Ads by Google Ads by Google

Fa’atonu e le Fa’amasinoga le ali’i overstayer e toe fo’i i Samoa


[ata: foa'i]
ausage@samoanews.com

O le ali’i overstayer mai Samoa lea na ta’usala e le Fa’amasinoga Fa’aitumalo i moliaga mama o le faaoolima i le tulaga tolu faapea ai ma le tu fua i le fanua poo le fale o le isi aiga, ua fa’atonu e le afioga i le ali’i Fa’amasino ia Fiti Sunia o ia ina ia toe fo’i i Samoa ma nofo mau ai mo le umi o lana faanofovaavaaia e 2 tausaga.

 

O le amataga o le vaiaso nei na tula’i ai le ali’i o Palemene Faasosolo i luma o le fa’amasinoga mo lana iloiloga masani, peita’i ina ua valaau lana mataupu, sa faailoa e lana loia fautua ia Ryan Anderson i le fa’amasinoga se maliliega ua mae’a ona sainia e Fa’asosolo ma le malo.

 

O tuutuuga o le maliliega e pei ona talia e le fa’amasinoga, o le a tali ioe le ua molia i moliaga mama e 2 o le faaoolima i le tulaga tolu atoa ai ma le tu fua i le fanua poo le fale o le isi aiga, ae o moliaga o loo totoe ai i le pepa o le tagi sa fa’aulu e le malo, o le a talosaga le malo i le fa’amasinoga ina ia solofua.

 

I le tali ioe ai o Fa’asosolo i moliaga e pei ona ta’usala ai o ia, sa ia ta’utino ai e fa’apea, i se taim o le aso 11 o Setema o le tausaga nei, na ia ulufale fa’amalosi ai i le fale o le tama’ita’i na a’afia.

 

A o i ai o ia i totonu, sa ia aga’i atu i totonu o le potu ma tago atu i le vae o le tama’ita’i, a o taoto o ia i luga o le moega. Na ta’utino Faasososolo, o lana amioga sa faia i lea aso, sa le tusa lea ma ala o le tulafono.

 

E 2 tausaga lea ua nofovaavaaia ai Faasosolo i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuliina o aso e 30 i le toese i Tafuna, o le a aofia ai ma le umi e 54 aso lea na taofia ai o ia i le toese a o faatalitali ai se faaiuga o lana mataupu.

 

Talu ai tulaga faaletonu i ona pepa nofomau, ua fautuaina ai o ia na te tuua Amerika Samoa ae toe fo’i atu i Samoa mo le umi o lana nofovaavaaia e 2 tausaga. Ua poloaina fo’i e le faamasinoga le loia a le malo ina ia faailoa i le sponsor lana matafaioi e fa’atino, o le totogi lea o le pasese e toe fo’i atu ai Fa’asosolo i Samoa, atoa ai ma le totogiina o lana salatupe e $100 i le fa’amasinoga.

 

TAGI A LE MALO

 

E pei ona taua i le tagi a le malo e fa’apea, o le mataupu lenei na tofu atu i l e Ofisa o Leoleo i Tafuna, ina ua talosagaina e le Tina o le tama’ita’i na a’afia se fesoasoani a Leoleo, e fa’atatau i se tagata na ulufale faamalosi i totonu o le potu a lana tama teine i le leva o le po ma taumafai e fa’amalosi o ia.

 

Na taua e le tama’ita’i e 19 tausaga le matua na a’afia e fa’apea, na fa’ateia o ia a o moe ina ua tago atu se tagata i lona vae ma taumafai e fafagu o ia. O lona te’i tele na mafua ai ona ee i luga, ma avea ma itu na tula’i ai loa le tagata lea ma oso i fafo o le fa’amalama o le fale.

 

Na taua atili e le tama’ita’i i Leoleo e fa’apea, na te iloa lelei le tagata na alu atu, o le ali’i e igoa ia Pale, e nofo i se tasi o aiga o le nu’u, e masani fo’i ona latou fetaui i ta’aloga volipolo i afiafi. Na saili e Leoleo le ali’i o Pale ma iloa ai, o ia lea o Palemene Faasosolo.

 

O le itu e sili ai ona mata’utia le mataupu a Faasosolo, ona o le tausaga e 2016 na ulufale mai ai o ia i Amerika Samoa i se pemita e 30 aso, ma fa’aauau ai lava ona aumau i le atunu’u e lei toe fo’i i Samoa.

 

Saunoa le ali’i fa’amasino ia Sunia e fa’apea, o le isi lea itu o loo mafua ai ona tutupu le tele o faaletonu i le atunuu, ona o tagata mai fafo e pei o Faasosolo o loo nonofo faasolitulafono i le atunu’u ma latou faia ai isi solitulafono e sili atu ona matuia.

 

“O le itu e lelei ai, e lei i ai se tulaga matuia na a’afia ai le tama’ita’i na aafia i lenei mataupu. Ae ui lava i lea, e matuia lava le gaioiga sa faia e le ua molia, o lona ulufale faamalosi lea i totonu o le fale o le tamaitai e aunoa ma se faatanaga i le leva o le po,” o le saunoaga lea a Sunia.

 

Ina ua fesiligia e Leoleo le ua molia i le mafua’aga na alu ai i le fale o le tama’ita’i na a’afia, na ia taua ai e fa’apea, ina ua la fetaui ma le tamaitai i le taaloga volipolo i le afiafi, na fai atu ai le tama’ita’i e alu atu la te tafafao i lona fale.

 

O le mae’a ai o le inugapia a Faasosolo ma ana uo, na ia manatua ai loa le la tuuga tala ma le tama’ita’i, ma ia filifili ai loa e alu i le fale.