E 5 tausaga lea ua poloaina e le Fa’amasinoga Maualuga e taofia ai le ali’i o Sui Tago Jr i le toese i Tafuna, ina ua ta’usala o ia i le moliaga o le umia fa’asolitulafono o vaega o le pauta fa’asaina o le aisa.

E ese mai i le fa’asalaga fa’a falepuipui a Tago Jr lea ua amata tuliina nei, o le aso Faraile o le vaiaso nei lea ua fa’atulaga e toe tula’i ai o ia i luma o le Fa’amasinoga Maualuga, mo lana iloiloga e fa’aleaoga ai lana nofovaavaaia sa tuuina atu i le 2009.

Afai ae manatu le Fa’amasinoga e fa’aleaoga loa tuutuuga o le nofovaavaaia mai i le 2009, e ono toe fa’aopoopo se isi taimi umi e taofia ai o ia i le toese i Tafuna.

O le susuga a Tago Jr, 40 tausaga le matua na taofia lava i le toese talu mai le taimi na loka ai o ia e Leoleo i le masina o Iuni o le tausaga nei, ina ua le mafai ona totogi le tupe e $5,000 sa fa’atulaga e tatala ai o ia i tua.

O le aso Gafua o le vaiaso nei na tula’i ai o ia i luma o le fa’amasinoga mo le lauina o lana fa’asalaga. Sa tula’i mo ia le ali’i loia fautua ia Michael White, ae o le tama’ita’i loia sili lagolago ia Laura Garvey na tula’i mo le itu a le malo.

Na ulua’i tu’uaia e le malo ia Tago Jr i le moliaga mamafa o le umia fa’asolitulafono lea o vaega o le pauta fa’asaina o le aisa, o se solitulafono e mafai ona fa’asala ai o ia i le toese mo le umi e le itiiti ifo i le 5 tausaga ae le sili atu i le 10 tausaga, poo le salatupe e le itiiti ifo i le $5,000, ae le sili atu i le $20,000.

Ae i lalo o se maliliega na sainia e Tago Jr ma le malo, na malie ai le malo e fa’aitiitia le mamafa o le solitulafono fa’asaga ia Tago Jr, ina ia fa’ailoa ai le moliaga o le umia fa’asolitulafono o vaega o le pauta fa’asaina o le aisa, o se solitulafono e mafai ona fa’asala ai o ia i le toese mo le umi e mafai ona oo atu i le 5 tausaga, poo le salatupe e mafai ona oo atu i le $5,000.

I le tali ioe ai o Tago Jr i le moliaga e pei ona ta’usala ai o ia, sa ia ta’utino ai e fa’apea, i le aso 28 o Iuni o le tausaga nei i Tafuna, sa ia umia fa’asolitulafono ai vaega o le pauta fa’asaina o le aisa.

Ina ua maua le avanoa o Tago Jr, sa ia fa’atoese ai i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua i lona aiga e tausi si ona Tina ua matua.

Na taua e le ua molia e fa’apea, ua ia lagona lona salamo mai lana solitulafono sa faia, ma ua ia iloa fo’i ma lagona le leaga o le gaioiga sa ia faia. Sa ia augani i le fa’amasinoga mo se isi avanoa se tasi mo ia e toe sui ai lona olaga.

E leai ni fa’afinauga na tuuina atu e le loia a Tago Jr faapea ai le malo ina ua tuuina atu e le fa’amasinoga le avanoa la te finau ai mo se fa’asalaga mo le ua molia.

A o le i aga’i atu Fa’amasino e iloilo sa latou fa’aiuga, sa fesili le afioga i le ali’i Fa’amasino Sili lagolago ia Elvis P. Patea i loia e faailoa atu nisi o mataupu o loo fia malamalama i ai le fa’amasinoga, e fa’atatau i le ta’avale lea na maua i ai e Leoleo ia Tago Jr ma isi ali’i, atoa ai ma fualaau fa’asaina sa i totonu o lea ta’avale.

Sa fia iloa e Patea poo ai na avea le ta’avale, ae o a fo’i mea a Tago Jr sa fai i totonu o le ta’avale i le taimi na pu’e fa’apagota ai o ia e Leoleo.

Na fa’ailoa e Garvey i le fa’amasinoga e fa’apea, e to’atolu ali’i sa i totonu o le ta’avale e aofia ai ma Tago Jr. O le isi to’alua e aofia ai Misi Siua, o ia fo’i lea o le ta’avale, ma o loo molia fo’i o ia i lenei mataupu, atoa ai ma le isi ali’i na toe tatala i tua e Leoleo.

O le isi ali’i e to’atolu ai i latou o loo molia e le malo i le mataupu lenei, o ia lea o Henry O’Brien, e ese le ta’avale ma le nofoaga na pu’e fa’apagota mai ai o ia e Leoleo.

E silia i le 10 minute o iloilo e ali’i Fa’amasino sa latou fa’aiuga e tusa ai o lenei mataupu. A o lei saunoa Patea e fofogaina le fa’aiuga a le fa’amasinoga, sa muamua ona ia fa’ailoa ia Tago Jr nisi o vaega taua e fia fa’amanatu e le fa’amasinoga ia te ia.

Saunoa Patea ia Tago Jr e fa’apea, ina ua fa’atoa faila e le malo le latou tagi fa’asaga ia te ia, sa molia ai o ia i le solitulafono e mafai ona fa’asala ai o ia i le toese mo le umi e oo atu i le 10 tausaga, peita’i i lalo o le maliliega sa latou faia ma le malo, ua maua ai se fa’amama avega tele mo ia, ona o lea ua tausala o ia i le solitulafono e mafai ona faasala ai o ia i le toese mo le umi e oo atu i le 5 tausaga.

“E tele le avanoa lea ua tuuina atu mo oe e le malo, ina ua sainia la outou maliliega ma le malo e faai’uina ai lenei mataupu, lea ua e maua ai le fa’asalaga e amata mai i le “0” e oo atu i le ‘5 tausaga’,” o le saunoaga lea a Patea ia Tago Jr.

“Ae i le vaavaai atu ai i le ripoti a le Ofisa Faanofovaavaaia, atoa ai ma faamaumauga uma o au mataupu o loo i luma o le fa’amasinoga, ua matou molimauina ai le tele o avanoa sa tuuina atu e le Fa’amasinoga lenei ia te oe i tausaga ua mavae. E fa’atolu (3) lelei ona tuuina atu e le fa’amasinoga avanoa ia te oe.”

“Ae tusa ai ma ripoti ua matou maua, na e faatinoina le solitulafono lenei ae o le taimi lea o loo faanofovaavaaia ai oe, ma ua matou faaiuina ai loa lenei mataupu, e le toe aoga se fa’asalaga faanofovaavaaia mo ia. O le mea lea, o le a taofia oe i le toese i Tafuna mo le 5 tausaga.”

O afioga i ali’i Fa’amasino Lagolago ia Satele Lilio Satele ma Suapaia J. Pereira na lagolago i le afioga a Patea i le tuuina mai lea o le fa’asalaga a Tago Jr.

TAGI A LE MALO

I le 2009, na ta’usala ai e le Fa’amasinoga maualuga ia Tago Jr i moliaga mamafa e 2 o le taupulepule e fa’atino le solitulafono o le talepe fale, faapea ai ma lona taliaina o ni oloa sa ave fa’agaoi. O ia moliaga e mafai ona fa’asala ai o ia i le toese mo le umi e 7 tausaga, pe faasala i le salatupe e $5,000 i le moliaga e tasi.

E ta’i 7 tausaga na manatu le fa’amasinoga e taofia ai Tago Jr i le toese i le 2009, peita’i na fa’amalumalu, ae faanofovaavaaia o ia mo le 14 tausaga i lalo o tuutuuga, na te tuliina masina e 56 i le toese i Tafuna.

O le tausaga e 2023 lea sa fa’atulaga e mae’a ai le nofovaavaaia a Tago Jr.

A o nofovaavaaia ai o ia, na pu’e faapagota ai e Leoleo o ia i le masina o Iuni o le tausaga nei i totonu o se ta’avale i Tafuna, ma maua ai i le taga o lona ofu sa fai se pepa iila laititi o loo i ai vaega o le pauta fa’asaina o le aisa.

Ina ua fesiligia e Leoleo, sa ta’utino ai Tago Jr e fa’apea, o le pepa iila sa ia te ia, na fai meaalofa atu ai Siua, ona o lona fesoasoani e tulei ma fa’atau atu le pauta oona o le aisa i isi tagata.

Na ta’utino fo’i Tago Jr, e silia i le 4 masina talu ona la galulue fa’atasi ma Siua e fa’atau ma tulei atu le aisa i isi tagata. O nisi o taimi la te kilivaina ai le aisa mo tagata e le maua le avanoa e o atu ai i le fale o Siua i Petesa e fa’atau mai ai le aisa.