Ads by Google Ads by Google

Fa’atulaga e Lemanu tulaga o ta’avale fou e fia fa’atau e le malo


[ata: foa'i]

Ua suia nei le tulaga o fa'atauga o ta'avale mo matagaluega ma ofisa o le vaega fa’amalosi tulafono a le malo, i le faiga fou ua finagalo le afioga i le Lutena Kovana, Lemanu Palepoi Sialega Mauga, e mulimulita’i ai le malo ina ia fa’aitiitia ai le tele o ta’avale ae le’i faia i ai se fuafuaga pe paketi ina foi i le tupe fa’asoasoa.

 

O lenei faiga fou ua fa'amalosia mai i se lapata'iga fa'alaua'itele i matagaluega ma ofisa o le malo i se tusi i le aso 12 o Mati, mai ia Lemanu ma ua fa'aulutala, "Aiaiga o Fa'atauga Ta'avale a le Malo Amerika Samoa.

 

Ua taofia nei ona toe fa'atau pe lisia se ta'avale a le malo e so'o se matagaluega, ae le'i mua'i fa'ailoa patino mai le vaega tupe e fa’atau mai ai lea tau mo lena fa'atauga, ma e tatau ona fa'ailoa le ta'avale ua tuai o le a fa'aleaogaina, ae suia i lea ta'avale fou.

 

"O le faiga lenei e mafai ai ona mautinoa ua le si'isi'i pea i luga le aofai o ta'avale a le Malo, ina ia taofiofia mai ai fo'i le so'ona fa'aalu o tupe a le Malo i le suau'u ma le kesi fa'apea ma le totogi o le toe faaleleia o nisi o ta'avale ua leaga,” o se vaega lea o le tusi a Lemanu i fa’atonusili.

 

E le gata i lea, ae ua ia fa'ailoa patino mai, i le amataga o le 2020 i lana tupe fa'asoa, e ao ina fa'atonusili o matagaluega ta'itasi uma, ona aofia ai ma le kesi ma le suau'u i le lisi o latou tala o latou paketi e taua'aoina mai ina ia pasia.

 

Ua ia fa'ailoa fo'i, afai e i ai se suiga i se faatauga a se matagaluega, e ao ina fa'afeso'ota'i sa'o le Ofisa o le Kovana i le ala o le a solituina ai lea lapata'iga taua, ma faia ai le fa'aiuga i le mana'oga e fa'atau se taavale mo i latou.

 

Ua fa'ailoa mai, e i ai matagaluega e ese mai ona faia latou fa'atauga, ona o tulaga o galuega o lo'o latou fa'atinoa. O i latou na e aofia ai le Matagaluega o Galuega Lautele a le Malo ma isi vaega tumaoti o le malo. O nisi fo'i e mafai ona le a'afia i lea fa'asalalauga o ni ofisa o vaega fou o le Feterale e fa'ato'a fa'atutu mulimuli ane i le tatou nei malo, e tatau ona mua'i fa'atau ni a latou ta'avale mo feoa'iga, e fa'ataga lea e le tau a'afia i lenei lapata'iga tamau.

 

E muamua ona mautinoa e matagaluega uma o le a talosagaina se fa'atauga o se ta'avale fou, ia i ai ma pepa uma o le fa'atauga i le taimi o le a faia ai lea fa'atauga mo le silafia ma fa'amaumauga uma e tatau ona faia a le Malo.

 

Ua mafua ona faia lenei lapata'iga ona o se fa'aiuga ua fa'ailoa mai e le Ofisa o le Inspector General a le Matagaluega o le Initeria i se latou lipoti fa'amaumau i le tausaga ua te'a, ua fa'ailoa mai ai, "E le o mafaia e le Malo o Amerika Samoa ona i ai sona malosi'aga e taofia ai le so'ona fa'atau ma le fa'aaogaina o ta'avale afi ua lisia o Ta'avale a le Malo."

 

O le fa'aiuga fo'i a le Au Su'etusi ua fa'ailoa manino ai, "O Fa'amaumauga o le fa'atauga o ta'avale e le atoatoa i totonu o faila a le malo, e le o i ai fo'i se aiaiga tamau e mafai ona folo ai tagata i le fa'aaogana o ta'avale a le malo, e le o va'ava'ia maoti fo'i le fa'aaogaina ma taimi e tamau e fa'aaoga ai ta'avale a le malo. E i ai nisi ta'avale e lisia e le Malo, ma isi e fa'ataumotu e matagaluega o le Malo, ma ua iloga fo'i, e matua le usita'ia e matagaluega uma ma latou tagata faigaluega faatonuga tau le fa'aaogaina o ta'avale."

 

"Ona o nei mea ua lisia i luga, ua mautinoa ai, o ta'avale uma ua lisia o ta'avale a le malo ma ta'avale e lisia e le malo, ua fa'aaogaina fa'aletatau, ua gaosia nisi ta'avale ae ua leiloa lava isi ta'avale."

 

FONOTAGA A LE KAPINETA

 

I le fonotaga a le kapineta a le kovana i le vaiaso ua te’a, sa toe fa’amalamalama atili ai e Lemanu le aano o lana tusi sa tuuina atu i fa’atonusili, ma ia fa’ailoa ai foi le tatau lea ona tausisi ofisa o le malo i lea suiga fou.

 

O se fa’ata’itaiga, afai o le manulauti a le matagaluega mai le amataga e na o le 10 ta’avale e mafai ona fa’atautaia ai ana galuega ma o le aofai foi lea o ta’avale o lo’o i totonu o le tupe fa’asoasoa, e aofia ai le tupe mo le kesi ma le suau’u, “e na o le pau lava lea o ta’avale e mafai ona lisi mo le tausaga fa’aletupe,” o se saunoaga lea a Lemanu. 

 

Ae afai ua manatu le matagaluega e fa’atau se isi ta’avale, o lona uiga, o se ta’avale fa’aopoopo lea, o se fa’amalamalamaga lea a Lemanu, ma ia fa’ailoa ai e tatau la ona ave’ese le isi ta’avale o lo’o i ai, ae le’i fa’atauina mai se ta’avale fou.

 

Ia tumau pea lava ta’avale e 10 i totonu o le lisi o ta’avale e fa’agaoioi ai lea ofisa o le malo.

 

E solofua lea suiga fou, pe afai e i ai se matagaluega ua fa’aopoopo ona tiute, ma tautua, e mafua ai ona tuu i le lisi se isi ta’avale e atoa i ai le 11 o ta’avale.

 

Ma afai o se ta’avale fa’aopopo e tatau foi onas fa’amalamalama atili le mafuaaga o le mana’omia o lea ta’avale, aua o se fa’avale fa’aopopo, e i ai foi tupe fa’aalu e totogi ai kesi ma le suau’u ae maise lipea e faia pe a i ai se afaina o le ta’avale.