ai le 740 tagata mai lona amataga. E i ai lona vaega e fa'atautaia suesuega o le toto ma isi su'esu'ega o gasegase, fa'atasi ai ma lona faletalavai. Ua mae'a fo'i ona malaga fa'atolu mai le ali'i CEO o le Claire Medical Center, e vaai patino i le fa'atinoga o galuega i le LBJ Med. Center ma isi fo'i falema'i fa'aitumalo a le atunu'u lea e fa'atautaia e le Matagaluega o le Soifua Maloloina.”

 

E lua tausaga o le a fa'atautaia ai le falema'i lenei ona toe asia mai lea e le Feterale lona agava'a, ona fa'ato'a pasia atoatoa lea mo le fa'atula'ia o le falema'i atoatoa e aofia uma ai tautua e tatau mo falema'i tetele e pei ona mae'a fa'atula'ia ai i isi setete i Amerika.

 

O le agava'a o lenei falema'i, e afua mai i le nofoaga lava latou o fitoitonu ma le tausiga lelei o e gasegase o le atunu'u, atoa ai ma le tomai o lo ua mae'a umia e le vasega o foma'i fa'apitoa mo nei gasegase ma le togafitiga o gasegase e ala i fuala'au ma vaila'au ua mae'a fa'aaogaina e foma'i o lo'o galulue i le falema'i.

 

O isi suesuega uma ma togaifiga tau le Fatu, Kanesa ma isi gasegase fita, e le fa'atula'ia i le lua tausaga lea o lo'o tatalia ai le sailiga o le agava'a o le falema'i fou, peita'i pe afai e pasia loa, ona fa'ato'a fa'atula'ia lea o vaega tetele na o le falema'i.

 

Ua toe nei o le saini a le afioga Kovana Lolo Moliga, ona fa'ataunu'u uma lea o fuafuaga ua mae'a fa'ataoto mo lenei poloketi i le atunu’u.

 

Ua fa'ailoa mai e Mulitauaopele, "E ui i galuega uma sa ou tiute ai ma faiva, e afua mai le amataga i le tautua i le vaega 'au, o lea fa'ato'a ou mautinoa, ua i ai se sao e fa'ao'o atu se fesoasoani i ou tagata nu'u uma lava, aua sa outou tatalo mo se manuia mo le lautele e ala mai i au tama fanau sa fa'alele."

 

Ina ua ma’ea lana tautua i vaega ‘au, sa toe taliu mai i le atunu’u ia Mulitauaopele ma ua avea ma Faife'au Papatiso, "Ua sailia i le loto le filemu o le Atua, ina ne'i le faia se galuega e vi'ia ai o Ia. Ae peita'i o lenei fo'i auala, ua avea ma se sao o le Tina o le aiga ma se tasi o afafine ua avea ma foma'i fa'apitoa o fofoga ma fa'atulaga va'aiga e talafeagai ai, ina ia lelei le faitau tusi. O ia lea o Jennifer Mulitauaopele."