Ua talia e le afioga i le Fa’amasino Sili ia Michael Kruse le talosaga a se ali’i pagota, ina ia fa’ataga o ia e malaga i fafo e saili ai se togafiti mo lona fa’afitauli o le tagofia lea o fualaau fa’asaina.

O le susuga a Tolupo Hodges Jr, o se tasi o tagatanu’u ua fa’atele ona tula’i i luma o le fa’amasinoga maualuga ona o tu’uaiga i lona solia lea o tulafono tau i fualaau fa’asaina a Amerika Samoa.

O le aso Faraile o le vaiaso na te’a nei na tula’i ai o ia i luma o le Fa’amasinoga Maualuga mo le tuuina atu o lana fa’aiuga, talu ai le mataupu e pei ona fa’amaonia ai lona le usitaia o poloaiga o lana nofovaavaaia sa tuuina atu i le 2010, ina ua fa’amaonia moliaga o lona umia fa’asolitulafono lea o vaega o fualaau fa’asaina o le mariuana ma le aisa.

O le ali’i loia fautua ia Michael White na tula’i mo Hodges Jr ae o le tama’ita’i loia sili lagolago ia Christy Dunn na tula’i mo le itu a le malo i lenei mataupu.

Na faatoese Hodges Jr i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i malaga atu ai i fafo e saili se togafiti mo le fa’afitauli o le tagofia lea o fualaau fa’asaina o loo a’afia ai o ia.

Na taua e le ua molia e fa’apea, o le tausaga na te’a nei na atoa ai le 50 tausaga o lona olaga. A o nofonofo i totonu o le sela i se tasi o aso, sa ia toe mafaufau ai i mea sese e tele sa ia faia i lona olaga atoa, ma ia iloa ai le leai o sona aoga i ona matua i le 49 tausaga ua tuana’i o lona olaga. E oo lava fo’i i lona to’alua ma lana fanau, e le o i ai fo’i sona aoga i lona aiga.

Na ta’utino le ua molia i le fa’amasinoga, afai ae maua se isi avanoa mo ia, na te le toe solia se tulafono, na te le toe fa’aaogaina fo’i fualaau fa’asaina, ae o le a fa’aaoga aso o lona ola o loo totoe e tausi ai ona matua ua matutua, aemaise ai lona to’alua ma lana fanau.

Na finau lana loia fautua i le fa’amasinoga ina ia tu’u se avanoa ia Hodges Jr e malaga atu ai i fafo e saili se togafiti mo lona fa’afitauli o le tagofia lea o fualaau fa’asaina. Sa ia talosaga fo’i i le fa’amasinoga, afai e manatu le fa’amasinoga e fa’asala le ua molia ona o le mataupu e fa’atatau i lona le usitaia o poloaiga o lana nofovaavaaia talu mai le 2010, na talosagaina le fa’amasinoga ina ia tuli fa’atasi ia fa’asalaga e lua.

I le mae’a ai ona fa’afofoga o le fa’amasinoga i le fa’amatalaga a Hodges Jr, na saunoa ai Kruse e fa’apea, o se taimi muamua lea talu ona avea o ia ma Fa’amasino, ua ia fa’alogo ai i se tala manaia mai se tagata ua fa’atele ona molia ma ta’usala i le umia o fualaau fa’asaina.

Na faailoa e le fa’amasinoga ia Hodges Jr lo latou malamalama lelei i lona alofa i ona matua, o lona to’alua ma lana fanau, peita’i afai e le suia lona olaga tuai i le fa’aaogaina o fualaau fa’asaina, lona uiga e tumau pea o ia i le olaga sa ola muamua ai.

Na faailoa fo’i e Kruse ia Hodges Jr e faapea, na pau le nofoaga e maua ai le fesoasoani o ia, o le malaga lea i fafo e saili ai se togafiti mai polokalame eseese o loo maua ai, ae afai e toe fo’i mai ma toe ola lava i le olaga tuai, ona tuuina atu ai loa lea o se fa’aiuga a le fa’amasinoga ia te ia e tusa ai o le mataupu ua molia ai o ia.

Ua faamalumalu le tuuina atu e le fa’amasinoga o sana faasalaga fa’asaga ia Hodges Jr, i lalo o tuutuuga faapitoa, o le a ia tuua le atunuu ma malaga atu i fafo e saili ai se togafiti mo lona fa’afitauli.

O le aso 18 o Me, 2017 na osofa’i ai e Leoleo le fale o Hodges Jr i Alofau faapea ai ma totonu o lana ta’avale, i lalo o se poloaiga a le fa’amasinoga e saili ai o ia poo ia umia fualaau faasaina.

I lea osofaiga, na maua ai e Leoleo mea e fa’aaoga e tagata e tulei ma faatau atu ai fualaau fa’asaina. Sa maua fo’i i lona fale i Alofau se paipa o loo i ai vaega o le pauta fa’asaina o le aisa.

A o taofia ai Hodges Jr e fa’atali ai se faaiuga o lana mataupu, na faia e sui o le Ofisa Faanofovaavaaia se suega i lona tino, ma faamaonia ai lona fa’aaogaina o le pauta o le aisa.