Ua tusa nei ma le fa vaiaso talu ona tuana’i le osofaiga a Leoleo lea sa faia i le falepuipui i Tafuna i le amataga o le masina fou, peita’i o lea ua tauaao e le Samoa News fa’asea mai ni isi o pagota o lo o taofia i le fale o le RSAT, i faiga saua fa’asaga ia tei latou e aunoa ma se mafua’aga.

O ia faiga saua ma le pologa e aofia ai le aveese mai lea o i latou uma sa taofia i le fale o le RSAT ma loka i le Max, poo le potu e fa’asala ai tagata ua latou faia solitulafono mamafa e aunoa ma sa latou solitulafono.

“O le fa lenei o vaiaso talu ona loka matou i le Max. O le vaiaso muamua lava ina ua fa’atoa loka matou i le nofoaga lea, sa le mafai ona matou taeele, leai ni meaai poo ni vaiinu, e leai fo’i ni aluga ma ni ie afu matou te fa’aaogaina, ae matou te momoe i le malulu, ona o a matou meatotino uma o loo i ai pea lea i le nofoaga o le RSAT,” o le molimau lea a se tasi o pagota i le Samoa News.

Na taua e pagota e fa’apea, o le faaiuga e faasala ai i latou i le Max, na faia lea ina ua mae’a le osofaiga sa faia i le latou potu e leoleo mai le Vaega e Suesueina Fualaau oona, ma faamaonia ai le i ai o le vailaau oona i tino o ali’i e to’afa sa faia i ai le suega.

“E leai ni fualaau fa’asaina na maua i le osofaiga a leoleo, e na o le paipa tioata sa maua i le potu o se tasi o ali’i, ao lea ua fa’asala uma ai matou. E to’a fa fo’i ali’i na faia i ai le suega ma faamaonia lo latou tagofia o le fualaau oona o le aisa, ae le to’atolu e pei ona taua i le ulua’i ripooti a le Samoa News,” o le molimau lea a le pagota.

O ali’i pagota e to’afa na taua sa faamaonia lo latou faaaogaina o le aisa, e aofia ai John Tuupo, Wayne Gasolo, Tolupo Hodges Jr ma Sio Olomali’i.

Na taua e le pagota e fa’apea, latou te le iloa le mafua’aga ua ala ai ona faia le faaiuga e taofia i latou i le Max, e ui e leai  ma ni fualaau fa’asaina sa maua i le osofaiga a Leoleo.

O se tasi o itu o lo o fesiligia e pagota, o le mafua’aga na ala ai ona le aofia le ali’i pagota o Olomali’i i le lisi o i latou ua molia i le le usitaia o tuutuuga o a latou nofovaavaaia.

“O le itu sa matou molimauina, o le aso Faraile, 4 o Me na faia ai suega mo alii pagota nei ma faamaonia ai lo latou tagofia o le aisa, ae o le aso Sa na sosoo ai na malaga ai loa Olomali’i i Samoa,” o le molimau lea a le pagota.

“Aisea na fa’ataga ai Olomali’i e alu i Samoa a o lea ua fa’amaonia i le suega sa faia lona le usitaia o tuutuuga o lana nofovaavaaia, ina ua maua i lona tino le vailaau oona o lo o maua i le pauta o le aisa,” o le fesili lea a pagota.

Na taua e pagota i le Samoa News e fa’apea, e to’a 6 pagota sa faia a latou suega e pei ona aofia i tuutuuga o a latou nofovaavaaia mai le Fa’amasinoga. E to’afa e mai le fale o le RSAT, ma le isi to’alua e o mai i le nofoaga o lo o taofia ai i latou e lei mae’a a latou fa’amasinoga.

O le fa’aiuga o lea suega sa faia e le Ofisa Faanofovaavaaia, e to’a fa na fa’amaonia lo latou tagofia o le aisa, ae le to’a 3 e pei ona ripotia muamua e le Samoa News.

Na faamaonia mai e se molimau i le Samoa News e fa’apea, e to’a fa i latou sa fa’amaonia lo latou fa’aaogaina o le aisa i le taimi o le suega, ma o lea to’afa e aofia ai ma Olomali’i.

E fai le suega ia Olomali’i, ae o le taimi lea ua mae’a ai ona totogi lona pasese e toe fo’i atu ai i Samoa, o le mafua’aga lena sa faia ai loa le fa’aiuga, e sili ona fa’aauau pea le malaga ese atu o Olomali’i ma le atunu’u, e pei ona poloaina ai e le fa’amasinoga le tatau lea ona ia tuua Amerika Samoa ma toe fo’i atu i Samoa, pe a mae’a ona tuli lana fa’asalaga i le toese i Tafuna.

O Olomali’i na ta’usala i lona umia faasolitulafono o se paipa tioata sa i ai vaega o le aisa i totonu, ma faanofovaavaaia ai loa o ia mo le umi e 5 tausaga i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuua o le atunuu pe afai e mae’a ona tuli lana fa’asalaga faa falepuipui e 6 masina.