Ads by Google Ads by Google

Faatonu Fa’amasinoga ia Elia toe totogi le $36,000 na ia fa’aaogaina


[ata: foa'i]
ausage@samoanews.com

O se tasi o tuutuuga o le nofovaavaaia a le Tina e 37 tausaga le matua lea sa galue i le Ofisa o le Native American Samoa Advisory Council (NASAC) na tu’uina atu i ai e le Fa’amasinoga Maualuga i le vaiaso na te’a nei ina ua lau lana fa’asalaga, o lona toe totogiina lea o le tupe e $36,000 sa ia aveese mai i le NASAC ae fa’aaoga mo ia lava.

 

O Dorothy Elia na ulua’i tu’uaia e le malo i moliaga mamafa e 3 e aofia ai le gaoi, ave faagaoi o meatotino sa tuuina atu i lalo o lana vaavaaia, ma le faia o faamaumauga tau fa’asese.

 

Ae i lalo o se maliliega sa latou sainia ma le malo ma talia e le fa’amasinoga maualuga, na ia tali ioe ai i le moliaga mamafa o lona ave fa’agaoi lea o se vaega tupe sa tuuina atu i lalo o lana vaavaaiga, o le vaega C lea o solitulafono mamafa, e mafai ona fa’asala ai o ia i le toese mo le umi e le sili atu i le 7 tausaga, pe fa’asala fo’i i le salatupe e le silia i le $5,000.

 

O le vaiaso na te’a nei na tula’i ai Elia i luma o le fa’amasinoga maualuga mo le tuuina atu o lana fa’asalaga. O le ali’i loia fautua ia Michael White na tula’i mo ia, ae o le tama’ita’i loia sili lagolago ia Laura Garvey na fai ma sui o le malo.

 

Na faatoese le ua molia e tusa ai o lana solitulafono ma ia talosagaina ai se isi avanoa mo ia se’i toe fo’i atu ai i tua i lona aiga e tausi si ona Tama ua matua ma ua gasegase fo’i, atoa ai ma se tasi o lana fanau ua a’afia i se gasegase matuia. Na taua e Elia e fa’apea, o lana solitulafono ua ia lagona ai le sese o le gaioiga ua ia faia.

 

Na tutu fa’atasi loia e finau i le fa’amasinoga ina ia fa’asala Elia i se fa’asalaga faanofovaavaaia, ina ia maua ai le avanoa e alu atu ai o ia i tua e saili sana galuega e toe totogi ai le tupe sa ia aveese ma fa’aaoga.

 

Na taua e le loia a Elia ia White e fa’apea, ua mae’a ona toe totogi e le ua molia le $24,000, lona uiga, toe $12,000 le tupe o loo totoe. Sa ia taua fo’i e fa’apea, ua mae’a ona ia talanoa i le aiga o le ua molia e aofia ai lona Tina ma lona to’alua, ma ua malilie fo’i le aiga e fesoasoani i le toe totogiina o lenei tupe.

 

Saunoa le afioga i le Fa’amasino Sili ia Michael Kruse e fa’apea, o se tasi lea o mataupu o loo atugalu i ai le fa’amasinoga, o le auala e toe totogi ai le tupe na a’afia i le gaioiga a le ua molia.

 

O atugaluga o le fa’amasinoga e pei ona saunoa Kruse, ona o loo eseese le numera o le tupe o loo i luma o le fa’amasinoga i le taimi nei. O loo taua i le molimau a se tasi o tagata sa tuuina atu i le Ofisa Faanofovaavaaia, e $65,000 le aofa’i o le tupe na a’afia i le gaioiga a Elia, ae na taua e Elia i luma o le fa’amasinoga, e na o le $36,000 le tupe sa ia aveesea ma fa’aaoga.

 

“O fea le numera sa’o e tatau ona silasila i ai le fa’amasinoga,” o le fesili lea a Kruse. Na tali le loia a le malo e fa’apea, o le numera sa’o le $65,000. Na faailoa e Kruse i le loia a le malo e fa’apea, o le sese muamua lava sa latou faia, latou te lei tuuina i totonu o le maliliega sa latou sainia ma Elia le aofa’i o le tupe e tatau ona toe totogi e le ua molia, o le mafua’aga fo’i lena na ala ai ona fesili le fa’amasinoga ia Elia i le aso na fofogaina ai le maliliega, pe fia le tupe sa ia fa’aaogaina, ma tali mai ai le ua molia, e $36,000.

 

Na lagolago e le loia a Elia le finagalo o le fa’amasinoga, o le tupe sa’o lava na fa’aaoga e Elia e $36,000 ae le $65,000, o le tupe fo’i lena ua sauni le ua molia na te toe totogiina i le fa’amasinoga.

 

I le maea ai ona feutana’i o le fa’amasinoga ma loia, na valaauina ai loa le malologa puupuu a le fa’amasinoga, ae tuumuli atu afioga i Fa’amasino e iloilo sa latou fa’aiuga mo lenei mataupu.

 

Ina ua mae’a le malologa puupuu, na saunoa ai loa Kruse e fa’atatau i mau faamaonia o le faalavelave sa tupu. Sa ia taua e fa’apea, e tusa ai ma faamaumauga a le fa’amasinoga, o le solitulafono o le ave faagaoi o se vaega tupe sa tuuina atu i lalo o le vaavaaiga a se tagata faigaluega, e tutusa ai lava le ave faagaoi o le $1 poo le $36,000.

 

“I lenei mataupu, e $36,000 le aofa’i o le tupe na ave faagaoi e le ua molia, o le aofa’i fo’i lea sa ia ta’utino i le fa’amasinoga sa ia fa’aaogaina mo ia lava,” o le saunoaga lea a Kruse.

 

“E ui e le i popole le malo e fa’ailoa mai le aofa’i sa’o o le tupe na a’afia i lenei mataupu, ae ua manatu le fa’amasinoga o le a latou faaaogaina le aofaiga lea na fa’ailoa mai e le ua molia.”

 

E 7 tausaga e nofosala ai i le falepuipui ma le salatupe e $2,000 le fa’asalaga na tuuina atu e le fa’amasinoga mo Elia. O le a faamalumalu lona tuliina o le fa’asalaga fa’a falepuipui, ae o le a nofovaavaaia o ia mo le 7 tausaga i lalo o tuutuuga e ao ona ia usita’i i ai.

 

O ni isi o tuutuuga, o lona tuliina lea o masina e 28 i le toese e aunoa ma le tatalaina o ia i tua. O le tuliina o lea fa’asalaga, fa’atoa amata tuli le 6 masina muamua i le aso 1 o Iulai 2019. Afai ae mae’a ona tuli le ulua’i 6 masina o le faasalaga, ona tatala loa lea o le ua molia i tua mo le 90 aso e alu e saili sana galuega e totogi ai le tupe e $36,000 sa ia fa’aaogaina.

 

Saunoa Kruse e fa’apea, e le taliaina e le fa’amasinoga se tasi e faigaluega i se fa’atoaga a lona aiga, pe afai e poloaina lea tagata e saili sana galuega, ae talu ai le ripoti a le Ofisa Faanofovaavaaia, lea ua taua ai le tele o le fa’atoaga a le ua molia ma lona to’alua o loo i ai, o le fa’atoaga fo’i lena na maua mai ai le tupe lea na totogi ai le $24,000 ua ma’ea ona totogi e le ua molia, ua manatu ai le fa’amasinoga, o le a fa’ataga o ia e galue i le faatoaga a lona aiga.

 

Ua poloaina fo’i Elia e totogi le salatupe e $2,000, lea o le a fa’aaoga mai ai le tinoitupe e $2,000 sa ia totogi mo se vaega o le tupe sa faatulaga e tatala ai o ia i tua.

 

O le afioga i le Faamasino Lagolago Sinia ia Mamea Sala Jr ma le afioga i le ali’i Fa’amasino Lagolago ia Su’apaia J. Pereira na lagolago i le Fa’amasino Sili i le tuuina mai o lenei fa’aiuga.