Ads by Google Ads by Google

Faaopoopo le 5 tausaga i le faasalaga o le ali’i pagota na sola i tua


[ata: foa'i]
ausage@samoanews.com

O le ali’i pagota lea ua ta’usala e le Fa’amasinoga Maualuga i le moliaga mamafa o le sola i tua mai le falepuipui ao tuli ai lana fa’asalaga fa’a falepuipui e 20 tausaga, ua poloaina e le fa’amasinoga ina ia faaopoopo le isi 5 tausaga i lana fa’asalaga o lo o tuliina nei.

 

O le ali’i o Vatoi Ching Sam, poo Pati Lepou e pei ona iloa ai o ia e le to’atele, na tula’i i luma o le fa’amasinoga maualuga i le vaiaso na te’a nei mo le lauina o lana fa’asalaga. O le ali’i loia fautua ia Michael White na tula’i mo ia, ae o le tama’ita’i loia sili lagolago ia Laura Garvey na tula’i mo le malo.

 

E tasi le moliaga na tu’uaia ai e le malo ia Lepou, o le moliaga lava fo’i lea na ia tali ioe i ai, le moliaga o le sola ese mai le falepuipui, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

 

Ina ua maua lona avanoa mai le fa’amasinoga, na fa’atoese ai loa Lepou e tusa ai o lana solitulafono, ma ia talosagaina ai se isi avanoa mo ia se’i fo’i ai i lona aiga. Na faailoa e Lepou i le fa’amasinoga e fa’apea, ua fai lava si faigata o le olaga i totonu o le falepuipui i le taimi nei, pe a fa’atusatusa i le tulaga sa i ai i le 5 tausaga ua tuana’i, ma tua atu fo’i.

 

Sa ia taua e fa’apea, i le 5 tausaga ua tuana’i atu, sa faigofie ona maua e pagota mea uma e manana’o ai, e le gata o mea’ai, fasimoli ae oo lava fo’i i le olaga fiafia, peita’i o le taimi nei, ua matua faigata mea uma, ua faaletonu fo’i mea e nonofo ai pagota e aofia ai ma meaai, ma, o le mafua’aga tonu lea e ala ai ona sosola i tua isi pagota.

 

Sa ia taua fo’i i le fa’amasinoga le tele o taimi sa ia taumafai ai ina ia talia lana talosaga i le Palola, peita’i, ua fiu lava e tuu atu lana talosaga ae le talia, ma ua lagona ai fo’i ma le ita, ona e foliga mai e le o amanaia lana talosaga.

 

“Ua ou toe fia fo’i i lo’u aiga,” o le augani lea a Lepou. “Ua ou toe fia mafuta i lo’u aiga ma o’u matua, ae paga lea e le o taliaina e le Komiti Faafoe o le Palola la’u talosaga. Ua ou salamo ma ua ou le toe fia nofo i totonu o le falepuipui, ua ou fia sa’oloto ma ua ou fia maua se olaga fiafia,” o le molimau lea a Lepou i le fa’amasinoga.

 

Na talosaga le ali’i loia ia White i le fa’amasinoga, ina ia tuli fa’atasi se faasalaga e tuuina atu ia Lepou, ma isi ana fa’asalaga o lo o tuli i le toese i le taimi nei. Na taua e White e fa’apea, e matuia le solitulafono sa faia e le ua molia, o lona sola ese lea mai le toese ao taofia ai o ia.

 

Sa ia taua fo’i le salamo moni o Lepou e tusa ai o lana solitulafono, ma ua ia naunau fo’i e toe fia fo’i i lona aiga se’i mafuta atu i ona matua ma fai sona aoga i lona aiga, nuu ma le ekalesia.

 

Na lagolagoina e le loia a le malo ia Garvey le faafinauga a White ina ia tuli fa’atasi le faasalaga a le ua molia o lo o tuli i le taimi nei, ma se fa’asalaga e manatu le fa’amasinoga e fa’asala ai o ia.

 

Na fesili le afioga i le ali’i Fa’amasino Sili ia Michael Kruse i le loia a le malo, poo le uiga o lona manatu na te lagolagoina le fa’afinauga a le itu tete’e, ina ia tuli fa’atasi le fa’asalaga tuai a Lepou o loo tuli i le taimi nei, ma se fa’asalaga fou e manatu i ai le fa’amasinoga.

 

Na tali le loia a le malo, “Ioe toe leai”.

 

“E mafua ona ou ioe, ona e lei fa’atinoina e Lepou se isi solitulafono i le taimi na sola ai i tua i le tausaga na te’a nei, se’i vagana ai lona alu e fa’atau mai pia i le faleoloa ma toe fo’i i totonu o le toese,” o le fa’amatalaga lea a le loia a le malo.

 

Na faailoa e Kruse i le loia a le malo e fa’apea, o le faalavelave lea na sola ai i tua mai le toese i Tafuna le ua molia i le 2010, e matuia mea na tutupu mai ai, aemaise lava le taimi na latou fasi faamo’amo’a ai ma isi pagota le ali’i Leoleo o le faletupe o le ANZ Bank i Tafuna.

 

E ui la e lei faatinoina e le ua molia se solitulafono ina ua sola i tua i le tausaga na te’a nei mo le taimi lona lua, peita’i o le vaavaai a le fa’ amasinoga, e fai lava si matuia o lana gaioiga sa faia.

 

Ina ua mae’a le malologa puupuu a le fa’amasinoga, na tuuina mai ai loa e Kruse le faasalaga a le fa’amasinoga, ina ia tuli e Lepou le 5 tausaga i le toese i Tafuna, ina ua ta’usala o ia i le moliaga o le sola i tua mai le toese. O lea fa’asalaga fa’atoa tuli pe a mae’a ona tuli lana fa’asalaga o loo tuli i le taimi nei.

 

E 20 tausaga o lo o tuli e Lepou i le toese i Tafuna i le taimi nei, ina ua tausala o ia i le faaoolima ma le sola i tua mai le toese, e mafua mai i le fa’alavelave lea na tula’i mai i le 2010, ina ua latou sosola i tua ma isi pagota ma latou fasi ai le Leoleopo a le Faletupe o le ANZ i Tafuna.

 

E pei ona taua i fa’amaumauga a le fa’amasinoga le iloa atu e Lepou o le ali’i Leoleopo o loo moe mai i luga o le nofoa i luma o le tama’i fale o loo tu i le tulimanu o le lotoa o le  Faletupe.

 

Na aga’i atu loa Lepou ma tu’i le Leoleopo ma palasi ai i lalo, ona ia ta kiki lea ma faaoolima ia te ia. Sa ia fa’atonuina fo’i alii pagota na latou sosola e tago se isi i le naifi e tui ai le Leoleopo.

 

A o faaoolima Lepou i le Leoleopo, sa ia tauanau o ia e avatu le ki o lana ta’avale se’i latou o ai. Na faatoa uma lava le gaioiga a pagota nei e fasi le Leoleopo ina ua latou vaaia se Loli ua aga’i atu i le auala ma sulugia ai i latou.