O le vaiaso na te’a nei na fa’atonuina ai e le Fa’amasinoga Maualuga le ali’i o Tavita Mariota, ina ia ona tuua Amerika Samoa ae toe fo’i atu i Samoa e aumau ai, ina ua toe ta’usala fo’i o ia i le isi fo’i moliaga mamafa.

O Mariota, 27 tausaga le matua, na ta’usala i le moliaga mamafa o lona fesoasoani lea i se isi tagata ina ia umia le laau fa’asaina o le mariuana, poo se isi faaupuga, o ia lea na tuuina atu sikaleti mariuana i ni ali’i aoga mai se tasi o aoga maualuga i le atunu’u.

O le aso Faraile o le vaiaso na te’a nei na tula’i ai Mariota i luma o le fa’amasinoga maualuga mo ana iloiloga e lua. O le isi iloiloga, o le tuuina atu lea o se faaiuga e tusa ai o le mataupu lea ua fa’amaonia ai lona le usitaia o poloaiga o lana nofovaavaaia sa tuuina atu i le 2013, ae o le isi iloiloga, o le tuuina atu lea o se fa’asalaga i le mataupu fou lea e pei ona ta’usala ai o ia i lona tufatufa atu o mariuana i fanau aoga.

O le ali’i loia fautua ia Michael White na tula’i mo Mariota ae o le tama’ita’i loia sili lagolago ia Christy Dunn na tula’i mo le malo.

Ina ua maua lona avanoa mai le fa’amasinoga, na fa’atoese ai loa le ua molia e tusa ai o lana solitulafono, ma ia talosagaina ai se isi avanoa se tasi mo ia se’i toe fo’i atu ai i lona aiga e tausi i lona Tina matua o loo i ai.

Na fesili le afioga i le ali’i Fa’aasino Sili ia Michael Kruse ia Mariota, poo fea o loo i ai lona Tina lea ua ia fa’amoemoe e alu e tausi, ae na tali le ua molia, “I lo’u aiga.”

“O fea le atunuu o loo i ai lou aiga,” o le toe fesili atu lea a Kruse ia Mariota, ae na toe tali le ua molia, “I Amerika Samoa nei.”

“E faafefea ona e talosaga mai mo se avanoa e te alu ai e tausi lou Tina matua, ae o lea e fai mai le ripoti a le Ofisa Faanofovaavaaia, e 4 tausaga o e nofonofo i le fale e te le faigaluega. E faapefea ona e alu e tausi lou Tina matua ae leai sau galuega, o le a sau tala?” o le fesili lea a Kruse i le ua molia.

E lei tali Mariota i le fesili a le Fa’amasino, ae sa na o le nofo lava ma punou i lalo. Saunoa loa Kruse e fa’apea, “Ua lava le leai o sau tali e ta’u mai ai e te le popole i le fa’amasinoga, o le mafua’aga fo’i lena na e soliina ai tuutuuga o lau nofovaavaaia.”

Ina ua toe maua le avanoa e toe fa’aauau ai le talosaga a le ua molia, sa ia ta’utino i le fa’amasinoga ua lagona lona sese ma ua salamo moni fo’i mai lana solitulafono sa faia. Sa ia taua e fa’apea, mai masina e tele na taofia ai o ia i le falepuipui, ua ia a’oa’oina ai se lesona taua, e le aoga le falepuipui mo ia.

Na taua e le loia a le ua molia ia White e fa’apea, tele naua taimi sa ia faailoa ai ia Mariota le ma’imau o aso o lona olaga i le falepuipui, e mafua mai i le fa’avalevalea o ana faaiuga e fai. Na taua e White e fa’apea, o Mariota o se ali’i e talavou lava lona olaga, peita’i o le fa’afitauli o loo ia te ia, ua mafuli tele o ia e fa’alagolago i lona Tina e tausia o ia, ae ua le taumafai e ola lava o ia ma fa’alagolago ia te ia lava.

Na talosaga White i le fa’amasinoga ina ia tuu se isi avanoa mo Mariota, se’i alu ai e saili se galuega e tausi ai lona Tina ma amata ai loa ona toe fuata’i se isi la’asaga fou mo lona olaga.

Na faailoa e le loia a le malo ia Dunn, le tatau lea ona tuu atu se fa’asalaga fa’a nofovaavaaia i le ua molia, e aofia ai ma le tuutuuga o lona tuua lea o le atunu’u.

I le mae’a ai o le malologa puupuu, na saunoa ai loa Kruse e fa’apea, ua manatu le Fa’amasinoga e talia le fautuaga a le Ofisa Faanofovaavaaia, e fa’aauau pea ona nofovaavaaia Mariota mo lana mataupu sa tuuina atu i le 2013, sei vagana ai le tuutuuga fou e tasi o le a fa’aopoopo i ai.

O lea tuutuuga fou, o lona tuua lea o le atunu’u ma aumau ai i fafo atu mo le umi o lo o totoe o lana nofovaavaaia e 7 tausaga sa tuuina atu i le 2013. E le mafai ona ia toe ulufale mai i le atunu’u i totonu o le taimi o lana nofovaavaaia.

Mo le mataupu fou e pei ona ta’usala ai Mariota i lona tufatufaina atu lea o sikaleti mariuana i fanau aoga, e 5 tausaga e faasala ai o ia i le falepuiopui. Peita’i ua manatu le fa’amasinoga e faamalumalu lona tuliina o lea fa’asalaga e 5 tausaga, ae o le a faanofovaavaaia o ia mo le 5 tausaga i lalo o tuutuuga e ao ona ia usita’i i ai.

O lea tuutuuga, o lona tuua lea o le atunu’u ae fo’i atu i Samoa ma aumau ai mo le umi o lana nofovaavaaia  5 tausaga.

“Afai e te toe taumafai e ulufale mai i Amerika Samoa i totonu o le taimi atoa o lau nofovaavaaia, tusa lea e 12 tausaga, o le a molia oe e le malo i ni isi solitulafono fou, e aofia ai ma le tuuina atu loa o se poloaiga a le fa’amasinoga e te tuliina ai au fa’asalaga fa’a falepuipui ua fa’amalumalu i le taimi nei,” o le saunoaga lea a Kruse ia Mariota.

Ua poloaina fo’i e le fa’amasinoga ia le loia a le malo ina ia tuuina atu se kopi o le fa’aiuga a le fa’amasinoga i le Pulesili o le Ofisa o Femalagaaiga, ina ia mautinoa e aofia i totonu o le latou ‘Lookout List’ le igoa o Mariota, ina ia mautinoa ai e le mafai ona toe ulufale mai o ia i le atunu’u i totonu o le taimi atoa o lana nofovaavaaia.

O Mariota, fatasi ai ma isi ali’i e to’a 4 na fa’asala e le faamasinoga maualuga i le toese i le 2013 mo le umi e ta’i 28 masina, ina ua ta’usala i latou i le moliaga o le faia lea o uiga mataga fa’afeusuaiga i se teineititi e 13 tausaga le matua.

I le masina o Me o le tausaga na te’a nei, na maua ai ni ali’i aoga se to’alua o loo ula ni la sikaleti mariuana i totonu o le lotoa a le aoga maualuga. Ina ua fesiligia ali’i aoga nei e Leoleo, sa la fa’ailoa i ai, o sikaleti mariuana na avatu ia Mariota.