Ads by Google Ads by Google

Fa’atonu afioga Sunia se au uso tama’ita’i aua pepelo fa’amasinoga

ausage@samoanews.com

O le latalata ai ina mae’a ona tuuina atu e le afioga i le ali’i Fa’amasino ia Fiti Sunia tuutuuga o le faasalaga nofovaavaaia a se au uso tama’ita’i i le vaiaso na te’a nei, na tuuina atu ai loa ma le fa’atonuga malosi i se tasi o i laua, ina ia aua le taumafai e pepelo i le Fa’amasinoga.

 

O le aso Faraile na te’a nei na tutula’i ai Theresa ma Sina Samata i luma o le Fa’amasinoga Fa’aitumalo mo le la iloiloiga masani, peita’i ina ua valaau le la mataupu, na fa’ailoa ai loa e le la loia fautua ia Ryan Anderson i le Fa’amasinoga, le sauni lea o le au uso e tali ioe i tu’uaiga fa’asaga ia te i laua.

 

Na ulua’i tuuaia i laua e le malo i moliaga o le gaoi, faia o upu fa’amata’u, atoa ai ma le fa’aleaga meatotino i le tulaga tolu. Ae i lalo o se maliliega sa latou sainia ma le malo, na la ioe ai i le moliaga mama o le gaoi, ae solofua e le Fa’amasinoga moliaga e 2 sa totoe ai i le pepa o le tagi na fa’aulu e le malo.

 

I le tali ioe ai o Theresa ma Sina i le moliaga o le gaoi, sa la ta’utino ai e fa’apea, i se taimi o le aso 4 Aperila 2017, na la ulufale atu ai i totonu o se Fale e Ta ai Lavalava i Ottoville ma ave faagaoi lavalava o le tama’ita’i o Faith Liliu.

 

Na ta’utino atili i laua ua molia e fa’apea, o le la gaioiga sa faia i lea aso, sa le tusa lea ma ala o le tulafono.

 

Na talosagaina e le la loia ia Anderson le fa’amasinoga ina ia faasala i laua i se faasalaga faanofovaavaaia, e aofia ai tuutuuga e auai i aoaoga faufautua mo le tulaga o le ita.

 

O se tasi o itu sa fia malamalama i ai le Fa’amasinoga, pe masani Theresa ma Sina ma le tama’ita’i o Liliu, ae poo le faalavelave fo’i na tula’i mai i lea aso, e mafua mai i se vevesi na tupu muamua, poo se fa’alavelave na fa’atoa tupu lava i le aso lea.

 

Na fesili Sunia ia Anderson pe masani i laua ua molia ma le tama’ita’i e ana lavalava na ave faagaoi, ae na tali le ali’i loia, “O lea lava.”

 

Na fesili Sunia i le auuso pe la te iloa ia Liliu, na tali Theresa, “E leai.”

 

“Lona uiga o le fa’alavelave lea na tula’i mai i le aso lea, o se fa’alavelave na fa’atoa tupu lava i le taimi lea,” o le fesili lea a Sunia, ae na toe tali fo’i Theresa, “O lea lava.”

 

Saunoa le afioga Sunia e fa’apea, e tusa ai ma le silafia e le Fa’amasinoga, na fiu le tama’ita’i o Liliu e tau saili poo ai na gaoia ona lavalava sa i totonu o le Fale Tata Lavalava, mulimuli ane ona iloa o le au uso lea, ina ua tuu e i laua nei ata i luga o le Facebook o lavalava sa la gaoia ma fa’atautau i luga o le ‘ulu.

 

“E seasea tupu se mea faapenei, o le alu o le isi tagata gaoi ofu o le isi tagata ae fa’atautau i luga o le ‘ulu,” o le saunoaga lea a Sunia.

 

E 12 masina ua faanofovaavaaia ai Theresa ma Sina i lalo o tuutuuga e ao ona la usita’i i ai. O ni isi o ia tuutuuga e aofia ai le faasa lea ona la toe taumafai e faafesootai le tamaitai na aafia i lenei mataupu i soo se auala. Ua poloaina fo’i i laua ina ia auai i ni aoaoga e fesoasoani ai i le tulaga o le ita.

 

A o fa’agasolo taualumaga o le fa’amasinoga, sa molimauina e le afioga a Sunia, e foliga mai e le salamo ia Theresa ma Sina, ona e fai lava ma tali-e. Na avea uiga fa’aalia o i laua nei ma itu na le fiafia ai loa le afioga i le ali’i Fa’amasino, ma ia fesili ai loa ia Theresa ma Sina, e ta’u atu le mafua’aga na ala ai ona la gaoia ofu o Liliu.

 

Sa leai se isi o i laua na molia na mafai ona tali atu i le fa’amasinoga. Ae ina ua toe fesili le afioga i le ali’i Fa’amasino ia Theresa ma Sina pe la te iloaina Liliu, o iina na fa’atoa tali ai Theresa, “O lea lava.”

 

Saunoa Sunia e fa’apea, e le tatau ia tei laua ona la pepelo i le Fa’amasinoga. O le mafua’aga lena na faia ai le Fa’amasinoga ma tuu i ai le Fa’amasino Samoa, e le gata e malamalama i pepelo a tagata e pei o i laua, ae malamalama fo’i i uiga fa’aaliga o tagata Samoa.

 

Na fautuaina e le afioga a Sunia ia Theresa ma Sina, ia fai le mataupu ua ta’usala ai i laua ma aoaoga i le lumana’i.