Ads by Google Ads by Google

Fa’atonu Komiti Fa’afoe o Femalagaaiga fafine Filipino e tuua AS

ausage@samoanews.com

E 10 aso lea ua tuuina atu e le Komiti Fa’afoe o Femalagaaiga i le Tina mai le atunu’u o Filipaina lea na musu e fa’afou lona pepa nofomau na te tuua ai le atunu’u. Afai ae mae’a aso e 10 na te le usitaia lea fautuaga, o le a faia loa e le Komiti Fa’afoe lona malosi i lalo o le tulafono ma fa’afo’i fa’amalosi ese ai loa o ia mai le teritory.

 

O le aso Lulu o le vaiaso na te’a nei, o le aso 25 lea o Iulai, na fa’ataunu’uina ai i luma o le Komiti Fa’afoe a le Ofisa o Femalagaaiga se iloiloga faapitoa a le Tina ia Joselyn M. Intila, o se tagatanu’u o le atunu’u o Filipaina, ona o le tulaga fa’aletonu e pei ona tula’i mai i ona pepa nofomau.

 

O le aso 31 Me, 2018 na mae’a ai le aoga o le ID nofomau a Intila. I lalo o tulafono tau femalagaaiga, e tatau ona toe fa’afou lona ID, peita’i na taua e le sponsor a Intila ia Vui Florence Saulo i sana tusi i le Komiti Fa’afoe, na musu Intila e fa’afou lona ID nofomau.

 

Na taua atili e Vui i lana tusi e fa’apea, e le gata na musu lenei Tina e fa’afou lona ID nofomau, ae ua le toe nofo fo’i o ia i lana sponsor, ae ua manatu fo’i o ia e sui lana sponsor ma le galuega e galue ai.

 

E le i finagalo le Taitaifono o le Komiti Fa’afoe e talanoa mai i le Samoa News e uiga i lenei mataupu, peita’i na faamaonia mai e se sui o le Komiti le tuuina atu lea e le Komiti Fa’afoe o aso e 10 ia Intila na te tuua ai loa Amerika Samoa i lona lava loto malie. Afai e musu, o le a aveese fa’amalosi loa o ia mai totonu o le atunu’u.

 

Na taua e le sui o le Komiti e fa’apea, o le latou fa’aiuga e fautuaina ai Intila ina ia tuua le atunu’u i lona loto malie, na afua mai lea ina ua ta’utino o ia i luma o le Komiti, ua ia le usitaia ni isi o tulafono tau Femalagaaiga a Amerika Samoa.

 

O ni isi o ia tulafono e aofia ai lona le musu e fa’afou lona ID, ma ua taua ai nei o ia o se tagata ua nofo fa’asolitulafono i Amerika Samoa, ua le toe nofo i lana sponsor, ae ua faigaluega o ia i le isi ulugali’i e aunoa ma se fa’atanaga mai le Komiti Fa’afoe.

 

Na taua e se molimau i le Samoa News e fa’apea, e lei talia e le Komiti Fa’afoe le auai o le ulugali’i lea ua manana’o e avea i laua ma sponsor fou a Intila i le taimi o le iloiloga, ae sa fa’atonuina i laua e le Ta’ita’ifono o le Komiti Fa’afoe ina ia tuua le potu fono ae fa’atali mai fafo.

 

Sa na o Intila ma ana loia e lua atoa ai ma totino e to’a 5 o le Komiti na auai i le iloiloga. E le i auai le sponsor a Intila ia Vui, poo se sui fo’i mai le Ofisa o le Loia Sili ma le Ofisa o Femalagaaiga.

 

Ina ua fesiligia le mafua’aga na ala ai ona fautuaina le ulugali’i lea ua mananao e avea ma sponsor fou a Intila e tuua le potu fono, na taua ai e le sui o le Komiti Fa’afoe e fa’apea, e leai se mafua’aga e ala ai ona auai le ulugali’i lea i le iloiloga.

 

“Ina ia fa’amanino le mataupu lea ua tu’uaia ai le Komiti, o le ulugali’i lea o loo taumafai e avea ma sponsor a Intila, e le o laua o ni sponsor mo le Tina mai Filipino lea i lalo o le tulafono. E leai fo’i se malosiaga poo se la aia tatau e faalogologo ai fua i le iloiloga a Intila,” o le saunoaga lea a le sui o le Komiti.

 

“E ese mamao lava le mataupu lea e talanoaina i luma o le Komiti i le taimi nei, ma le mataupu lea o loo taumafai mai i ai laua. O lea e talanoaina e le Komiti le mataupu i le le usitaia lea e Intila o tulafono tau Femalagaaiga, ae o lea e taumafai i laua e avea i laua ma sponsor. E eseese mea ia e lua, e matua le talafeagai lava lo la auai i le iloiloga.”

 

Na taua fo’i e se molimau i le Samoa News se tulaga e faatatau i se suesuega ua fa’atautaia e ni isi o Ofisa mai le malo feterale e aofia ai le Matagaluega o Tagata Faigaluega a le malo tele e uiga lava i lenei mataupu.

 

Na taua e le sui o le Komiti Fa’afoe i le Samoa News e faapea, se taua fo’i e se tasi o loia na malaga atu ma Intila le tulaga e fa’atatau i se suesuega a le feterale e fa’atatau i lenei mataupu. Sa fa’asino atu fo’i e le isi loia a Intila se pepa pisinisi (business card) i le Komiti Fa’afoe ma faapea atu, o le pepa pisinisi lea a le tagata mai le feterale o lea o loo gafa ma le suesueina o lenei mataupu.

 

“Na faailoa i ai e le Taitaifono a le Komiti Fa’afoe ia Intila ma ana loia, e le aloaia e le Komiti Fa’afoe le pepa pisinisi e pei ona taua. Afai e moni o i ai se suesuega e uiga i lenei mataupu, e fia vaai le Komiti i pepa faamaonia mai le fa’amasinoga. Afai fo’i latou te fia talanoa i lea suesuega, e tatau fo’i ona latou faila se talosaga i le fa’amasinoga. Pau le tulaga lea e talanoaina e le Komiti Fa’afoe, o le le usitaia lea o tulafono tau Femalagaaiga, ae le o se suesuega a le fererale,” o le saunoaga lea a le sui o le Komiti.

 

O le vaiaso na te’a nei na maua ai e le Samoa News le kopi o le tusi a Intila sa tuuina atu i le Komiti Fa’afoe, e tali atu ai i le tusi a lana sponsor.

 

O le isi lomiga o le a sosoo ai a le Samoa News, o le a lomia atu ai le kopi o lenei tusi mo le silafia e le atunu’u.