O le vaiaso na te’a nei na amata fa’agasolo ai galuega mo le toe fa’afouina o ni isi o nofoaga i totonu o le Toese i Tafuna, e aofia ai le Fale’ai mo pagota faapea ai ma le Ofisa mo Leoleo, i lalo o se fa’atonuga mai le afioga i le ali’i Kovana ia Lolo Matalasi Moliga.

O le fa’atonuga mai le afioga i le ali’i Kovana, na tuuina atu lea i ni isi o Fa’atonusili na latou asia le Toese i le aso Tofi o le vaiaso na te’a nei, i le mae’a ai lea ona fa’asalalau e le Samoa News o se ripoti e fa’atatau i le tapunia lea e sui o le Matagaluega o le Soifua Maloloina o nisi o nofoaga i totonu o le Toese, lea e aofia ai le Potu mo Fa’asalaga mamafa (Maximum Security), o le Fale’ai mo pagota, faapea ai ma le Fale Taele.

A o fa’agasolo le asiasiga a le ali’i Kovana faapea ai ma nisi o ana Fa’atonusili i totonu o le lotoa a le Toese, na logoina ai loa e se molimau fa’atuatuaina le Samoa News e fa’atatau i lea asiasiga faapitoa.

Na taua e le molimau le asia e le Kovana ma ana Fa’atonusili o le nofoaga o le Fale’ai, e aofia ai totonu ma le tino atoa o le fale. Sa asia fo’i isi nofoaga e pei ona tapunia e sui mai le Ofisa o le Soifua Maloloina.

Sa i ai i lea asiasiga le pule o se Kamupani Faufale i le atunu’u, o ia lea ma lana Konekarate o lea ua fa’atonu aloaia e le Kovana e galulue mo le fa’afouina o nofoaga e pei ona fa’aletonu i totonu o le Toese.

Na taua e le molimau i le Samoa News le si’i si’i o le si’ufofoga o le afioga i le ali’i Kovana i le taimi o le asiasiga, ma ia fesiligia ai ni isi o ana Fa’atonusili i le umi lea ona ufiufi o fa’aletonu e pei ona tula’i mai i totonu o le Toese, ae ua leva na tatau ona faia i ai ni sailiiliga ma saili se fofo.

Sa i ai se fautuaga ina ia taoto le galuega mo le toe fa’afouina o fale i totonu o le Toese faatoa amata i le vaiaso nei, peita’i sa fautuaina malosi e le Kovana lona finagalo ina ia amata fa’atino loa le galuega i le taimi lava e mae’a ai le asiasiga i le vaiaso na te’a nei.

Saunoa le molimau e fa’apea, o le mae’a ai o le asiasiga a le Kovana ma sui o lana Kapeneta, na aga’i atu ai loa siu o le Konekarate Fau Fale mo le amataina o le galuega. Na fa’amaonia mai e se Leoleo o le toese i le Samoa News i le vaiaso na te’a nei, le amata aloaia o galuega mo le toe fa’afouina o le Fale’ai ma le Ofisa i le taimi lava na mae’a ai le asiasiga.

Na taua atili e le molimau mai totonu o le toese e faapea, o le itu sa sili ona mamafa i ai saunoaga a le ali’i Kovana, o le fa’atamala lea o le Ofisa o Leoleo aemaise ai le Pulega o le Toese mo le fa’atinoina o a latou tiute i le fa’aleleia lea o nofoaga o lo o fa’aaoga e pagota.

“O galuega mo le fa’amamaina atoa ai ma le faaleleia o le Fale’ai, e le tau faia e ni Konekarate mai tua, o galuega ia e mafai lava ona fa’atino i le taimi e mae’a ai ona fa’aaoga le Fale’ai, e faapena fo’i i le Faletaele poo le nofoaga autu fo’i mo Fa’asalaga mamafa, ae mafua ona fa’aletonu, e le o faia se galuega a i latou e tatau ona fa’atinoina lea tiute tauave,” o le saunoaga lea a le molimau.

Na taua atili fo’i e le molimau le fa’anoanoa o le ali’i Kovana, ona o le salalau atu ai o lenei mataupu i luga o le nusipepa, lea na mafua ai loa ona ia silafia le fa’afitauli ma ia valaauina ai loa le asiasiga.

Na faamaonia mai e le Pule o le Konekarate Faufale i le Samoa News, lona taliaina o le talosaga a le Kovana ma le malo, mo se avanoa e fa’atino ai e lana Konekarate le galuega mo le toe fa’afouina o nofoaga eseese nei i totonu o le toese. Sa ia faamaonia atili mai fo’i i le Samoa News lona pisi ai i le aoauli o le aso Tofi na te’a nei, i le tau sailiina lea o le oka e fa’atino ai le galuega.

E pei ona silafia, o le faaiuga e tapunia ai nofoaga e 3 i totonu o le Toesea, na faia ina ua mae’a se asiasiga sa fa’atinoina e sui o le Ofisa o le Soifua Maloloina a le malo i le 2 vaiaso talu ai, ma latou molimauina ai tulaga fa’aletonu i le toese, aemaise lava i le Fale’ai mo pagota.

O lea asiasiga e pei ona taua e se molimau, na mafua mai ina ua talosagaina e ni isi o aiga o pagota le Ofisa o le Soifua Maloloina, mo se avanoa e fa’atino ai sa latou asiasiga i totonu o le toese.

Na faamaonia i lea asiasiga tulaga faaletonu i totonu o nofoaga eseese nei, ma ua fa’amaonia ai le le saogalemu mo le soifua maloloina o le mamalu o le atunu’u o loo taofia i le toese i Tafuna.

O fa’aletonu i le Fale’ai e le gata i le palapala ma le eleelea, ae fetolofi solo ai isumu ma mogamoga, o ni vaaiga e le matagofie i le soifua maloloina o pagota.

E le o toe fa’aaogaina le Nofoaga mo Fa’asalaga mamafa i le taimi nei ina ua tapunia, ae ua aveese uma mai pagota sa taofia ai, ma ua tufatufa atu i isi nofoaga eseese i totonu lava o le toese.

O lo o i ai le fa’amoemoe e tatau ona mae’a le galuega ua fa’agasolo i le taimi nei i le fa’aiuga o lenei tausaga