Ads by Google Ads by Google

Faasala e le Fa’amasinoga ia Sonny Kelemete i le Toese mo le 40 masina

ausage@samoanews.com

E 40 masina lea ua faasala ai e le Fa’amasinoga Maualuga le susuga a Sonny Mika Kelemete e taofia ai o ia i le Toese i Tafuna, o se tasi lea o tuutuuga o lana nofovaavaaia e 10 tausaga, ina ua ta’usala o ia e le Fa’amasinoga i moliaga mamafa e 2 o le umia faasolitulafono lea o vaega o fualaau fa’asaina o le aisa.

 

O le vaiaso na te’a nei na tula’i ai Kelemete i luma o le afiogai le ali’i Fa’amasino Sili ia Michael Kruse mo le lauina o lana fa’asalaga. O le tama’ita’i loia sili lagolago ia Christy Dunn na tula’i mo le itu a le malo, ae o le susuga i le ali’i Loia Fautua lagolago ia Rob McNeill na tula’i mo Kelemete, lea sa taofia i le Toese i lalo o se poloaiga faapitoa a le Fa’amasinoga.

 

E 2 mataupu na molia ai e le malo Kelemete.

 

I le tagi muamua, sa tu’uaia ai Kelemete i moliaga mamafa e 2 o le umia faasolitulafono o vaega o le pauta faasaina o le aisa; atoa ai ma le moliaga o le umia faasolitulafono o le aisa ma le fa’amoemoe e tue’i ma faatau atu i isi tagata.

 

Ae i le tagi lona lua, sa tuuaia ai Kelemete i moliaga mamafa e 2 o le umia faasolitulafono o vaega o le pauta fa’asaina o le aisa; atoa ai ma le umia faasolitulafono o le pauta o le aisa ma le fa’amoemoe e tule’i pe fa’atau atu i isi tagata.

Ae i lalo o se maliliega aufa’atasi na sainia e Kelemete ma le malo, lea fo’i na talia e le Fa’amasinoga Maualuga, na malie ai le ua molia e tali ioe i moliaga na toe teuteu e le malo.

 

I le tagi muamua a le malo, na malie ai Kelemete e tali ioe i le moliaga mamafa e tasi o lona umia faasolitulafono lea o vaega o le pauta fa’asaina o le aisa. Ae i le tagi lona lua, na malie ai Kelemete e tali ioe i le moliaga mamafa o lona umia faasolitulafono o vaega o le pauta o le aisa, ma le fa’amoemoe e tule’i ma faatau atu i isi tagata.

 

O moliaga e pei ona tali ioe ai Kelemete, e mafai ona fa’asala ai se tasi i le toese mo le umi e i le va o le 5 i le 10 tausaga, pe faasala foi i le salatupe e le sili atu i le $20,000.

 

I le tali ioe ai o Kelemete i le moliaga muamua, sa ia ta’utino ai e fa’apea, i se taimi o le aso 7 o Iulai 2017, sa ia umia faasolitulafono ai se tama’i pepa iila sa tumu i vaega o le pauta fa’asaina o le aisa.

 

Na ta’utino atili Kelemete e fa’apea, a o tatala ai o ia i tua e faatalitali ai taualumaga o lana mataupu muamua, sa toe pu’e faapagota o ia e Leoleo i le aso 5 o Setema 2017, ma maua ai i lona tino ni pepa iila se 9 o lo o tumu i vaega o le pauta fa’asaina o le aisa. O lana gaioiga sa faia i lea aso, sa manino mai ai lona taumafai e tulei ma fa’atau atu vaega o le pauta o le aisa i tagata lautele o le atunu’u.

 

Na talosaga le loia a Kelemete ia McNeill i le Fa’amasinoga ina ia faasala le ua molia i se fa’aslaga faanofovaavaaia, e aofia ai ma se faaaoga o le umi lea ua mae’a ona ia tuliina i le toese e fai ma ana faasalaga i lenei mataupu.

 

Na taua e McNeill i le Fa’amasinoga e fa’apea, o Kelemete, o se Tama e 60 tausaga le matua sa tautua i vaega ‘au a le malo tele, ma ua malolo litaea mai o ia i lona aiga. Talu mai le taimi na tautua ai o ia i vaega ‘au a le malo tele, na a’afia ai o ia i le gasegase o le mafaufau, ma o nisi o taimi e ese ai lava gaioiga na te faia.

 

Na talosaga McNeill i le Fa’amasinoga ina ia silasila toto’a i le auaunaga a lenei Tama matua i le atunu’u ma le malo, ma tuu i ai se isi avanoa se tasi o mo ia. Na finau McNeill e fa’apea, o Kelemete, e i ai le gasegase e aafia ai lona soifua maloloina, o le mafua’aga lena e tatau ai ona i ai o ia i lona aiga, ina ia mautinoa e maua le avanoa e alu ai i le falema’i mo ana talavai faapea le vaaia o le foma’i.

 

Na taua e Dunn lona lagolagoina o le fautuaga a le Ofisa Faanofovaavaaia, ina ia tuuina atu se faasalaga faanofovaavaaia mo Kelemete. E talitonu fo’i le malo e pei ona finau Dunn, e agava’a le tuuina atu o le ua molia i ni aoaoga fa’a faufautua e fesoasoani ai i le faafitauli o lona tagofia o fualaau fa’asaina.

 

A o le i tuuina mai le faaiuga a le Fa’amasinoga, na faailoa e Kruse ia McNeill e fa’apea, e ui o lana talosaga i le aafia lea o Kelemete i se gasegase faapitoa o le tino, peita’i i le maitau a le Fa’amasinoga, e le o taofia lava e lea gasegase ia Kelemete mai lona aga’i atu i nofoaga lautele e tulei ma fa’atau atu ai fualaau fa’asaina.

 

Na taua e le Fa’amasinoga e fa’apea, o se tasi o itu o lo o aga’i i ai le finagalo o le Fa’amasinoga, o le mafua’aga ua ala ai ona 2 tagi a le malo fa’asaga ia Kelemete.

 

Ina ua mae’a ona faila e le malo le latou tagi muamua fa’asaga ia Kelemete i le masina o Iulai o le tausaga e 2017, na tatala ai loa Kelemete i tua ina ua ia totogi le $5,000 ma le tuutuuga, e aua ne’i ona toe solia se tulafono.

 

Lua masina mulimuli ane ai i le aso 5 o Setema, 2017, ae toe taofia fo’i e Leoleo ia Kelemete i luga o le alatele, ma maua ai o loo ia tulei ina atu fualaau fa’asaina i tagata lautele.

 

Saunoa Kruse e fa’apea, o le gaioiga a le ua molia na atagia mai ai i le manatu o le Fa’amasinoga, e le manatu mamafa o ia i le poloaiga sa tuuina atu e faasa ai ona ia toe soli se tulafono a le malo.

 

Ina ua saili e Leoleo le tino o Kelemete i le aso na taofia ai lana ta’avale i le masina o Setema, na maua ai pepa iila e 9 o loo i ai vaega o le pauta fa’asaina o le aisa. Ina ua mae’a ona faila le tagi lona 2 a le malo fa’asaga ia Kelemete, sa tatatala ai loa o ia i tua ina ua ia totogi le $30,000.

 

E 10 tausaga na manatu le Fa’amasinoga e faasala ai le ua molia, peita’i ua faamalumalu le tuliina o lea faasalaga, ae ua faanofovaavaaia o ia i le 10 tausaga i lalo o tuutuuga e ao ona ia usitaia.

 

O ni isi o ia tuutuuga e aofia ai lona tuliina o masina e 40 i le toese i Tafuna e aunoa ma le tatalaina i tua. Ua faasa ona ia toe tagofia le ava malosi poo fualaau fa’asaina, o le a faia fo’i ni suega i lona tino ina ia mautinoa ai na te le o toe tagofia fualaau fa’asaina poo le ‘ava malosi.

 

Ua poloaina e le Fa’amasinoga le malo ina ia gafa ma le totogiina o vailaau ma fualaau o le Falema’i a le ua molia, ma ia mautinoa e momoli le ua molia i soo se taimi e tatau ai ona alu e vaai le foma’i.

 

Na fautuaina e Kruse ia Kelemete, afai ae i ai se tuutuuga o tuutuuga nei na te le usitaia, o le a faaleaogaina loa lana nofovaavaaia, ae poloaina loa o ia e tuli atoa le 10 tausaga o loo faamalumalu o lana fa’asalaga.

 

I le mataupu o le tupe sa tatala ai Kelemete i tua, ua fuafua le Fa’amasinoga e faia lea iloiloga i se taimi o i luma, ona o lea ua faamaonia, e le’i usitaia e le ua molia tuutuuga na tatala ai o ia i tua, e aofia ai le tuutuuga o le auai i soo se taimi e valaau ai lana mataupu.