Ads by Google Ads by Google

Fa’asala David Meredith i le toese mo le 5 tausaga

ausage@samoanews.com

E 5 tausaga lea ua fa’asala ai e le fa’amasinoga maualuga le ali’i o David Meredith e taofia ai i le toese i Tafuna, ina ua fa’amaonia e le fa’amasinoga le moliaga o le ave ta’avale a o se’i e le fa’amasinoga lona laisene sa tu’uaia ai o ia e le malo.

 

E ese mai i le fa’asalaga e 5 tausaga lea ua tuu atu e le fa’amasinoga, na fa’asala fo’i le ua molia e taofia i le toese i Tafuna mo le isi fo’i 5 tausaga, ina ua fa’amaonia tu’uaiga o lona le usitaia lea o poloaiga o lana nofovaavaaia sa tuuina atu i le 2015.

 

E 10 tausaga sa tatau ona taofia sa’o ai le ua molia i le toese, peita’i o lea ua finagalo le fa’amasinoga e tuli fa’atasi ana fa’asalaga e ta’i 5 tausaga e lua, lona uiga, e na o le 5 tausaga lea ua fa’asala ai le ua molia i le falepuipui.

 

O le aso Faraile o le vaiaso na te’a nei na tula’i ai Meredith i luma o le fa’amasinoga mo le tuuina atu o lana fa’asalaga.

 

Na tula’i mo ia le ali’i loia fautua ia Michael White, ae o le ali’i loia sili lagolago ia Woodrow Pengelly na tula’i mo le malo.

 

Na fa’atoese Meredith e tusa ai o lana solitulafono, ma ia talosagaina ai se isi avanoa mo ia e toe fo’i atu ai i lona aiga e tausi lona aiga. Na taua e le ua molia e fa’apea, sa fa’alagolago lava lona olaga i lona Tina ao soifua mai o ia, peita’i ina ua maliu si ona Tina, o iina na amata ai loa ona vaaia suiga leaga i lona olaga, ma i’u ai lava ina saisaitia o ia i lalo o le tulafono.

 

Sa ia taua e fa’apea, o ia e sau mai se aiga to’atele i le atunu’u, ae talu lava ona taofia o ia i le falepuipui, e leai ma se isi na alu atu e asi o ia. Na ia ta’utino i le fa’amasinoga lona salamo moni e tusa ai o lana solitulafono, ma ia talosagaina ai se isi avanoa se tasi o mo ia se’i toe fa’aleleia ai lona olaga.

 

E le i manatu le loia a Meredith ia White e finau i le fa’amasinoga mo se fa’asalaga mama mo le ua molia.

 

Ae mo le loia al e malo, na finau Pengelly ina ia fa’asalaga Meredith i se fa’asalaga pito maualuga o loo fa’atulaga mai e le tulafono. Na taua e Pengelly e faapea, ua tele avanoa ua tuuina atu e le fa’amasinoga ia Meredith, ae foliga mai na te le o aoaoina ai lava se lesona taua.

 

Na taua e Pengelly e fa’apea, e to’atele isi tagata sa molia i le tulafono e pei fo’i o Meredith, na latou fa’aaoga tatau avanoa sa tuuina atu e le fa’amasinoga ia tei latou, peita’i o Meredith, e le o ia o se tagata e agava’a i se fa’asalaga faanofovaavaaia, ae tatau loa ona fa’asala o ia i se fa’asalaga pito sili ona maualuga o lo o fa’ataoto mai e le tulafono.

 

Saunoa le afioga i le ali’i fa’amasino sili lagolago ia Elvis P. Patea e fa’apea, e atagia mai i fa’amaumauga ua i luma o ia ma ana uso a fa’amasino lagolago, e fai lava si mafiafia o le faila a Meredith o loo i luma nei o le fa’amasinoga.

 

“A o fa’aleoina lau talosaga mo se isi avanoa e tuuina atu ia te oe, atoa ai ma lau ta’utinoga ua e salamo moni, o le taimi lea o loo matou matamata ai i lau faila o loo i luma o le fa’amasinoga,” o le saunoaga lea a Patea.

 

“E atagia mai i lau faila, e fai lava si tele o solitulafono na ta’usala ai oe e le fa’amasinoga i tausaga ua mavae, aemaise lava i solitulafono e a’afia ai le ‘ava malosi. E tele avanoa sa tuuina atu e le fa’amasinoga ia te oe, ae o nei avanoa uma sa e le manatu mamafa i ai, e te lei amanaiaina fo’i.”

 

“O lea la ua e toe talosaga mai mo se isi avanoa, ae ua uma fo’i ona tuuina atu e le fa’amasinoga isi avanoa e tele ia te oe. O le itu ua maitauina e le fa’amasinoga, e i ai lau fa’afitauli i le ‘ava malosi, e le mafai fo’i ona e pulea lou loto mai le tagofia o le ‘ava. Ua avea lea fa’afitauli ma auala ua e le usitaia ai ma poloaiga a le fa’amasinoga, ma ua atagia mai ai lou le popole i le fa’amasinoga.”

 

Mo le moliaga o le ave ta’avale ao se’i le laisene, e 5 tausaga ua fa’asala ai Meredith i le toese. Mo le tu’uaiga o lona le usitaia o tuutuuga o lana nofovaavaaia sa tuuina atu i le 2015, ua fa’aleaoga e le fa’amasinoga lana nofovaavaaia, ae ua poloaina o ia e tuli loa le 5 tausaga sa fa’amalumalu.

 

Ua poloaina e le fa’amasinoga le tuli fa’atasi o fa’asalaga ta’i 5 tausaga a le ua molia, lona uiga, e na o le 5 tausaga lea ua fa’asala ai o ia i le toese i Tafuna. O lea fa’asalaga, o le a aofia ai ma le umi lea ua mae’a ona ia tuliina e oo mai i le taimi nei.