Ads by Google Ads by Google

Fa’atauto Logoai Siaki Logoai avea ma senetoa Manu’a #1


Logoai Siaki Logoai (ogatotonu) fa’atauto i le aso Gafua e avea ma senetoa fou o le itumalo Manu’a #1 i le Maota Maualuga. [ata: FS]

Ua atoa nei le aofaiga e 18 o afioga i senetoa o le Maota Maualuga ina ua ma’ea ona fa’atautoina i le taeao o le aso Gafua o le vaiaso lenei ia Logoai Siaki Logoai e avea ma senetoa e sui tulaga i le nofoa o le itumalo o Manu’a #1, sa avanoa ona o le tu’umalo o le afioga i le senetoa ia Galeai Moaali’itele Tu’ufuli i le masina o Oketopa i le tausaga ua te’a.

 

O le fa’atautoina o Logoai sa faia i se sauniga i le Maota Maualuga ina ua ma’ea le fonotaga fa’apitoa a Senatoa, e pei ona valaauina e le afioga ia Gaoteote Tofau Palaie, le Peresitene o le Maota Maualuga.

 

I le amataga o le fonotaga, na saunoa le afioga ia Gaoteote e fa’apea o lo’o manino mai i le tulafono, e ave i itumalo ta’itasi, e fai ai a latou filifiliga mo so latou senetoa ona aumai lea o so latou sui i le maota.

 

“E tofu [lava] itumalo ma a latou faiga. E i ai itumalo e mafai ona tofitofi - a uma lea nu’u, ave i lea nu’u. O faiga la’ia a itumalo,” o le saunoaga fa’amalamalama lea a Gaoteote i afioga i senetoa. “A o le tulafono, e iloilo fa’aitumalo.”

 

I lana saunoaga sa fa’ailoa ai e Gaoteote e fa’apea ua ma’ea ona fa’alauaitele e le Kovana Sili, Lolo Matalasi Moliga, lana tusi, po’o le “Writ” i le itumalo ma le Ofisa o Mataupu Tau Samoa ina ia saili le tofi e suia le afioga ia Galeai.

 

“Ua fai le galuega a le Ofisa o Matapu Tau Samoa. Ua aumai foi pepa fa’amaonia, sainia foi e le afioga i le Maoputasi - Mauga T. Asuega - o le failautusi o le Ofisa o Mataupu Tau Samoa, ae maise le Kovana Falelelima, e pei ona sainia e le afioga i le Faatui ia Laolagi,” ose isi vaega lea o le saunoaga a Gaoteote.

 

Ua le gata i lea ua aumai foi le pepa molimau mai le afioga i le kovana, e fa’amonia ai tofiga ma o pepa uma ia ua ma’ea ona tauaao e le Peresitene o le Maota Maualuga.

 

“O pepa na aumai e ala i le tofia, o le tofa ia Logoai e avea ma sui na te suia le nofoa o Tavita sa i ai le afioga ia Galeai,” o a Gaoteote lea.

 

Ae pe’itai o lo’o i ai tusi tete’e mai nisi foi o lea itumalo. “Ua manatu i latou e tatau ona toe avatu e toe fono ai le itumalo aua so latou sui. Ua na o tusi, o lea o lo’o ta’atia i luma nei,” o se fa’amalamalamga lea a Gaoteote. “Ae le taofia galuega a le Fono.”

 

Sa ia saunoa foi, e le fou ia ituaiga mataupu i galuega a le Fono, ae maise le Maota Maualuga, “aua e leai se nofoaiga e le sala ai le Fono e ala i nei foi gasegase pe afai ua oo mai tofiga, ae i ai nisi e fa’atuiese, e le malilie”.

 

“O lea ua ou fofola [atu], ina ia malamalama o lo’o i ai tusi e fa’atuiese e ala i lea faamoemoe,” o le saunoaga lea a Gaoteote ma ia fa’ailoa ai tulaga masani a le Maota e tofia se komiti iloilo e to’atolu totino, e taga’i i pepa ua tuuina atu i le Senate ona o lenei tofiga.

 

A ma’ea, ona aumai lea o sa latou lipoti ona fai lea i ai o finagalo o le Maota Maualuga. O le komiiti iloilo sa tofia ai le afioga i le senetoa ia Tuaolo Manaia Fruean e avea ma taitai komiti, fa’atasi ai ma sui o le komiti, afioga i senetoa ia Magalei Logovi’i ma Fa’amausili Mau Jr.

 

Saunoa Gaoteote, e le tofia le Sui Peresitene, afioga senetoa Nuanuaolefeagaiga Soaluaga Nua, ona o ia e toalua i ai sui o le itumalo i totonu o le Maota Maualuga. O le afioga ia Nuanuaolefeagaiga o ia foi o le taitai komiti o le Komiti o Tulafono a le Maota Maualuga.

 

Ma o le komiti iloilo e tuuina atu sa latou fautuaga i le Maota i lenei mataupu.  Sa fai se malologa pu’upu’u ae tuu le avanoa i le komiti iloilo e faia ai a latou iloiloga.

 

E le’i atoa se 10 minute ae toe valaauina le fono ina ua ma’ea galeuga a le komiti iloilo, ma na saunoa Tuaolo, o lea ua aumai le fa’ailoa o le afioga ia Logoai e fa’aauauina le tofi o le itumalo.

 

“E talitonu le komiti o le fa’aiuga lena. Lea ua faamalieina le tulafono ma le Fa’avae e pei ona tuuina mai e le afioga i le kovana, ae maise foi o le  failautusi o Mataupu Tau Samoa,” o le saunoaga lea a Tuaolo. “O le mea lea e avatu ai le fautuaga, i lau afioga i le Peresente ma le mamalu o le tatou Maota...tatou alo e talia le tofiga o le afioga ia Logoai.”

 

E le’i iai se isi e tete’e pe fia saunoa ina ua tuuina atu le avanoa i le maota. I le fa’aiuga, sa pasia e le Maota Maugaluga ia Logoai, e pei ona saunoa Gaoteote ma fa’amalo i afioga i senetoa.

 

E tu’umalo le afioga ia Galeai ua toe lua tausaga o lo’o totoe i lana nofoaiga e fa tausaga. Ma o le umi foi lea o le nofoaiga a Logoai i le Maota Maualuga e lua tausaga.