Ads by Google Ads by Google

Fa’anofovaavaaia Jane Vasa mo le 12 masina

ausage@samoanews.com

E 12 masina lea ua faanofovaavaaia ai e le Fa’amasinoga Fa’aitumalo ia Jane Vasa, ina ua fa’amaonia e le fa’amasinoga le moliaga mama o le gaoi sa tu’uaia ai o ia e le malo.

 

O ni isi o tuutuuga o le nofovaavaaia na tuuina atu e le afioga i le ali’i Fa’amasino ia Fiti Sunia ina ua lau le fa’asalaga a Vasa i le aso Faraile o le vaiaso na te’a nei, o lona totogiina lea o le salatupe e $1,000, ia avea o ia o se tagatanu’u e tausisi i tulafono a le malo, ma ia usita’i i tuutuuga o le latou maliliega ua mae’a ona faia ma le malo, o lona fesoasoani lea i le suesuega o le mataupu o lo o tu’uaia ai i laua o lo o molia fa’atasi i latou, le ali’i o Vincent Toeava ma Liren Zhang poo Kevin e pei ona iloa ai e le to’atele.

 

Na ulua’i tu’uaia e le malo ia Vasa i le moliaga mamafa o le gaoi, le solitulafono e mafai ona fa’asala ai o ia i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua pe afai e fa’amaonia e le fa’amasinoga.

 

O le mae’a ai o suesuega auiliili a le malo e uiga i lenei mataupu, na manatu ai loa le malo e solofua le moliaga mamafa fa’asaga ia Vasa, ae molia o ia i le moliaga mama o le gaoi, le solitulafono e mafai ona fa’asala ai o ia i le toese mo le umi e le silia i le tasi le tausaga, pe fa’asala i le salatupe e le silia i le $1,000, poo le fa’asala uma fo’i i fa’asalaga ia e lua.

 

I le tali ioe ai o Vasa i le moliaga mama o le gaoi e pei ona ta’usala ai o ia e le fa’amasinoga, na ia ta’utino ai e fa’apea, i se taimi o le vaiaso muamua o Tesema 2017, a o galue ai i le Ofisa e tufatufaina atu pepa taumafa mo le mamalu o le atunu’u (American Samoa Nutrition Assistance Program), na alu atu ai Toeave ia te ia ma se mataupu sa fia talanoa atu ai.

 

I lea talanoaga, na talosaga atu ai Toeava ia te ia pe mafai ona ia tuuina atu se pusa o loo i ai pepa taumafa mo le polokalame (Food Stamp Coupon), se’i fesoasoani ai i le tau faia o lana pepa pisinisi (business card).

 

Na teena e Vasa le fanoga a Vincent i le ulua’i taimi na talosaga atu ai, peita’i ina ua tuana’i vaiaso e 2, sa ia tuuina atu ai loa le pusa o loo i ai Food Stamp Coupon mo Vincent e tusa ai o lona fanoga.

 

O le isi vaiaso na sosoo ai, na alu atu ai Vincent ma tuu le $4,000 ia Vasa mo lana galuega sa faia. Sa talia fo’i e Vasa le tupe na tuuina atu e Vincent ia te ia.

 

I lana iloiloga sa faia i le masina na te’a nei ao lei tula’i o ia i le aso Faraile na te’a nei mo le lauina o lona fa’asalaga, na fa’atoese ai Vasa i luma o le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia e fa’aauau ai pea ona mafuta ma lona aiga. Sa ia fa’atoese i lona aiga, o le fa’amasinoga, tagatanu’u o Amerika Samoa, aemaise ai le malo ma le Matagaluega o Auaunaga ma Tautua Lautele sa galue ai, ona o le fa’alavelave e pei ona ta’uleagaina ai le igoa o le matagaluega ma le malo. Mulimuli ane, sa ia fa’atoese i lona to’alua, o si ana fanau, aemaise ai aiga o lona to’alua e tusa ai o le fa’alavelave ua mafua ai ona ta’uleagaina i latou.

 

Na taua e Vasa ma loimata ao nofo i tafatafa o lana loia fautua ia Ryan Anderson e fa’apea, o le solitulafono sa ia faia ua a’afia ai tagata uma e alolofa ia te ia, aemaise ai lava lona aiga.

 

Na taua e lana loia e fa’apea, o Vasa, o se Tina e galue malosi mo le manuia o lona aiga, o lona to’alua ma si ana fanau. O ia o se Tina ua sese lana filifiliga, lea ua mafua ai ona ta’usala o ia i lenei solitulafono.

 

Na talosagaina e Anderson le fa’amasinoga ina ia fa’asala Vasa i se fa’asalaga fa’anofovaavaaia. E le gata o le ulua’i taimi lenei ua ta’usala ai o ia i se solitulafono, ae o le solitulafono mama fo’i lea ua ta’usala ai o ia.

 

Na finau le loia a le malo ia Jason Mitchell ina ia fa’asala le ua molia i se fa’asalaga fa’anofovaavaaia e 24 masina, ona o le matuia o le gaioiga sa faia ma leiloa ai se vaega tupe tele mo le polokalame a le Food Stamp.

 

Na taua e le loia a le malo e fa’apea, o le fa’asalaga e tatau mo Vava, o le a momoli atu ai e le fa’amasinoga se feau mo isi tagata tagata uma a le malo, e le o se tulaga lelei le faia o gaioiga le fa’amaoni faapenei ao galue ai mo le malo.

 

Saunoa le afioga Sunia e fa’apea, o le gaioiga sa faia e Vasa, e le gata e matuia ae sili fo’i ona mataga. E le gata ua a’afia ai le polokalame mo tagata matutua ae ua atagia mai ai fo’i lona fa’atamala e fa’atino le auaunaga e talafeagai mo le atunu’u.

 

E 12 masina na manatu Sunia e loka ai Vasa i le falepuipui, peita’i ua fa’amalumalu lona tuliina o lea fa’asalaga, ae fa’anofovaavaaia o ia mo le 12 masina i lalo o poloaiga e ao ona usita’i i ai.

 

O ni isi o ia tuutuuga e aofia ai lona tuliina o aso e 90 i le toese, atoa ai ma lona totogi o le salatupe e $1,000. Ua taofia e le fa’amasinoga le tuliina o aso i le toese, fuafua lava i lona usitaia o isi tuutuuga uma o lana nofovaavaaia, e aofia ai ma le tuutuuga o le latou maliliega ma le malo, o le a ia fesoasoani malosi i le malo i le fa’amasinoina o le mataupu o loo tu’uaia ai Toeava ma Kevin.