Ads by Google Ads by Google

Fa’asala Faili Mata’u i lona le usita’i i poloaiga a le Fa’amasinoga

ausage@samoanews.com

Ua fa’asala e le fa’amasinoga maualuga le ali’i o Faili Mata’u e nofosala i le toese mo le umi sa totoe o lana fa’asalaga fa’a falepuipui e 15 masina, ina ua fa’amaonia lona le usitaia o tuutuuga o lana nofovaavaaia sa tuuina atu ia te ia i le amataga o le tausaga nei.

O le vaiaso na te’a nei na tula’i ai Mata’u i luma o le fa’amasinoga mo le tuuina atu o le fa’aiuga a le fa’amasinoga fa’asaga ia te ia, ina ua fa’amaonia lona fa’aaogaina o le fualaau fa’asaina o le aisa, e ui sa poloaina e le fa’amasinoga le fa’asa lea ona ia toe tagofia o fualaau fa’asaina poo le ‘ava malosi mo le umi e 5 tausaga o lana nofovaavaaia.

Ina ua maua le avanoa o Mata’u, sa ia fa’atoese ai loa i le fa’amasinoga. Na taua e le ua molia e fa’apea, o aso ia na taofia ai o ia i le toese talu mai le aso 11 Iuni 2018 e fa’atali ai le tuuina atu o se fa’aiuga a le fa’amasinoga, ua ia lagona ai le leaga o le le usita’i i le fa’amasinoga.

“A o fea le avanoa sa matou tuuina atu muamua ia te oe ina ua e talosaga mai mo se avanoa,” o le fesili lea a le afioga i le fa’amasino sili ia Michael Kruse ia Mata’u. E le i tali le ua molia i le fesili, se’i vagana ai lona fa’apea atu ma lona leo tau le lagona, “Ua ou lagona lo’u sese i lo’u le usita’i i le fa’amasinoga, e ala i lo’u fa’aaogaina o le aisa a o o’u faanofovaavaaia ai. Fa’amolemole, tu’u mai se isi avanoa se tasi mo a’u. Ua ou lagona lo’u salamo ma ua ou sese fo’i.”

Na fa’ailoa e Kruse ia Mata’u e fa’apea, ina ua lau lana fa’asalaga i le masina o Mati o le tausaga nei, sa ia lafi ai i tua o lona Tama ma lona Tuafafine, ma ia talosaga i le fa’amasinoga mo se avanoa e toe fo’i atu ai i tua e tausi i laua o lo o mama’i. Peita’i i ni nai aso mulimuli ane ai, na atagia mai ai le pepelo o lana talosaga, ina ua faamaonia le maua o le aisa i lona tino.

Na talosagaina e le loia a Mata’u ia Michael White le fa’amasinoga mo se avanoa mo le ua molia, ina ia fesoasoani ai i le fa’afitauli o le tagofia o le aisa o loo aafia ai o ia.

Na finau le loia a le malo ia Jason Mitchell ina ia fa’asala Mata’u i se fa’asalaga faanofovaavaaia, e aofia ai ma lona tuliina o ni masina i le toese i Tafuna e fai ma ana faasalaga i lenei mataupu. Na taua atili e le loia a le malo e fa’apea, o le taua o le tuuina atu o se fa’asalaga faanofovaavaaia mo Mata’u, e mafai ai e le Ofisa Faanofovaavaaia ona mata’ituina tulaga uma o lana nofovaavaaia, e aofia ai ma lona usitaia o tuutuuga ma poloaiga a le fa’amasinoga.

Na soisoi Kruse i le fautuaga a le malo ma ia saunoa ai e fa’apea, “e faapefea ona fai mai e aoga le faasalaga faanofovaavaaia mo le ua molia, e na o le tasi lava le vaiaso na tatala ai i tua ae maua ua toe fo’i lava i le olaga tuai, o lona fa’aaogaina lea o fualaau fa’asaina o le aisa.”

E tusa ai ma le ripoti a le Ofisa Faanofovaavaaia, o se tasi o tuutuuga o le nofovaavaaia e 5 tausaga a Mata’u na tuuina atu e le fa’amasinoga i le masina o Mati o le tausaga nei, ina ua ta’usala o ia i le moliaga o le umia fa’asolitulafono o vaega o le pauta oona o le aisa, o le aua lea ne’i ona toe tagofia fualaau fa’asaina poo le ‘ava malosi.

E le gata i lea, sa poloaina fo’i e le fa’amasinoga ia Mata’u na te tuliina masina e 20 i le toese, o se tasi o tuutuuga o lana nofovaavaaia, e aofia ai ma le 4 ma le afa masina lea na taofia ai o ia i le toese.

O le umi na totoe ai o lana faasalaga faafalepuipui e 20 masina, tusa lea e 15 masina, na faamalumalu e le fa’amasinoga lona tuliina, ae na poloaina loa Mata’u ina ia tatala i tua mai le falepuipui i le aso 27 o Mati, 2018, o le aso fo’i lea na lau ai lana fa’asalaga.

O le isi vaiaso na sosoo ai, Aperila 2, 2018, na aga’i atu ai loa Mata’u e vaai le Ofisa Faanofovaavaaia, ma fa’ataunu’u ai lava i le aso lea lana suega mo fualaau fa’asaina ma le ‘ava malosi. O le fa’aiuga o lea suega, na fa’amaonia ai le maua o le vailaau oona o loo i totonu o le pauta o le aisa i lona tino.

O le mae’a ai la ona fa’afofoga o le fa’aamsinoga i fa’afinauga a loia atoa ai ma le fa’atoesega a Mata’u, na toe fesili ai loa le fa’amasinoga i le ua molia.

“Sa matou tuuina atu le avanoa ia te oe ina ua e talosaga mai i le taimi muamua, a o lea fo’i ua e toe talosaga mai i se isi avanoa.

Na fa’amanatu e Kruse ia Mata’u mau faamaonia o le mataupu e pei ona ta’usala ai o ia e le fa’maasinoga, ina ua maua e Leoleo o ia ma ni fualaau fa’asaina a o moe i se fale fa’atali pasi i Tafuna. Ina ua fesiligia e Leoleo, sa ta’utino i ai le ua molia, e maua o ia i le fa’afitauli o le fiafia i le fualaau fa’asaina o le aisa.

“Sa matou taofia le tuliina fa’amae’a o lau fa’asalaga faa falepuipui e 20 masina, ona o lau talosaga e te fia alu i lou aiga e tausi lou Tama ma lou tuafafine o loo a’afia i ma’i o le tino. O le taimi nei, ua le toe talitonuina oe e le fa’amasinoga. O le mea lea, o le 15 masina lea sa totoe o lau fa’asalaga faa falepuipui, ua poloaina nei oe e te tuliina. E sili atu lena nai lo le faaleaoga e le fa’amasinoga o lau nofovaavaaia, ae poloaina loa oe e te tuliina le umi e 5 tausaga,” o le saunoaga lea a Kruse ia Mata’u.