Ads by Google Ads by Google

Fa’anofovaavaiga ali’i molia umia faasolitulafono vaega pauta faasaina


[ata: foa'i]

I le taimi na lauina ai le fa’asalaga o le susuga ia Henry O’Brien, sa fa’ailoa ai e le Fa’amasinoga Maualuga, le tu’u o se avanoa i lenei taule’alea’a ina ia toe fuata’i lona olaga ma ia tausisi i le tulafono.

 

O le aso Tofi o le vaiaso ua te’a na tula’i ai O’Brien i luma o le Fa’amasinoga Maualuga mo le lauina o lana fa’asalaga ina ua ma’ea ona ia ioeina moliaga a le malo fa’asaga ia te ia.

 

O lea moliaga mamafa e tasi o le umia faasolitulafono lea o vaega o le pauta fa’asaina o le aisa, e mafai ona fa’asala ai se tasi mo le umi e le itiiti ifo i le 5 tausaga, pe fa’asala foi i le salatupe e le itiiti ifo i le $5,000, poo le fa’asala fo’i i fa’asalaga uma ia e lua.

 

I le taimi o le iloiloga a le fa’amasinoga sa muamua saunoa le ali’i loia fautua ia Rob McNeill, ma fa’ailoa e fa’apea o le masina o Iuni o le tausaga lenei sa taofia fa’apagota ai O’Brien ona o se poloaiga a le fa’amasinoga.

 

I le’i mamao lava se taimi na molia ai O’Brien, ae tali ioe loa i le moliaga e pei ona taua i le tagi a le mlao.

 

Ae le’i faia se fa’aiuga a le fa’amasinoga, sa fa’amanatu i ai e McNeill tusitusiga e lagolagoina ai le ali’i o O’Brien mai lona faletua ma le faifeau o lana ekalesia.

 

Sa fa’ailoa foi e McNeill i le fa’amasinoga e fa’apea o le ua molia, o se tama e to’afa lana fanau, ua salamo moni o ia i lana solitulafono, ma ua ia faia galuega e fa’aleleia ai lona olaga ae maise le va ma isi tagata.

 

I le fa’aiuga o lana saunoaga sa talosaga ai e McNeill se fa’asalaga fa’anofovaavaia mo O’Brien, o lea o lo’o faigaluega pea o se ali’i fui mu, i le Vaega Tinei Afi a le Matagaluega o Puipuiga o le Saogalemu Lautele. Sa ia fa’ailoa foi i le fa’amasinoga e le’i aveesea O’Brien mai lea galuega.

 

E le’i tete’e le malo i le talosaga mo se fa’asalaga fa’anofovaavaia.

 

O le fa’amasino sili lagolago ia Elvis P. Patea sa lauina le fa’asalaga a le fa’amasinoga. Ma sa ia saunoa o le moliaga fa’asaga ia O’Brien, o se mataupu e le o aofia ai le fa’atauina pe o le tulei ina atu i isi tagata o fualaau fa’asaina. O le mataupu a O’Brien o lona uumia lea o fualaau fa’asaina.

 

I le 35-tausaga o le olaga o O’Brien, e pei ona saunoa ai Patea, o se tagata lelei, e leai foi ni solitulafono sa ia faia ua fa’ailoa mai i fa’amaumauga a le fa’amasinoga, vagana ai mataupu laiti e fa’atatau i luga o le alatele. Ua le gata i lea, o lo’o lagolagoina o ia e lona aiga.

 

I le lipoti sa tuuina atu i le fa’amasinoga mai le Ofisa Fa’anofovaavaia, o lo’o talafeagai ai ma le talosaga a loia mai itu e lua mo se fa’asalaga fa’anofovaavaia.

 

O le fa’asalaga mo O’Brien e nofovaavaia mo le lima tausaga i lalo o aiaiga e tatau ona usitaia, e aofia ai le avea o ia ma tagata nuu lelei, aua le soliina se isi tulafono a le malo, fa’asa ona faaaogaina pe tuleiina i nisi fualaau fa’asaina.

 

E tatau foi ona totogi e O’Brien le sala tupe e $2,000 - lea e mafai ona avea ese mai le $2,500 sa totogi na mafai ai ona tatala o ia mai le toese e fa’atali ai le fa’asologa o lana mataupu i luma o le fa’amasinoga.

 

Sa tuuina atu foi le fa’asalaga e 20 masina i le toese, ae peitai o le a fa’amalumalu lea vaega o le fa’asalaga, e fuafua lava i le tausisi o le ua moliga i vaega uma o lana nofovaavaia.  I le tuuina mai o le fa’asalaga fa’anofovaavaia o se avanoa lelei lea mo le ua molia.

 

Sa fa’ailoa foi e Patea, e leai se eseese o le mataupu a O’Brien ma isi mataupu fa’apea e lua e le’i leva atu nei ona lauina foi fa’asalaga.