Ads by Google Ads by Google

Fa'amanatu atoaga 50 tausaga Ekalesia Metotisi i Poloa


Latou o le a fa'amoemoe i ai le lumana'i o le Matagaluega Metotisi i Poloa, ua fiafia i le atoaga o lenei 50 tausaga, taumafai e atia'e mo le isi 25 tausaga o lumana'i. [ata: Leua Aiono Frost]

O le taeao o le aso Faraile ua te’a na fa'atautaia ai le sauniga i le Malumalu Ekalesia Metotisi i Poloa e fa'amanatu ai le atoaga o le 50 tausaga talu mai ona fa'atuina lea Ekalesia i le afio'aga o Poloa i le Itumalo o le Alataua.

 

I le tausaga nei, o lo'o galulue ai Rev. Seleti Leaula ma le Faletua o Nimera i le ekalesia, ma sa latou tapena fo'i mo le fa'amoemoe ma vala'aulia ai le fa'auluuluga o le Ekalesia Metotisi Aoao ma lona Peresetene le Susuga Rev. Apineru Lafai ma le faletua, le Failautusi ma le Nofoa Sea o le Ekalesia i ona Sinoti i Apia ma Tutuila nei, ina ua atoa le Iupeli o le latou Ekalesia.

 

Ta’ita’i o le sauniga o le susuga le Peresetene Rev. Apineru Lafai, na tofia fo'i sui iloga mo le faitauina o le afioga Pa'ia a le Atua. Na tofia fo'i le tasi o Failauga iloga mo le tatalo, ae fa'ato'a toe saunoa le Taita'i o le sauniga i le Upu fa'atomatau e toe tausaili ai le Ekalesia mo isi vaitausaga o lumana'i o le Ekalesia.

 

O le susuga le Failauga fa'anofonu'u i le Matagaluega i Poloa na tula'i mo le tala o le galuega, ina ua mae'a tutula'i le fofoga o le Ekalesia, Ma'ilealo Usoali'i ma ia fa'afeiloa'ia le sauniga mamalu i e na asiasi atu fa'apea le mamalu o le au vala'aulia.

 

Na fa'alauiloa mai fo'i, "Ua na'o le to'atasi lava le sui o totoe i fanua ma le Ekalesia nei, o i latou na fa'avaeina lenei Ekalesia i le 50 tausaga ua tuana'i, na'o le tofa le fofoga o le Matagaluega Metotisi i Poloa nei, Ma'ilealo Usoali'i Nemaia.”

 

Mai le tala'aga o le galuega na iloga ai ua atoa ai i le Failauga o lo'o ua fa'anofonu'u nei i le Matagaluega i Poloa le to'a 12 ai lenei o i latou ua tofia mai ina ia galulue ma faufausia le Metotisi i Poloa.

 

O le uluai Failauga na tofia mai e tatalaina le Ekalesia o Rev. Ualesi Lematua mai le 1968-1970, suia mai lea ia Rev. Fetuao Fuifui Asiata ma le faletua ma fa'aauau mai ai le galuega. O i latou fo'i e to'atolu ma Rev. Kaleuati Vaili sa galue i le matagaluega i Malaeloa ma Rev. Tanoa Iuta sa galulue i le galuega i Failolo, ma le aiga o Mailealo Nemaia ma Taulafo Tuiolemotu-Nemaia,  ma le fanau e to'a fitu, lea sa amatalia le Ekalesia i Poloa.

 

Ole pine fa'amau o le soifua auauna o le faletua o Mataniu Ualesi Lematua, o loo lagomau pea o ia i le lotoa a le Ekalesia ina ua maliu o ia i Poloa. O le tausaga e 1971 na suia mai ai le Failauga mo Poloa Rev. Tuaumu Vaili ma Solialofi Tuaumu, ma o lo'o soifua fo'i le faletua lea o le galuega, ae ua malolo manumalo. Peita'i i le EFKAS i lena vaitau i Poloa lava sa galulue ai Rev. Tovale ma le Faletua.

 

I le tausaga 1973, na soloa'i mai ai loa Rev. Galuega ma Leitu Toailoa mai Lauli'i Samoa e galulue i le Matagaluega i Poloa lava. 1975 ua suia mai le Failauga o Rev. Ta'ai ma Sinoti Lemana, o ia fo'i le Tama matua sa auai i le sauniga o le Iupeli.

 

O le tausaga lea na pasia mai ai fa'aiugafono a le Koneferenisi, ia avea Poloa ma vaega o le Matalgauega i Failolo, ae fa'amatu'u ese mai ia Malaeloa ona o le vavamamao o nofoaga. 1978 loa tofia mai Rev.Uili Fuimaono ma Mativa Fuimaono e suitulaga i le galuega.

 

1981 avea loa le Metotisi i Poloa ma Matagaluega ma tofia mai loa i ai ma Rev. Tatupu Patea ma Lise Patea mai Satapuala, e la te amataina le Matagaluega fou lea mo le na'o le 4 masina, ae toe tofia mai loa Rev. Aliisolia Kitiona mo le fa'aauauina o le galuega. O le ulua'i faifeau fo'i lea sa na atoa lona 7 tausaga o tautua pea i le matagaluega i Poloa. O ia lea na mua'i fausia le fale o le Faife'au i Poloa lea o lo'o i ai nei.

 

1988 na fa'ato'a toe suia mai ai Rev. Amiga Tuala ma Elisapeta Tuala e galulue i le Matagaluega i Poloa, ma na la'ua soso'o lea fale o le Faife'au fa'atele. I le tausaga 1995 na suia mai ai Rev. Tanielu  Taupau ma Siiva Taupa'u mo Poloa ma na la fa'aulfualeina ai le Malumalu Fou lea ua faia mai ai pea tapua'iga se'ia o'o mai i le aso i le tausaga e 2001. Na toe soso'o ma fa'aleleia atili fo'i le maota o le fa'afeagaiga.

 

2002 na suia mai ai Rev. Malaeti'a ma Fa'afouina Aiono e avea ma Faife'au i le  ae o'o mai ai i le tausaga e 2009 suia mai e Rev. Fa'amafu ma Feagai Bourne. Ona soso'o lea o lea ile 2016 le tofia mai o le susuga Rev. Seleti ma Nimera Leaula.

 

Na amatalia le galuega e le to'aiva o tagata, le ulugali'i galulue o Ma'ileola Nemaia ma le faletua o Taulafo Tuiolemotu - Nemaia ma le fanau e to'afitu.

 

I le taimi nei ua atoa le toavalu o matafale o lo'o galulue malosi pea i le Ekalesia e fa'amumu le Lamepa o le Ola, ma ua atoa fo'i le faitauga o le ekalesia e to'a 75 ua mae'a tusia suafa i a latou fa'amaumauga.

 

O nisi sa avea ma pine fa'amau o le galuega i Poloa, sa tautua i tofiga Failauga o le Talalelei e aofia ai: Simeota Sakaio [Malolo Penisione]; Soloali'i Lafi [Malolo Penisione]; Mailealo Usoali'i; Tasele Alailesulu; Mou Jr, Leitioa; Ioane Fuatia ma Atoaga Sufia.

 

I se upu fa'amalosi sa toe fa'amanatu mai ai le ulua'i upu na laugaina i le fa'atuina o le Ekalesia i lona ulua'i sauniga lava na faia e sui mamalu o ta'ita'i ma le ekalesia e to'aiva, "Mai ia te ia le tulimanu, mai ia te ia le fao, mai ia te ia le aufana o le taua." Sakaria e 10:4

 

Lea ua to'ai taunu'u i le atoaga o le 50 tasuaga talu ona taula i le ta'ita'iga a le Atua le galuega, ua ia foa'i mai pea fao, le tulimanu e fa'atuina ma le aufana o le taua. "Afai e tumau le galuega a se tasi, ma ia atia'e e maua e ia le taui." 1Korinito 3:14..

 

Peita'i na toina mai e le Failauga le mau o lana fa'asoa Salamo 77 - 9,10 “Ou te manatua le galuega a le Ali'i. E moni ou te manatua le galuega a le Atua....O ai se sili atu i lo le Atua?"

 

"O nei galuega uma, e ala ona soloa'i mai Failauga o le Upu ina ia tutu pea le lamepa o le Malamalama i le Upu a le Atua i so'o se mea sa amata mumu ai, ona o le agaga ia maua le Ola e fa'avavau. O ai lava o i ai e ao ina tatou tofu maua le fa'aolataga, na maliu fo'i Iesu le alo o le Atua Soifua ina ia maua e i tatou uma le Ola ma ia maua atili ai lava,” o sana toe tima'i lea.

 

O le ‘aiga fiafia na alofaiva i ai le to'atele, "Ma ua latou tau fai fa'afetaia le alofa o le Atua, aua e le ona ua tatou alolofa i le Ali'i, a'o ia na mua'i alofa tele mai!"