I le ta tonu o le 12:00 i le aoauli ananafi sa amatalia ai loa le sauniga mamalu e fa'atauto ai Sui Tofia uma o le Maota o Sui o le Fono Faitulafono o le Malo o Amerika Samoa, ua mae'a filifilia e ala i le palotaga ua mavae atu ia Novema 2018, ma ua saunia fo'i i latou mo galuega fai a le Maota o Sui i lana nofoa'iga lona 36 lea e amatalia aloa'ia ia Ianuari 14, 2019.

O i latou uma ua fa’atuto sa fa'amaonia e le Ofisa o Palotaga a le Malo o Amerika Samoa i lea lava sauniga, lea sa tutula'i muamua ai lava le susuga le Faife'au, Rev. Fa'alili Otineru, e tatala i le tatalo.

Na soso'o lea ma le tutula'i uma o sui tofia ae tolaulauina le Tautinoga e lana afioga le Fa'amasino Sili, Michael Kruse, mo le  tautoga fa'apitoa a Faipule uma, e avea ai ma sui o latou Itumalo ta'itasi.

Ina ua tu'ua e le Fa'aasino Sili le sauniga ua mae'a lana vaega, ae tu'uina atu le avanoa e le Failautusi tuai o le Maota, Vaiaitu Mulinu'u Maluia i le Fa'atonu o le Ofisa o Palotaga mo lana fa'amaoniga o nei sui uma, ua mae'a filifilia e tusa ma ala uma o le tulafono tau palotaga a Amerika Samoa, ua agava'a ai mo latou tofiga e galulue ai o Sui o latou Itumalo taitasi.

I lea taimi na saunoa ai Dr. Lealofi Uiagalelei ma ia fa'ailoa, ua mae'a fa'amaumauina, sailiilia ma ua agava'a i latou uma ua fa'amauina suafa mo latou itumalo e galulue i le Maota o Sui e avea ma latou leo. Ua leai fo'i se isi vala o le tulafono tau palotaga e tau faafesiligia ai lea tofiga.

Ona tau a'ao loa lea o le teutusi tele ua aofia ai tusi pasi fa'amaonia ma le lisi o suafa o i latou uma ua pasia mo lenei nofoa'iga lona 36 a le Maota o Sui.

O le fa'atautaiga o le palotaga o se sui e avea ma Fofoga Fetalai o le Maota na sosoo ai, ma sa fa'aauau pea ona faia lea tiute e Maluia. Na tula'i le susuga le Faipule o le itumalo lona 17, Gafatasi Afalava ma ia fa'atuina ai le suafa o le Faipule sili ona umi lana tautua i totonu o le Maota o Sui, Faipule o le itumalo o le Alataua, Savali Talavou Ale.

Na fa'aluaina lea e le susuga Vaetasi Tu'umolimoli S. Moliga lea sui ma ua tula'i fo'i le isi sui ma fa'atolu. Ona tula'i lea o Rep. Fetu Fetui Jr e fa'atu le lafo e alo loa i le palota ona e le o fa'atuina mai se isi sui mo le tofi lea. Ona faia lea o le palota ma ua tula'i mai le i'uga e 20 palota ina Savali e toe avea ma Fofoga Fetalai, ma e leai se fa’atuiese.

Ina ua mae'a ona vala'auina fa'apitoa lea o le susuga le Fofoga Fetalai Savli Talavou Ale na te fa'atautaia loa galuega e soso'o ai mo le maota o sui. Na tula'i Savali ma soso'o loa galuega fa'atino a le maota, o le sailiga lea o le Failautusi ma le Satini a le Maota o Sui mo le nofoaiga fou.

Na fa'atula'ia ese i la'ua na tauavea mai nei tofiga i le nofoa'iga lona 35, ae se'i faia le sailiga. Ina ua tula'i ese i la'ua na tu'u mai loa i le fola le galuega o le filifilia ai o ia sui mamalu. Na faatuina mai le suafa o Vaiaitu Mulinu'u Maluia e le ali'i Faipule mai le Ituau malosi, Manumaua Wayne Wilson. Fa'aluaina e le susuga Rep Logoituau  Mark Atafua ma tula'i ane fo'i Rep Titiali'i Kitara Vaiau. Na ia folasia, "Ua foliga mai ua auau fa'atasi sui uma o tama fanau mai Nuuuli, peita'i, ua ou loto e fa'aauau galuega a le Maota i lea tofiga."  Ona o lana lea saunoaga e le'i tete'e i le iuga i le sui ua fa'atuina, ma ua fa'aauau loa e faia le palota i lea tofiga. Na mae'a le palotaga 20 - 0 mo Vaiaitu Maluia.

Ona vala'auina lea o lea sui e auai mai i galuega a le Maota, ma fa'aauau ai le palotaina o le Satini o le Maota mo le tauaofiaga lona 36. Na fa'atuina mai le susuga Line Olo, ma ua fa'aluaina ma fa'atoluina ona faia loa fo'i lea o le palota. Ua toe tula'i nei fo'i Vine Olo i lona tofiga sa tautua mai ai, ma o lo ua palotaina e avea ma Satini o le  Nofoa'iga lona 36 o le Maota.

Ina ua mae'a nei galuega uma, ona faliu lea o le afioga le Fofoga Fetalai i lana saunoaga aloa'ia mo lenei tausaga i galuega o le a amatalia a le Maota o Sui, lea fo'i o le a ia toe ta'ita'ia.

"Ou te mua'i fa'afetai i lo outou mau talitonuina o le sui. E le faigofie lenei filifiliga aua e to'atele i latou o e o agava'a i lenei tofi ua alaalata'i mai, peita'i ua outou toe filifilia a'u e fa'aauau le tautua. Fa'afetai ona ua tafa o outou finagalo ou te toe taumafai e fa'aauau le tofiga. O la outou pule lea."

Na fa'aauau lana tautalaga, "O lenei tofi e le o se ta'ita'i, ae o le tautua i le Maota o Sui o le Fono Faitulafono, ma o le a fa'aauau pea le galuega ma fa'amoemoe tele i le Atua e aumaia le poto, le malosi ma le iloa ona fa'ato'ato'a le maota o le atunu'u."

Ina ua mae'a sa ia fa'alauiloa mai o le a fa'aauau ona fa'atino tiute fai ua fa'ae'e atu ia te ia, ma o le a fa'atulagaina fo'i taimi e fa'ailoa ai na galuega uma, ae tatalaina aloa'ia le Nofoa'iga lona 36 a le Fono Faitulafono a le Malo o Amerika Samoa i le aso Gafua, 14 Ianuari, 2019 i le 10:00 i le taeao.

Na faatalofa aloa'ia mai fo'i o ia i le vasega o sui fou uma ua tutula'i mai mo latou itumalo ta'itasi, fa'atasi ai ma le mamalu o latou faletua ma aiga, ma o se nofoa'iga fo'i lenei ua iloga mai, ua fai si to'atele o sui talavou ua nofoia nofoa o latou itumalo.