Ads by Google Ads by Google

Fa’asala ia Laofie Samuelu i le susunuina ta’avale a lona tausoga


[ata: foa'i]

O se ali’i e 47 tausaga o lona soifuaga ma o se tama e to’aono lana fanau ua fa’asalaina e le fa’amasinoga i le toese ina ua ta’u sala o ia i lona susunuina o le ta’avale a lona tausoga.

 

E pe’i ona fa’ailoa i fa’amaumauga a le fa’amasinoga sa ova le ona o le susuga ia Laofie Samuelu i le taimi sa ia faia ai lea gaoioiga le alofa.

 

O le vaiaso ua te’a sa tulai ai Samuelu i luma o le Fa’amasinoga Maualuga mo le lauina o lana fa’asalaga ina ua ma’ea ona ia sainia se maliliega ma le malo - ma ua talia foi e le fa’amasinoga. I lalo o le maliliega sa tali ioe ai le ua molia i le moliaga mamafa o le fa’aleagaina o mea totino a se isi tagata e ala lea i lona susunuina o le ta’avale a lona tausoga (cousin).

 

Saunoa le afioga i le Fa’amasino Sili ia Michael Kruse o ia gaoioiga e le tatau ona faia ma e tatau ona taofia.

 

I luma o le fa’amasinoga sa fa’ailoa ai e Samuelu e fa’apea ua mafua ona ia faia lea gaoioiga ona ua ova le ona.

 

Ae sa fa’ailoa i ai e le Fa’amasino Sili, o lea ituaiga fa’amataaga e sau mai le isi taligai le isi taliga. “Ua e fai mai nei o le ova o lou ona sa e faia ai lea gaioiga,” o le saunoaga lea a Kruse ia Samuelu, “Ma e tutusa lelei lea fa’amatalaga ma lou fai mai o le tiapolo sa fa’aosoosoina oe e susunu le ta’avale a lou tausoga.”

 

I se iloiloga o lenei mataupu i le masina ua te’a o Tesema, 2018 sa talosaina ai e le fa’amasinoga le loia a le ua molia, ina ua tuuina atu se lipoti e fa’amautu ai le tupe e totogi (restitution) e Samuelu, ona o lo’o fa’ailoa i le lipoti tusitusia a le Ofisa Nofovaavaiga e le faigaluega le ua molia ma e le’i i ai lava sana galuega i lona olaga.

 

O le tupe totogi e le ua molia o se tasi lea o vaega o le maliliega sa saunia e le malo ma Samuelu. Ae sa fautuina e le fa’amasinoga le itu tete’e ina ia maua se fa’aiuga lelei mo lenei mataupu, e tuuina atu i le cousin e toe fa’aleleia ai ana meatotino sa fa’aleagaina e le ua molia.

 

O le ali’i loia fautua ia Rob McNeill o lo’o tula’i mo Samuelu ma sa ia tuuina atu i le fa’amasinoga se tali i lenei mataupu. E totogi e Samuelu le ta’i $50 tala i le masina. Sa fa’ailoa foi e McNeill i le fa’amasinoga ua salamo Samuelu i le solitulafono e pei ona molia ai o ia.

 

O se tasi o matapu sa laga e le fa’amasinoga o le tau atoa o mea na fa’aleagaina o le ta’avale - $10,000 pe $13,000. I le fa’aiuga sa fa’atulaga ai e le fa’amasinoga le $10,000, ae afai e le lava lea aofaiga e mafai e le tausoga ona faila sana tagi i le Fa’amasinoga Fa’aitumalo fa’asaga ia Samuelu.

 

O le fa’asalaga o Samuelu e lima tausaga i le toese i Tafuna ma totogi le sala tupe e $5,000. Ae o le fa’atunuuina o le fa’asalaga i le toese o le a fa’amalumalu e tuuina atu le fa’anofo va’avaia mo le lima tausaga, e aofia ai lona tuli ina o masina e 20 i le toese.

 

A o i ai o ia i le toese, e le mafai ona tofia e avea ma se tagata fa’atuatuaina (trustee) ma e le mafai foi ona alu ese o ia mai le toese se’i vagana o se fa’alavelave matuia pe o se fa’atagana mai le fa’amasinoga.

 

A ma’ea masina e ono o le fa’asalaga i le falepuipui e mafai e le itu tete’e ona tuuina atu sa latou talosaga e iloiloina e le fa’amasinoga mo Samuelu e alu ai i tua e faigaluega ma toe foi i le toese. Ma i lalo o se talosaga fa’apea e tatau ona fa’amaonia e le itu tete’e e i ai se galuega ua maua e Samuelu.

 

O nisi o tuutuuiga o le fa’anofo vaavaia pe a magalo mai i tua o le toese, o le auai lea o Samuelu i aoaoga mo le ava malosi ina ia aua ai nei toe aafia i le ava malosi; suesueina o ia pe o lo’o tagofia le ava malosi; ma ia tatau ona i ai sana galuega e faigaluega ai, i totonu o le 90-aso talu ona magalo mai i tua o le toese.

 

Ua fa’atonuina e le fa’asinoga ia Samuelu, o le galuega e faigaluega ai e le fa’atagaina le galuega i se fa’atoaga pe o se fai fa’atoaga. Ua fa’asaina foi Samuelu ona ia taumafai e fa’afeso’otai lona tausoga pe o le aiga o lona tausoga.