Ads by Google Ads by Google

Faamaonia moliaga fa’asaga ia Okesene Alo

ausage@samoanews.com

E lata i le 9 itula na iloilo ai a ali’i ma tama’ita’i iloilo iuga mau fa’amaonia o le mataupu fa’asaga ia Okesene Alo i le aso Faraile na te’a nei, ae tuuina ai loa la latou fa’aiuga e nofosala o ia i moliaga e 7, ae le nofosala i moliaga e 4 sa tu’uaia ai o ia e le malo.

 

O moliaga ua nofosala ai le ali’i sa avea ma  Leoleo i le Falepuipui o Tamaiti i Tafuna (JDC) e aofia ai moliaga mama e 3 o le faia lea o uiga e ono lamatia ai le saogalemu o fanau laiti, fa’apea ai ma moliaga mamafa e fa e aofia ai le moliaga o le umia faasolitulafono o le aisa, umia fa’asolitulafono o le aisa ma le fa’amoemoe e tufatufa atu i isi tagata, faapea ai ma moliaga e lua o le fesoasoani lea i le fa’asolaina o se pagota i tua mai le JDC.

 

O le itula e 12:15 i le aoauli o le aso Faraile ae aga’i loa ali’i ma tama’ita’i iloilo iuga i totonu o le potu mo le amataina o le latou felafolafoaiga, ae fa’atoa mae’a ina ua ta le itula e 8:53 i le po.

 

E lei i ai ni foliga suiga o le susuga a Alo ina ua lau atu le fa’aiuga a le vaega iloilo iuga. Na faliu o ia i le autafa ma fa’atalofa i ana loia fautua o Richard deSaulles ma William Olson, ona aga’i atu loa lea i fafo ma feiloa’i ai ma ona aiga o lo o fa’atali mai ai ma loimata.

 

Na taua e deSaulles i le Samoa News e fa’apea, na tofia e le afioga i le ali’i fa’amasino sili ia Michael Kruse le latou ofisa loia e tauaveina le mataupu a Alo, ina ua tula’i mai se fete’enaiga ma le Ofisa o le Loia Fautua mo tagata lautele. Sa ia taua atili lona fa’afetaia o le galuega a ali’i ma tama’ita’i iloilo iuga, e tusa ai o le latou iloiloina ma le toto’a o mau fa’asaga i lenei mataupu. I lona talitonuga, sa fa’atinoina e itu uma e lua o lenei mataupu se galuega fita ma le taua.

 

Ae na taua e le loia a le malo ia Christy Dunn lona fa’afetaia o le galuega a ali’i ma tama’ita’i iloilo iuga, lea ua mafua ai ona tuuina mai le fa’aiuga e nofosala ai Alo i solitulafono sa ia fa’atinoina. O le tama’ita’i Sui Loia Sili ia Lornalei Meredith sa fesoasoani ia Dunn i le tauaveina o le itu a le malo.

 

O le fa’aiuga e pei ona tuuina mai e le vaega iloilo iuga, o se tulaga lea ua tauia ai le galuega fita sa fa’atinoina e le ali’i leoleo sa autu i ai le suesueina o lenei mataupu, susuge Det. Filemoni Amituana’i ma lana vaega o Leoleo Su’esu’e mai le Vaega a le Vice & Narcotics Units, lea sa i ai i le taimi atoa o lenei fa’amasinoga, amata mai lava i le ulua’i aso seia oo atu i le po o le aso Faraile na tuuina ai ai le fa’aiuga o lenei mataupu.

 

Na fa’afetaia e Kruse ali’i ma tama’ita’i iloilo iuga i le galuega fita sa latou fa’atinoina. Saunoa Kruse e fa’apea, e le o se galuega faigofie le avea ma tagata iloilo iuga, ae o le fa’atinoina ai e i latou sa avea ma sui o le vaega iloilo iuga i le mataupu a Alo o lenei galuega, e le gata sa latou fa’atinoina se galuega e sili atu ona tulaga ese, ae ua mafai ai fo’i ona latou fa’atinoina tiute tauave o le vaega o fa’amasinoga.

 

“O la outou auaunaga i lenei aso (aso Faraile na te’a nei) ua atagia mai ai le taua o la outou sao i le fa’atinoina o le tiue tauave a le vaega o fa’amasinoga. E le gata sa outou fa’afofoga ma le toto’a i le fa’agasoloina mai o lenei mataupu i le vaiaso atoa, ae ua outou nonofo lava seia oo mai i lenei taimi o le po, ona o le iloiloina toto’a o mau o lenei mataupu,” o le saunoaga lea a Kruse sa tuuina atu i le vaega iloilo iuga e to’a 2 tama’ita’i ae to’a 2 ali’i.

 

O le aso 28 Setema 2018 i le itula e 9:00 i le taeao lea ua fa’atulaga e tuuina atu ai le fa’asalaga a le fa’amasinoga fa’asaga ia Alo. Na fa’ailoa e deSaulles i le fa’amasinoga, e leai se tulaga e natinati ai fua le fa’amasinoga mo le tuuina mai o sana fa’aiuga, ona o loo i ai fo’i le isi mataupu fa’asaga ia Alo o loo fuafua e faia i se taimi o le tausaga nei.

 

O lo o taofia pea Alo i le toese i Tafuna, ina ua le mafai ona ia totogia le $100,000 sa fa’atulaga e tatala ai o ia i tua, e fa’atali ai le aso lea ua fa’atulaga e lau ai lana fa’asalaga.

 

FA’AFINAUGA FA’AI’U

 

I le fa’afinauga fa’ai’u a le malo ao le i tuuina atu mau fa’amaonia o le mataupu i aao o le vaega iloilo iuga, na fa’amanatu ai e le tama’ita’i loia ia Meredith i ali’i ma tama’ita’i iloilo iuga e fa’apea, o le tiute o le malo o le tuuina atu lea o mau fa’amaonia e lagolagoina ai le latou tagi fa’asaga ia Alo, ae o le latou tiute, o le iloiloina lea o mau ina ia mafai ai ona fa’amaonia moliaga e 11 fa’asaga i le ua molia.

 

O Alo e pei ona saunoa Meredith, o se ali’i leoleo sa tiute i le JDC mo le puipuia lea o le saogalemu o fanau aliti o loo taofia ai i le falepuipui o tamaiti. Peita’i o le mea ua tupu, ua ia le puipuia tamaiti, ae ua ia la’u i ai fualaau fa’asaina, o le ‘ava malosi, atoa ai ma le fa’ataga o i latou e tuua le falepuipui i le leva o le po.

 

“O fanau laiti nei ua faamaonia a latou solitulafono, o isi foi o loo fa’atalitali fa’aiuga o a latou mataupu, ae ua faamalosia e Alo i latou ina ia faia solitulafono eseese, e aofia ai ma le soliina lea o le tulafono,” o le saunoaga lea a Meredith.

 

Mo le moliaga 1 e oo atu i le 3, o le faia lea o gaioiga e ono lepeti ai le saogalemu o fanau. na taua i mau a le malo le tuuina atu e Alo o le ‘ava malosi atoa ai ma fualaau fa’asaina i tamaiti laiti e to’atolu. Sa ia faailoa fo’i i le ali’i leoleo suesue ia Amituana’i, o ia o lo o feagai ma le fa’afitauli o le tagofia o le pauta o le aisa.

 

Mo le moliaga 4 ma le 5, o le umia faasolitulafono lea o le pauta o le aisa, na taua ai e Meredith e faapea, o molimau sa fesiligia e le malo, sa latou ta’utino mai ai, sa latou ulaula fa’atasi ma Alo i le pauta o le aisa, o Alo fo’i na tuuina atu le pauta ia te i laua.

 

Mo le moliaga 6 ma le 7, o le umia faasolitulafono o le pauta ma le faamoemoe e tufatufa atu, o molimau e fa’atatau i le tufatufaina atu e Alo o le pauta i leoleo e to’alua atoa ai ma tamaiti laiti i totonu o le JDC, ua atagia mai ai lona fa’atinoina o lenei solitulafono.

 

Na talosaga Meredith i le vaega iloilo iuga ina ia latou faia le galuega e lei faia e Alo, o le puipuia lea o le saogalemu o fanau laiti.

 

Na taua e le loia a le itu tete’e ia Olson, pau mau ua mafai e le malo ona tuuina atu i luma o le vaega iloilo iuga, o fa’amatalaga tuu gutu ae aunoa ma ni mau faamaonia fai tino e lagolgao ai le tagi fa’asaga ia Alo. E le gata e leai ni fualaau fa’asaina, ae leai fo’i ma ni faamaumauga e faamaonia ai suega sa faia i pagota i totonu o le JDC.

 

Na finau Olson e fa’apea, o molimau uma lava a le malo sa maua le avanoa e fesiligia ai, e leai ma se molimau e fa’amaoni, e le gata e tala pepelo ae o le tele o taimi e fesuisuia’i ai a latou molimau.

 

Mo se faataitaiga o le molimau a le ali’i talavou lea na muamua valaau e le malo, e fa’a 3 lelei ona sui lana fa’amatalaga sa tuuina atu i Leoleo. Sa ia fai i Leoleo na ia maua le straw o loo i ai le aisa i le taimi na salu ai le JDC. Mulimuli ane toe sui lana tala i Leoleo fai mai sa ia maua i totonu o le ato a Alo. Toe mulimuli ane ai fo’i toe sui lana tala i Leoleo, fai mai sa tuu atu sa’o lava e Alo le aisa ia te ia.

 

E oo fo’i i molimau a i laua e to’alua sa avea ma Leoleo, lea o loo molia fa’atasi ma Alo, na taua e Olson e fa’apea, o lea ua taumafai i latou e una’i ia Alo a laua solitulafono sa faia. O i laua o ni tagata solitulafono, aua o lea ua la ta’utino e faamaonia tuuaiga fa’asaga ia te i laua.

 

I le fatigua o fa’afinauga na toe finau ai le loia a le malo e fa’apea, o le puipuiga o le saogalemu o fanau, o se taumafaiga lea ina ia puipuia le lumana’i o Amerika Samoa.